საქართველოს მთავრობა უცხოეთში მყოფი საქართველოს მოქალაქეების სამშობლოში ეტაპობრივი დაბრუნების პროცესს განაგრძობს.
საგარეო საქმეთა სამინისტროს ცნობით, დღეს განხორციელდება საკოორდინაციო საბჭოს მიერ განსაზღვრული განრიგიდან მორიგი ორი რეისი: ვარშავა-თბილისის და ბერლინი-თბილისის მიმართულებით - შედეგად, საქართველოს 250-მდე მოქალაქე დაბრუნდება სამშობლოში.
უწყების ცნობით, აღნიშნული რეისებით მოემგზავრებიან, როგორც ამ ქვეყნებში მყოფი თანამემამულეები, ასევე საქართველოს ის მოქალაქეები, რომლებიც მსოფლიოს სხვადასხვა წერტილში იმყოფებოდნენ და ვარშავასა და ბერლინში მოახერხეს ჩასვლა.
"აღსანიშნავია, რომ რეისებით სარგებლობენ განსაკუთრებული საჭიროებების მქონე მოქალაქეებიც, კერძოდ, ფეხმძიმეები, მცირეწლოვანი ბავშვები და ქრონიკული დაავადების მქონე პირები. რეისები განხორციელდება ჯანდაცვის მსოფლიო ორგანიზაციის წესის სრული დაცვით და ყველა მგზავრი, რომელიც საქართველოში ჩამოვა, 14 დღიან სავალდებულო კარანტინს გაივლის, " - აცხადებენ საგარეო საქმეთა სამინისტროში.
განცხადების თანახმად, ეს მიმართულებები განსაკუთრებით მნიშვნელოვანია, რადგან აქ მაღალია ჩვენი მოქალაქეების რაოდენობა.
"საქართველოს მთავრობა და საგარეო საქმეთა სამინისტრო აგრძელებს ევროპიდან ეტაპობრივაად მოქალაქეების დაბრუნების პროცესს. დღეს ხორციელდება ორი რეისი ვარშავიდან და ბერნლიდან, რომლითაც საერთო ჯამში, საქართველოს 250 მოქალაქე დაბრუნდება სამშობლოში. ეს მიმართულებები განსაკუთრებით მნიშვნელოვანია, რადგან აქ მაღალია ჩვენი მოქალაქეების რაოდენობა. ამ რეისებს საქართველოს ავაკიამპანია და პოლონური ავიაკომპანია ახორციელებს. ყველა მგზავრი რომელიც ჩამოვა საქართველოში გაივლის 14 დღიან დადგენილ საკარანტინო რეჟიმს, " - განაცხადა საგარეო საქმეთა სამინისტროს წარმომადგენელმა ვლადიმერ კონსტანტინიდისმა.
#პანდემია
#ფრენები
#საგარეოსაქმეთასამინისტრო
#tbilisidaily