"მეკარის გარეშე მოიგეს საქართველოს ჩემპიონატის ლიგა 4-ში. ნამდვილი სასწაული მოხდა!"

საოცარი მატჩი საქართველოს ჩემპიონატში - ჩხოროწყუელებმა მეკარის გარეშე მოიგეს საქართველოს ჩემპიონატის ლიგა 4-ში ("წითელი ჯგუფი") ნამდვილი სასწაული მოხდა! თანმიმდევრობით მივყვეთ მოვლენათა განვითარებას და ჩვენი მკითხველი დარწმუნდება, რომ ასეთი მოვლენები ფეხბურთში ხშირად არ ხდება. ასე ეხმაურება სპორტული გამოცემა „ლელო“ ჩხოროწყუს „სამეგრელოსა და თბილისის „იბერიას“ დაპირისპირებას. ჩხოროწყუში ადგილობრივმა "სამეგრელომ" თბილისის "იბერიას" უმასპინძლა და 3:1 მოუგო. მასპინძლები ლიგაში ადგილის შესანარჩუნებლად იბრძვიან და მათთვის ეს 3 ქულა ძალიან მნიშვნელოვანი იყო. თამაშის დაწყების წინ "სამეგრელო" მართლაც რომ ურთულეს ვითარებაში აღმოჩნდა. დისკვალიფიცირებული გახლდათ ძირითადი მეკარე ნიკა ჯოხაძე. მეორე მეკარემ კი, თორნიკე გეგუჩაძემ, წინასამატჩო მოთელვაზე ტრავმა მიიღო და მასპინძლები მეკარის გარეშე დარჩნენ. ამის გამო, თამაში ოციოდე წუთის დაგვიანებით დაიწყო. კარში კი "სამეგრელოს" ახალგაზრდა ფეხბურთელი დავით ბერიშვილი ჩადგა. "ახალგამომცხვარმა" მეკარემ ძალიან კარგად ითამაშა, რამდენიმე რთული ბურთი მოიგერია და დიდწილად განაპირობა მასპინძელთა ზემნიშვნელოვანი გამარჯვება. ანგარიში იბერიელმა აკაკი ყურაშვილმა გახსნა, თუმცა ამის შემდეგ "სამეგრელომ" მიჯრით შეაგდო 3 გოლი. თავი გამოიჩინეს შალვა ცქიფურიშვილმა, რამინ გულუამ და ნიკა ტუღუშმა. ახალგაზრდა, პერსპექტიული მწვრთნელის, დემურ ხაბურძანიას კარიერაში უკვე ჩაიწერა გამორჩეული ფურცელი. ჩვენ კი ვესაუბრებით ამ შეხვედრის ერთ-ერთ გმირს, შალვა ცქიფურიშვილს, ვინც ქართველ გულშემატკივარს, "სამეგრელოს" გარდა, "საპოვნელაში", "ზესტაფონში" და "მეშახტეში" კარგი თამაშით უნდა ახსოვდეს. "მართლაც ძალიან რთულ სიტუაციაში აღმოვჩნდით თამაშის წინ. წარმოიდგინეთ, როგორია, როცა ორი მეკარე გყავს და ვერცერთი ვერ თამაშობს. მატჩის დაწყების წინ ბიჭებმა ვთქვით, რომ თავს დავდებდით, ბოლომდე ვიბრძოლებდით!.. ასეც მოხდა! ფეხბურთში ერთსულოვნებას ყველაფერი შეუძლია და ეს ერთხელაც დამტკიცდა. დავით ბერიშვილი ახალგაზრდა, გამოუცდელი ბიჭია და მას გვერდით დავუდექით, შედარებით გამოცდილმა პარტნიორებმა გავამხნევეთ... ეს მატჩი არასოდეს დამავიწყდება!", - გვეუბნება ცქიფურიშვილი“, - ვკითხულობთ „ლელოს“ სტატიაში. ________________ თქვენ ამ სტატიას კითხულობთ პლატფორმა Feedc -ზე.Feedc არის ახალი მედია პლატფორმა, სადაც შეგიძლიათ გაეცნოთ ჩვენს სტატიებს. #სპორტი #სამეგრელო #ჩხოროწყუ #ფეხბურთი #ახალიამბები #zugdididaily წყარო: რადიო ათინათი