votes
comments
shares
Save
ვინ არის თეთრპერანგიანი ლაშა ლურსმანაშვილი და აქვს თუ არა კრიმინალური წარსული?
174 reads
საინფორმაციო სააგანეტო
Tbilisi · 1 month ago

ვინ არის თეთრპერანგიანი ლაშა ლურსმანაშვილი, რომელიც 19 წლის ფეხბურთელის გარდაცვალების ღამეს, „ოქროს მოწმეს“ გური ამირხანაშვილს უკვე თბილისში, დიდუბეში შეხვდა და 4 წუთს ელაპარაკებოდა?

„ხაშურელია, ჭალისუბანში ცხოვრობს. ვაჟა-ფშაველას ქუჩაზე მისი მეუღლე ცხოვრობდა, ჩემს მეზობლად. ამ ფაქტის გაჟღერების შემდეგ, გავიკითხე მისი პიროვნების შესახებ და ცუდი არავის არაფერი უთქვამს. არაფრით გამორჩეული ადამიანია, არც კრიმინალურ სამყაროსთან ჰქონია შეხება. 30 წლამდე იქნება. ავტომანქანების ხელოსანია, თუმცა აქ ამ პროფესიის წარმომადგენლები მას არ იცნობენ. სავარაუდოდ, თბილისში მუშაობს ხელობაზე“, - განუცხადა “2020NEWS“-ს ადგილობრივმა სამოქალაქო აქტივისტმა, ზაზა მეხრიშვილმა.

ამ სკანდალური ვიდეოკადრების გამო, ლურსმანაშვილი უკვე გამოიკითხა შინაგან საქმეთა სამინისტროში. როგორც თავად აღნიშნა, „ოქროს მოწმეს“ საერთოდ არ იცნობს, დიდუბეში იმ ღამეს შემთხვევით მოხვდა და ამირხანაშვილმა ქუჩაში, შემთხვევით სთხოვა ტელეფონი, რომ დაერეკა.

„თეთრპერანგიანის“ დაკითხვას კი წინ უსწრებდა ბერა ივანიშვილის მეგობრის, ავთანდილ ბილანიშვილის, იგივე „კაწროს“ დაკითხვა, რადგან „მთავარი არხის“ გენერალურმა დირექტორმა, ნიკა გვარამიამ საჯაროდ გამოთქვა ეჭვი, რომ სკანდალური საქმის „ოქროს მოწმე“ დიდუბეში სწორედ ბერას მეგობარ „კაწროს“ შეხვდა და „კაწრო“ კი ამ საქმის ჩაფარცხვას ცდილობს, დაკავებულების სასარგებლოდ.

“2020NEWS“-მა გუშინვე გამოაქვეყნა ექსკლუზიური ინფორმაცია, სადაც გარდაცვლილი ფეხბურთელის ბიძა მირიან ნიკოლაძე აცხადებდა, რომ თეთრპერანგიანის ვინაობა გამოძიებისთვის ცნობილი ისედაც იყო და ის „კაწრო“ არ ყოფილა. მოგვიანებით კი გაირკვა, რომ ეს იდუმალი თეთრპერანგიანი ლაშა ლურსმანაშვილია.

შეგახსენებთ, 19 ივნისს, საღამოს კლუბ „საბურთალოს“ ფეხბურთელის, გიორგი შაქარაშვილის დაკარგვის შესახებ, ოჯახმა შინაგან საქმეთა სამინისტროს მიმართა.

სამართალდამცველებმა, სამაშველო სამსახურებმა და მყვინთავებმა შეტყობისთანავე დაიწყეს სამძებრო სამუშაოები. ფეხბურთელს 70 მეხანძრე-მაშველი და მყვინთავთა 7 ჯგუფი ეძებდა. 4-დღიანი უწყვეტი საძიებო სამუშაოების შედეგად, მყვინთავებმა გიორგი შაქარაშვილის ცხედარი მდინარეში იპოვეს.

ამ ეტაპზე გიორგი შაქარაშვილის გარდაცვალების საქმეზე დაკავებულია 17 პირი. შსს-მ გამოძიებას სისხლის სამართლის კოდექსის 126-ე, ძალადობის მუხლიც დაამატა. ახლა გამოძიება ორი მუხლით მიმდინარეობს – თავისუფლების უკანონოდ აღკვეთისა (სსკ-ის 143-ე) და ძალადობის მუხლებით.

https://2020news.ge/index.php/%E1%83%A1%E1%83%98%E1%83%90%E1%83%AE%E1%83%9A%E1%83%94%E1%83%94%E1%83%91%E1%83%98/item/38200- news
საინფორმაციო სააგანეტო
Tbilisi · 1 month ago
Write a comment