„ცეცხლს ვეთამაშებით… იძულებული ვიქნებით გამოვიყენოთ მასობრივი კარანტინი“ – ხუნდაძე

0
მასობრივი იზოლაციის ან მასობრივი კარანტინის რეჟიმის გამოყენება არ გვინდა, მაგრამ საჭიროება თუ დადგა, ამ გადაწყვეტილებას მივიღებთ, – ამის შესახებ საქართველოს პარლამენტის ჯანმრთელობის დაცვის კომიტეტის თავმჯდომარემ, დიმიტრი ხუნდაძემ განაცხადა. „როგორც ჩანს დიდი ქალაქები დაიცალა. ეს ერთი მხრივ კარგია, მაგრამ მოსახლეობის დიდმა ნაწილმა მიაკითხა რაიონებს, სოფლებს. შეინიშნება რაიონებში, მრავალბინიან კორპუსებში, ეზოებში და ასევე ე.წ. სოფლის ბირჟებზე მოქალაქეების სიმჭიდროვე. მინდა, მოქალაქეებს მოვუწოდო, რეკომენდაციების შეუსრულებლობით ცეცხლს ვეთამაშებით. დავიცვათ საკუთარი ჯანმრთელობა და სხვისასაც გავუფრთხილდეთ, რადგან შესაძლოა, სხვისთვის მსხვერპლის საბაბი აღმოვჩნდეთ, ან საკუთარი თავი ჩავაგდოთ ხიფათში. დავიცვათ რეკომენდაციები, სიმჭიდროვეს მოვერიდოთ, რომ არ შევუწყოთ ხელი ინფექციის გავრცელებას. ახლა მნიშვნელოვან ფაზაში შევდივართ, გვჭირდება რეკომენდაციების შესრულების უფრო მაღალი ხარისხი. თუ მოქალაქეებმა რეკომენდაციები არ შეასრულეს, შესაძლოა, მივიღოთ ის, რაც მივიღეთ ბოლნისსა და მარნეულში. ასეთ შემთხვევაში ვიქნებით იძულებული, გამოვიყენოთ მასობრივი იზოლაცია ან მასობრივი კარანტინია რეჟიმი. ეს არ გვინდა, მაგრამ ამის საჭიროება თუ დადგა, ამ გადაწყვეტილებას მივიღებთ“, – განაცხადა დიმიტრი ხუნდაძემ. ცნობისთვის, 23 მარტს, მთავრობის უწყებათშორისი საკოორდინაციო საბჭოს გადაწყვეტილებით, მარნეული და ბოლნისი მთლიანად ჩაიკეტა. რეგიონებიდან თბილისში, კარანტინში მყოფი ადამიანების ტრანსპორტირებას თბილისის მერია უზრუნველყოფს.
#covid19
#coronavirus
#marneuli
#bolnisi
#georgia
#dimitrykhundadze
0