ხვიჩა კვარაცხელიას "პარი სენ-ჟერმენმა" ჩემპიონთა ლიგის ნახევარფინალის განმეორებით შეხვედრაში ლონდონის "არსენალი" 2:1 დაამარცხა და ორმატჩიანი დაპირისპირების ჯამში 3:1 გაიმარჯვა, რაც ფრანგულ კლუბს ტურნირის ფინალის საგზურს უდასტურებს. ეს "პსჟ"-სთვის მხოლოდ მეორე ფინალია ჩემპიონთა ლიგის ისტორიაში — პირველად გუნდი ფინალში 2020 წელს გავიდა.
პარიზელებმა ლონდონში გამართული პირველი მატჩი მინიმალური ანგარიშით მოიგეს (1:0) და სწორედ ამიტომ ფავორიტებად მიიჩნეოდნენ, თუმცა საპასუხო მატჩის დასაწყისში ინიციატივა სტუმრებს ჰქონდათ — "არსენალმა" რამდენიმე სახიფათო მომენტი შექმნა, მაგრამ მომენტების რეალიზაცია ვერ შეძლო.
პირველი საგრძნობი შეტევითი იმპულსი მასპინძელთა მხრიდან სწორედ ხვიჩა კვარაცხელიას აქტიურობას მოჰყვა: ქართველმა შემტევმა ინდივიდუალური გარჯით შეაღწია მეტოქის საჯარიმოში, მაგრამ ბურთი ძელს მოარტყა. რამდენიმე წუთში, 27-ე წუთზე, ფაბიან რუისმა შესანიშნავი დარტყმით ანგარიში გახსნა.
მალევე კვარაცხელიამ კიდევ ერთხელ გამოკვეთა საკუთარი კლასი — სწრაფ კონტრშეტევაში მან ბრედლი ბარკოლა მეკარესთან პირისპირ გაიყვანა, თუმცა ფრანგმა ფორვარდმა შანსის გამოყენება ვერ მოახერხა.
მიუხედავად იმისა, რომ ვიტინიამ პენალტი ვერ გამოიყენა 69-ე წუთზე, პარიზელებმა მალევე გაიტანეს მეორე გოლი — შეტევა კვლავ ხვიჩამ წამოიწყო, ხოლო გოლი აშრაფ ჰაკიმიმ გაიტანა. 76-ე წუთზე ბუკაიო საკამ ანგარიშში სხვაობა შეამცირა, მაგრამ ეს მხოლოდ სტუმართა დროებითი შვება იყო.
"პარი სენ-ჟერმენმა" ორი მატჩის ჯამში დაამარცხა "არსენალი" და ევროპის ყველაზე პრესტიჟული საკლუბო ტურნირის ფინალში გავიდა, სადაც 31 მაისს მიუნხენის „ალიანც არენაზე“ მილანის „ინტერს“ დაუპირისპირდება.
ხვიჩა კვარაცხელია ამ შეხვედრაში გახდება მეორე ქართველი ფეხბურთელი ჩემპიონთა ლიგის ფინალში — მას წინასწარ ებმება ისტორიულ საფეხბურთო ფურცლებში კახა კალაძის სახელი, რომელმაც 2007 წელს „მილანთან“ ერთად ეს ტიტული უკვე მოიგო.