პოლონეთის საშობაო ბაზრობებზე კომპანია ვინისფერას ორგანიზებით, ქართული ღვინის წარდგენა “შეიცანი საქართველო” კამპანიის ფარგლებში მიმდინარეობს. სტუმრებს საშობაო ბაზრობებზე ქართული სამზარეულოს დაგემოვნების საშუალებაც ეძლევათ. ქართული ღვინის წარდგენა პოლონეთში ძალიან მნიშვნელოვანია, რადგან ის საქართველოსთვის ერთერთ დიდ საექსპორტო სტრატეგიულ ბაზარს წარმოადგენს. 2018 წელთან შედარებით პოლონეთში წელს ქართული ღვინის ექსპორტი გაუმჯობესებულია. #business

საქართველოში ტექნიკის ბაზარზე მოთხოვნა მუდმივად მზარდია. ყოველწლიურად ქვეყანაში დაახლოებით 140 000-ზე მეტი ტელევიზორი, 100 000-ზე მეტი გაზქურა, 100 000-ზე მეტი სარეცხი მანქანა და 50 000-ზე მეტი მაცივარი იყიდება. მსხვილი საოჯახო საყოფაცხოვრებო ტექნიკიდან ყველაზე ნაკლებ პოპულარობით ჭურჭლის სარეცხი მანქანა სარგებლობს, მისი იმპორტი სარეცხი მანქანის იმპორტთან შედარებით ყოველთვის ნაკლებია. „ბიზნესპრესნიუსი“ დაინტერესდა, თუ როგორია მსხვილი საოჯახო ტექნიკის ბაზარზე მოთამაშე უმსხვილესი რიტეილერების ფინანსური მდგომარეობა. „ელიტ ელექტრონიქსი“ „ელიტ ელექტრონიქსი“ წარმოადგენს საქართველოს სამომხმარებლო ელქტროსაქონლის ბაზარზე უმსხვილეს საცალო სავაჭრო ქსელს. კომპანიის აქციონერები არიან: შპს ბრიმაგ დიჯითალ ეიჯ -51% (ისრაელი); შპს სი5 ინთეგრეიშენ - 49% (ისრაელი). 2018 წლის კომპანიის ინდივიდუალური ანგარიშგების მიხედვით (2019 წლის მონაცემი ჯერ გამოქვეყნებული არ არის) „ელიტ ელექტრონიქსი“ არის პირველი კატეგორიაში, რაც იმას ნიშნავს, რომ აქტივების ჯამური ღირებულება 50 მილიონს ლარს აღემატება; შემოსავალი 100 მილიონ ლარს აღემატება; საანგარიშგებო პერიოდში დასაქმებულთა საშუალო რაოდენობა 250-ს აღემატება. ამავე ანგარიშის მიხედვით, „ელიტ ელექტრონიქსის“ 2018 წლის ამონაგები ჯამში 179 713 000 ლარს შეადგენდა, აქედან საიჯარო შემოსავალი იყო 208 000 ლარი, მომსახურებიდან მიღებული შემოსავალი - 544 000 ლარი. ანგარიშგების მიხედვით, გაყიდული საქონლის თვითღირებულება - შეადგენდა 141,131 000 ლარს. 2018 წელი „ელიტ ელექტრონიქსმა“ 5,720 000 ლარის სუფთა მოგებით დაასრულა. კომპანიის ხარჯებმა 30 537 000 ლარი შეადგინა. „ბეკო“ - (შპს „ტექნოჰაუსი“) შპს „ტექნოჰაუსი“, დაარსდა 2009 წლის 23 აპრილს. კომპანიის დამფუძნებელი და მფლობელია (100% წილის მფლობელი) იუსუფ ბაშარი. კომპანიის დირექტორია მეჰმედ მელექი. „ტექნოჰაუსი“ წარმოადგენს მსოფლიო ბრენდების „ბეკოს“, „ბლომბერგის“ და ა.შ. ბრენდების ტექნიკის ოფიციალურ დისტრიბუტორს საქართველოში. კომპანია აწარმოებს როგორც საცალო, ასევე სადილერო, საყოფაცხოვრებო ტექნიკის და კომპიუტერული ტექნიკის გაყიდვას, აგრეთვე პროდუქცია ექსპორტზე გააქვს ყირგიზეთსა და სომხეთში. 2018 წლის კომპანიის ინდივიდუალური ანგარიშგების მიხედვით, „ტექნოჰაუსი“ არის მე-2 კატეგორიაში, რაც იმას ნიშნავს, რომ აქტივების ჯამური ღირებულება 50 მილიონ ლარს არ აღემატება; შემოსავალი 100 მილიონ ლარს არ აღემატება და საანგარიშგებო პერიოდში დასაქმებულთა საშუალო რაოდენობა კი 250-ს. ამავე ანგარიშგების მიხედვით, 2018 წელს კომპანიის მთლიანმა შემოსავალმა შეადგინა 37 024 695 ლარი, აქედან შემოსავალი საქონლის რეალიზაციიდან იყო 32 227 620 ლარი, შემოსავალი საქონლის რეალიზაციიდან ექსპორტი - 5 041 911 ლარი. ამასთან გაყიდული საქონლის თვითღირებულებამ შეადგინა 27 763 199 ლარი. მთლიანი მოგება იყო 9 261 496 ლარი, წმინდა მოგებამ კი 2 658 805 ლარი შეადგინა. რაც შეეხება გასავალს, 2018 წელს „ტექნოჰაუსის“ ადმინისტრაციულმა და სხვა საოპერაციო ხარჯებმა 4 882 821 ლარი შეადგინა. „ტექნობუმი“ შპს ტექნო ბუმი დაფუძნებულია 2009 წელს, მისი 100%-იანი წილის მფლობელია ემზარ (ანზორ) ქოქოლაძე. კომპანიის ძირითად საქმიანობას წარმოადგენს საოჯახო საყოფაცხოვრებო ტექნიკის იმპორტი და რეალიზაცია. 2018 წლის კომპანიის ინდივიდუალური ანგარიშგების მიხედვით, „ტექნობუმი“ არის მე-2 კატეგორიაში, რაც იმას ნიშნავს, რომ აქტივების ჯამური ღირებულება 50 მილიონ ლარს არ აღემატება; შემოსავალი 100 მილიონ ლარს არ აღემატება და საანგარიშგებო პერიოდში დასაქმებულთა საშუალო რაოდენობა კი 250-ს. აღსანიშნავია, რომ 2018 წელი კომპანიამ ზარალით დაასრულა. „ტექნობუმის“ ინდივიდუალური ანგარიშგების მიხედვით, მან 2018 წელი - 7 887 603 ლარის ზარალით დაასრულა. რაც შეეხება მთლიან შემოსავალს, ის იყო 24 139 252 ლარი, ამონაგები - 23 348 700 ლარი, რეალიზებული პროდუქციის თვითღირებულება კი 18 991 549 ლარს შეადგენდა. „მეტრომარტი“ ზარალით დაასრულა 2018 წელი მსხვილი საოჯახო ტექნიკის რითეილერმა „მეტრომარტმაც“. კომპანიის ინდივიდუალური ანგარიშგების მიხედვით, ზარალის მოცულობამ 1 157 038 ლარი შეადგინა. „2018 წელს გასულ 2017 წელთან შედარებით საქონლისა და მომსახურების რეალიზაცია 4%–თ გაიზარდა, მაგრამ ამის საპირისპიროდ მნიშვნელოვნად გაიზარდა ასევე მიწოდებისა და საერთო ადმინისტრაციული ხარჯები, რამაც განაპირობა ის ფაქტი, რომ კომპანიამ 2018 წელი ზარალით დაასრულა“, - აღნიშნულია კომპანიის ანგარიშგებაში. რაც შეეხება სხვა ფინანსურ მაჩვენებლებს, ასე გამოიყურება: შემოსავალი - 40 772 609 ლარი; გაყიდული პროდუქციის თვითღირებულება - 34 218 067 ლარი; საერთო მოგება - 6 554 542 ლარი; სრული ხარჯი - 6,549,994 ლარი. შპს ”მეტრომარტი“ 2012 წელს დაარსდა. კომპანიის ძირითადი საქმიანობაა ელექტრონული მოწყობილობების და საყოფაცხოვრებო ტექნიკის რეალიზაცია. 2019 წლის ამონაწერით კომპანიის 50%-ს ფლობს შპს „ალტა“, 16.67%-ს ნინო ფირცხალავა; 33,33%-ს ანუშ ოგანისიანი, სომხეთი. 2018 წლის კომპანიის ინდივიდუალური ანგარიშგების მიხედვით, „მეტრომარტი“ არის მე-2 კატეგორიაში, რაც იმას ნიშნავს, რომ აქტივების ჯამური ღირებულება 50 მილიონ ლარს არ აღემატება; შემოსავალი 100 მილიონ ლარს არ აღემატება და საანგარიშგებო პერიოდში დასაქმებულთა საშუალო რაოდენობა კი 250-ს. „ვესტელი“ (მატექს ჯორჯია) კომპანია „მატექს ჯორჯია“ 20 წელიწადზე მეტია ქართულ ბაზარზეა. კომპანიის 50%-50% ფლობენ ჯენგიზ და ჰუსეინ მათარაჯები, კომპანიის დირექტორები არიან ჯენგიზ მათარაჯი და ჰალილ სემიზ. კომპანიის საწესდებო კაპიტალი შეადგენს 700 ლარს. კომპანიის 2018 წლის ფინანსური ანგარიშგების მიხედვით (2019 წლის ანგარიშგება ჯერ გამოქვეყნებული არ არის) „მატექს ჯორჯია“ (ვესტელი) არის მესამე კატეგორიაში, რაც იმას ნიშნავს, რომ საანგარიშო პერიოდში აქტივების ჯამური ღირებულება 10 მილიონ ლარს არ აღემატება; შემოსავალი 20 მილიონ ლარს არ აღემატება და საანგარიშგებო პერიოდში დასაქმებულთა საშუალო რაოდენობა 50-ს არ აღემატება. რაც შეეხება შემოსავლებს, ანგარიშგების მიხედვით, 2018 წელს „ვესტელის“ საქონლის გაყიდვიდან მიღებულმა შემოსავალმა 12 111 533 ლარი შეადგინა, მომსახურების გაწევიდან - 143 111 ლარი, რეალიზებული პროდუქციის თვითღირებულება იყო 10 604 055 ლარი. 2018 წელი „ვესტელმაც“ 165 267 ლარის ზარალით დაასრულა. ავტორი: ელზა წიკლაური P.s. სტატია ჩვენ არ გვეკუთვნის. სტატია გამოქვეყნებულია bpn.ge-ს მიერ. #news #business

ერთ წელიწადში წვრილფეხა ცოცხალი საქონლის ექსპორტი 131,9 %-ით გაიზარდა. კერძოდ, სტატისტიკის ეროვნული სამსახურის მონაცემებით, 2019 წელს 155 200 სული ცხვრის ექსპორტი განხორციელდა, 2018 წელს კი - 66 917 ერთეულის. ამასთან, ძირითადი ექსპორტიორი ქვეყნები იყვნენ: საუდის არაბეთი, აზერბაიჯანი, ქუვეითი, ყატარი, არაბთა გაერთიანებული საამიროები და ბაჰრეინი. „ბიზნესპრესნიუსი“ დაინტერესდა, რა არის გაორმაგებული ექსპორტის მიზეზი და ამასთან, თუ მზარდი სტატისტიკა შენარჩუნდა, აისახება თუ არა ეს ადგილობრივ ბაზარზე ცხვრის ხორცის ფასზე. როგორც მეცხვარეთა ასოციაციის თავმჯდომარე ბექა გონაშვილი ამბობს, ამის მიზეზია ის, რომ 2018 წელს უფრო მეტად ცხვრის ხორცი გადიოდა, 2019 წელს კი ცოცხალი საქონელი. „ბოლო პერიოდში შემცირდა ხორცის ექსპორტი. 2018 წელს ძირითადად გადიოდა ხორცად, 2019 კი - ცოცხალი. ამის მიზეზია ის, რომ არაბებმა უფრო მეტი ფასი გადაიხადეს იმ პერიოდში, ვიდრე ირანელებმა. ჩვენთან ცოცხალზე უფრო მეტად არაბული ქვეყნებიდან არის მოთხოვნა, კერძოდ, დუბაიდან, ბაჰრეინიდან, ყატარიდან და ა.შ. რამადანის დღესასწაულის პერიოდში, გაჰყავთ და იქ ადგილზე კლავენ. თორემ, ირანელები ნებისმიერ დროს კლავენ და ხორცის სახით მიაქვთ“,-ამბობს ბექა გონაშვილი. კითხვაზე, იმ შემთხვევაში თუ საქართველოში წვრილფეხა საქონლის ექსპორტის ზრდის ტენდენცია გაგრძელდა, ადგილობრივ ბაზარზე გამოიწვევს თუ არა ეს ხორცის ფასის გაზრდას, მეცხვარეთა ასოციაციის თავმჯდომარე ამბობს, რომ დიდი ალბათობით, კი. „სიმართლე გითხრათ, ქართული ცხვრის ხორცი ამაზე მეტად როგორღა უნდა გაძვირდეს, არ ვიცი. თუმცა, რაც უფრო შემცირდება ადგილობრივ ბაზარზე ცოცხალი წვრილფეხა საქონლის რაოდნეობა, მით უფრო მოიმატებს ღირებულებაც“,- ამბობს ბექა გონაშვილი. ავტორი: ნინი ქეთელაური P.s. სტატია ჩვენ არ გვეკუთვნის. სტატია გამოქვეყნებულია bpn.ge-ს მიერ. #news #business

საქსტატის მონაცემებით2019 წელს საგარეო ვაჭრობის მოცულობამ იმატა. 11.504.1 მლნ დოლარი შეადგინა. რაც წინა წელთან შედარებით 1.4 პროცენტით მეტია. #business

"ჩვენი ეკონომიკა უძლებს გარე შოკებს და ამას ცხადყოფს ჩვენი მაკროეკონომიკური მდგომარეობა - კორონავირუსის ფონზე ეროვნული ვალუტა მყარდება" ახალმა კორონავირუსმა უკვე დიდი გავლენა მოახდინა მსოფლიო ეკონომიკაზე, განსაკუთრებით მძლავრი დარტყმა კი ტურიზმს მიაყენა. საქართველომ კორონავირუსის გამო დროებით შეწყვიტა პირდაპირი ფრენები ჩინეთთან, ირანსა და იტალიასთან. საჰაერო ტრანსპორტის საერთაშორისო ასოციაციის ცნობით, საერთაშორისო ავიაციის წლიურმა დანაკლისმა შესაძლოა 60 მილიარდ დოლარს გადააჭარბოს. მოსალოდნელია, რომ ტურიზმისა და ავიაციის სექტორში მარტი უფრო მძიმე იქნება როგორც საქართველოსთვის, ასევე მთელი მსოფლიოსთვის. კორონავირუსმა, ფაქტობრივად, დააცარიელა ცა, ხოლო სასტუმრო ბიზნესს გაკოტრების საფრთხე შეუქმნა. ნათია თურნავა, ეკონომიკისა და მდგრადი განვითარების მინისტრი: "გაეროს ვაჭრობის და განვითარების კონფერენციამ გამოაქვეყნა პროგნოზი, რომ კორონავირუსის გამო გლობალური ექსპორტი დაახლოებით 50 მილიარდი დოლარით შემცირდება. ჩინეთი გლობალური ინდუსტრიული ჰაბია, მრეწველობის უდიდესი ნაწილი იქ არის კონცენტრირებული, შუალედური პროდუქციის გამოშვების 20% სწორედ ჩინეთზე მოდის. შესაბამისად, კორონავირუსის გავრცელება, მათ შორის ჩინეთში, უარყოფით გავლენას მოახდენს არა მარტო ჩინეთის, არამედ გლობალურად ეკონომიკაზე, რადგან გეოგრაფიული დაშორების მიუხედავად, დღეს მსოფლიო ეკონომიკა საკმაოდ ინტეგრირებულია. საქართველოც ამ ეკონომიკის ნაწილია და ექსპორტი და ტურიზმია ის დარგები, რომლებსაც ყველაზე დიდი დარტყმის საფრთხე ემუქრება. კარგი ის არის, რომ ჩვენი ეკონ­ო­მიკა უძლებს გარე შოკებს და ამას ცხადყოფს ჩვენი მაკროეკონ­ო­ზმიკური მდგომარეობა - კორ­ონავირუსის ფონზე ეროვნული ვალუტა მყარდება. იანვარში ტურიზმის განვითარების ტრაექტორია დადებითი იყო, 19%-ით გაიზარდა საერთაშორისო ვიზიტორების რიცხვი. ექსპორტშიც დაახლოებით 10%-იანი ზრდა გვქონდა. წინასწარი მონაცემებით, მარტში არ გაიზრდება საერთა­შორისო ვიზიტორების რიცხვი, მაგრამ ეს ჩვენი გამიზნული პოლ­იტიკის შედეგია. ჩვენ ვზრუნავთ ჩვენი მოსახლეობის ჯანმრთელობაზე და საზღვრებს დროებით ვკეტავთ, რათა ინფექცია არ გავრცელდეს. ჩვენ რამდენიმე შეხვედრა გვქონდა ტურიზმის სექტორის წარმომადგენლებთან და ამ შეხვედრებმა ერთი რამ ცხადყო - ბიზნესსექტორი ოპტიმისტურადაა განწყობილი. მიუხედავად იმისა, რომ სასტუმროებში ბევრი ჯავშანი გაუქმდა ან გადავადდა, ამას ყველა უყურებს როგორც დროებით პრობლემას და იმედი აქვთ, რომ მაისიდან ცხოვრების ნორმალური რიტმი აღდგება. სექტორის წარმომადგენლები დროებით ხელშემწყობ ღონისძიებებს ითხოვენ. მნიშვნელოვანია, რომ ტურიზმის ინდუსტრია დიდი გაგებით ეკიდება იმ შემზღუდავ ქმედებებს, რომელთა დაწესებაც ჩვენ მოგვიხდა. უფრო მეტიც, ამაყობენ, რომ საქართველო ამაშიც ერთ-ერთი სანიმუშო აღმოჩნდა, რადგან ჩვენი ტურისტული მიმზიდველობის ერთ-ერთი განმსაზღვრელი ისიც არის, რომ ვართ უსაფრთხო ქვეყანა, მათ შორის ვირუსთან ბრძოლის თვალსაზრისითაც. ტურიზმის სექტორის წარმომადგენლებთან ერთად ჩვენ დეტალურად განვიხილეთ ყველა პრობლემა, რომელთა წინაშეც ახლა დარგი აღმოჩნდა, და დახმარების სხვადასხვა გზა განვსაზღვრეთ. მათ შორის ეს შესაძლოა იყოს მონეტარული და არამონეტარული გზები. არის საკითხები, რომლებიც, მაგალითად, დაკავშირებულია გადასახადებთან, ბანკებთან, სხვადასხვა სახის ფინანსურ დახმარებასთან. ჩვენ მზად ვართ ამაზე ვიმსჯელოთ მთავრობის ეკონომიკურ გუნდში, რადგან ამ საკითხების უმეტესობა სცდება ეკონომიკის სამინისტროს კომპეტენციას. დეტალურად მოვისმინეთ პრობლემები, სურათი ვიცით და პრემიერთან ერთად ვიმსჯელებთ. ვფიქრობთ, უახლოეს ორ კვირაში უფრო ნათლად გვეცოდინება, თუ რას გავაკეთებთ. არის საკითხები, რომლებიც შეხვედრაზევე გადავწყვიტეთ. მაგალითად, ახლავე შეგვიძლია გადავაწყოთ ჩვენი მარკეტინგული სტრატეგია, რამაც ძალიან კარგად იმუშავა რუსეთიდან ფრენების შეწყვეტის შემდგომ, როცა ჩვენი მარკეტინგი მივმართეთ ისეთ ქვეყნებზე, რომლებიც სწრაფად შეძლებდნენ რუსი ტურისტების ჩანაცვლებას. ახლაც გადავეწყობით სხვა ბაზრებზე და დაფინანსებასაც იქით მივმართავთ. მეორე საკითხი, რასაც ასევე დავპირდი ტურისტულ ინდუსტრიას, ტრენინგებისა და კონფერენციების აპრილში გადმოტანას შეეხება. რაც დაგეგმილი გვქონდა ზაფხულსა და შემოდგომაზე, თუ შესაძლებელი იქნება, აპრილში გადმოვიტანთ, რათა დავეხმაროთ სასტუმროებსა და ტურისტული განთავსების ობიექტებს. დანარჩენზე გუნდში ვიმსჯელებთ, აუცილებლად გვერდში დავუდგებით სექტორს. ჩვენი ერთ-ერთი უდიდესი მონაპოვარია პირდაპირი ფრენები ევროპულ სახელმწიფოსა და ქალაქთან, მათ შორის იაფი ფრენები, რაც მნიშვნელოვანი ბერკეტია მოსახლეობისა და ტურიზმის მხარდასაჭერად. რა თქმა უნდა, ჩვენ არ დავთმობთ ამ ყველაფერს და როგორც კი ეპიდემიოლოგიური ვითარება მოგვცემს საშუალებას და მაღალი დასნებოვნების მქონე ქვეყნებს ეს სტატუსი მოეხსნებათ, მყისიერად ყველაფერს აღვადგენთ. მეტიც, გავაორმაგებთ ძალისხმევას, რომ რაც შეიძლება მალე დავაბრუნოთ ტურისტები საქართველოში." P.s. სტატია ჩვრნ არ გვეკუთვნის. სტატია გამოქვეყნებულია bpn.ge-ს მიერ. #news #business

„ამბიცია გვაქვს, რომ მომავალ წლებში თხილის საექსპორტო პოტენციალმა მილიარდ ლარს გადააჭარბოს“,- ამის შესახებ „პალიტრანიუსის“ გადაცემაში „საქმე“ გარემოს დაცვისა და სოფლის მეურნეობის მინისტრის პირველმა მოადგილემ გიორგი ხანიშვილმა განაცხადა. მისი თქმით, რამდენიმეწლიანი ვარდნის შემდეგ, წელს თხილის სექტორი დაუბრუნდა წარმოებას და პროდუქტის ექსპორტიდან მიღებული შემოსავალი დაახლოებით, 110- 120 მლნ დოლარი იქნება. „წამყვანი პოზიციები დღესაც გვიკავია თხილის ექსპორტში, მესამე ვართ რეგიონში, თუმცა გვინდა, რომ ვიყოთ მეორე. თურქეთთან გატოლება ცოტა არარეალური ამბიციაა, მაგრამ გეტყვით, რა მოხდა თხილთან დაკავშირებით. 2014-15 წლებში ჩვენ 2-ჯერ მეტი თხლის ექსპორტი გვქონდა განხორციელებული, ვიდრე წარმოება იყო ქვეყანაში. ამას არ ჩავუღრმავდები, რატომ და როგორც არის ეს პროცესები. 2016 წელს შემოსული მავნებლების გამო და უფრო მეტად, არასათანადო, არაჯეროვანი მოვლის გამო, მივიღეთ აბსოლუტური ვარდნა თხილის სექტორში. 3 წელი დახარჯა საქართველოს მთავრობამ და მეც მათ შორის, ხელმძღვანელი ვიყავი ამ ღონისძიების, დავაჯერეთ საკუთარ შესაძლებლობებში დასავლეთ საქართველოს თხილის მწარმებლების ნაწილი. 15 000 ბენეფიციარი გვყავდა გაერიანებული გასულ წელს ჩვენი იდეოლოგიის ქვეშ. ეს განვახორციელეთ თხილის ასოციაციასთან ერთად და 17 ათასი ჰექტარი იყო მოცული. მიმდინარე წელს ახალი პროგრამით, ჩვენ ვვარაუდობთ, რომ 30 000 ფერმერს მოვიცავთ და შესაბამისად, ეს იქნება დაახლოებით, 35-40 000 ჰექტარი. ანუ, თხილის სექტორი დაუბრუნდა წარმოებას, ფერმერებმა ირწმუნეს საკუთარი თავის, მიიღეს თხილის ძალიან მაღალი ხარისხი იმიტომ, რომ აგროღონისძიებები გაატარეს. ამასთან, შესანიშნავი საფასო პოლიტიკა გვაქვს. მინისტრი ლევან დავითაშვილი თავად იყო ჩასული თურქეთში, მოიწვია აზერბაიჯანის სოფლის მეურნეობის მინისტრი და ერთობლივად დაიგეგმა ბევრი საინტერესო ღონისიძება. მსოფლიო ბაზარზე ჩვენ გვაქვს ჩვენი ავტორიტეტული ადგილი, თხილი იყიდება აბსოლუტური წარმატებით. ჩვენ არათუ დავიბრუნეთ პოზიციები, გასულ წელთან შედარებით (როდესაც 30-40 მლნ დოლარის ექსპორტი გვქონდა განხორციელებული), არამედ, ბევრად გავაუმჯობესეთ. წელს 110- 120 მლნ დოლარის ექსპორტზე გავალთ. ჩვენ ამბიცია გვაქვს, რომ თხილის სექტორი მომავალ წლებში უნდა განვავითაროთ ისე, რომ მარტო თხილის საექსპორტო პოტენციალმა მილიარდ დოლარს გადააჭარბოს. ეს არის რეალური ამბიცია. როგორ უნდა მივაღწიოთ ამას? დღეს თხილის საშუალო მოსავალი ჰექტარზე არის 700 კგ, ეს ნიშნავს, რომ ჩვენ უნდა გადავიდეთ თხილის ინტენსიურ წარმოებაზე. კერძოდ, 2 ტონა ნახევარი უნდა მივიღოთ საშუალო საჰექტრო მოსავალი, გაუმჯობესებული ხარისხობრივი და რაოდენობრივი მაჩვენებლით“,- განაცხადა გიორგი ხანიშვილმა. ავტორი: ნინი ქეთელაური P.s. სტატია ჩვენ არ გვეკუთვნის. სტატია გამოქვეყნებულია bpn.ge-ს მიერ. #business #news

2019 წელს ირანთან სავაჭრო ბრუნვამ 258 304 600 დოლარი შეადგინა. საანგარიშო პერიოდში ირანთან ექსპორტი 71 224 700 დოლარი იყო, ხოლო იმპორტმა 187 079 800 დოლარი შეადგინა. „ბიზნესპრესნიუსი“ გთავაზობთ იმ 5 პროდუქტს, რასაც ირანში ვყიდით და ვყიდულობთ: საქართველოდან ირანში ექსპორტირებული უმსხვილესი სასაქონლო ჯგუფები: ფეროშენადნობები - 14 400 200 დოლარი ახალი, გაცივებული ან გაყინული, ცხვრის ან თხის ხორცი - 12 351 000 დოლარი გასწვრივ დახერხილი ან დაპობილი, სისქით 6 მმ-ზე მეტი ხე-ტყის მასალა - 11 635 100 დოლარი მონოძაფები სინთეზური - 6 720 600 დოლარი ახალი რეზინის პნევმატური სალტეები და საბურავები - 3 833 700 დოლარი ირანიდან საქართველოში იმპორტირებული უმსხვილესი სასაქონლო ჯგუფები: ნავთობის კოქსი, ნავთობის ბიტუმი და ნავთობის გადამუშავების სხვა ნარჩენები - 49 074 300 დოლარი მოსაპირკეთებელი ფილები კერამიკული, მოჭიქურებული - 19 905 800 დოლარი პოლიმერები ეთილენისა, პირველადი ფორმებით - 11 825 300 დოლარი მილები, მილაკები და ღრუ პროფილები, სხვა, შავი ლითონებისაგან - 10 183 900 დოლარი მინა თერმულად გაპრიალებული და მინა მქრქალი ან გაპრიალებული ზედაპირით - 7 000 200 დოლარი. ავტორი: ლიკა ამირაშვილი P.s. სტატია ჩვენ არ გვეკუთვნის. სტატია გამოქვეყნებულია bpn.ge-ს მიერ. #news #business

საქართველო-ევროკავშირს შორის არსებული თავისუფალი ვაჭრობის ხელშეკრულების ფარგლებში, ნიორი ერთადერთი სასაქონლო ჯგუფია, რომელზეც ევროკავშირის ბაზარზე ექსპორტისას ლიმიტია დაწესებული, რაც იმას ნიშნავს, რომ საქართველოს საბაჟო გადასახადის გარეშე წელიწადში მხოლოდ 220 ტონა ნივრის გატანა შეუძლია ექსპორტზე. თუ მწარმოებელი ქვეყანა ამ ოდენობას გადააჭარბებს, ის საბაჟო მოსაკრებელს გადაიხდის. მართალია, საქართველოს დიდი რაოდენობით ნიორი არ მოჰყავს, მაგრამ როგორც ირკვევა, აღნიშნული კვოტის დაწესების მიზეზი ევროკავშირის ბაზრის ჩინური ნივრისგან დაცვაა, რადგან ჩინეთი ნივრის საერთაშორისო ბაზარზე ერთ-ერთი მსხვილი მოთამაშეა. Bm.ge დაინტერესდა, გადიოდა/გადის თუ არა ნიორი ევროკავშირში ექსპორტზე და თუ - არა, რა ბაზრებზე იყიდება ძირითადად ქართული ნიორი. სტატისტიკური მონაცემების თანახმად, 2011 წლიდან დღემდე მცირე რაოდენობის (300 კგ) ნივრის ექსპორტი ერთადერთხელ განხორციელდა ლატვიაში, 2017 წელს. სტატისტიკა ასევე აჩვენებს, რომ მიუხედავად DCFTA-ით განსაზღვრული შესაძლებლობებისა, 2014 წლის შემდეგ საქართველო ნივრის ექსპორტს ძირითადად მეზობელ ქვეყნებში ახორციელებს (რუსეთი, აზერბაიჯანი, სომხეთი, თურქეთი, უკრაინა). საქსტატიდან გამოთხოვილი მონაცემების მიხედვით, 2019 წელს 595,100 დოლარის ღირებულების 519.3 ტონა ნიორი ძირითადად მეზობელ ქვეყნებში გაიყიდა, რაც წინა წლებთან შედარებით რეკორდული მაჩვენებელია. გასული წელს საქართველოდან ნივრის ექსპორტი მხოლოდ 2 ქვეყანაში განხორციელდა: რუსეთში 308,300 დოლარის ღირებულების 250.6 ტონა ნიორი გაიყიდა, ხოლო თურქეთში - 286,700 დოლარი ღირებულების 268.6 ტონა ნიორი. 2018 წელს საექსპორტი ბაზრებს ძირითადად რუსეთი და უკრაინა წამოდგენდნენ; 2017 წელს - რუსეთი, აზერბაიჯანი და სომხეთი; 2016 წელს - რუსეთი, უკრაინა, აზერბაიჯანი და სომხეთი; 2015 წელს - აზერბაიჯანი და სომხეთი; 2014 წელს კი - მხოლოდ სომხეთი. ამასთან, ბოლო 5 წლის განმავლობაში საქართველოდან ექსპორტირებული ნივრის ღირებულების სტატისტიკა ასეთია: 2014 წელი - 2,900 დოლარი; 2015 წელი -165,300 დოლარი; 2016 წელი - 318,800 დოლარი; 2017 წელი - 291,900 დოლარი; 2018 წელი - 350,100 დოლარი; რაც შეეხება ნივრის ექსპორტიორ კომპანიებს, 2019 წელს საქართველდან ექსპორტს რამდენიმე კომპანია ახორციელებდა. მათ შორისაა: შპს „სავარძელი“, შპს „ტრაფ-ესკორტ საქართველო“, შპს „ლიმა“, შპს „აგროჰომ“, შპს „მარეთი“, შპს „ქართული ხილის ექსპორტი“, შპს „ბესტ ფრუიტ“ დაშპს „გლობალ ინვესტი“. ავტორი:ვიქტორია მღებრიშვილი P.s. სტატია ჩვენ არ გვეკუთვნის. სტატია გამოქვეყნებულია bm.ge-ს მიერ. #business #news

ხუხალაანთ შოთას რძალმა თიამ, საახალწლო ნუგბარს გიგზავნითო და ასეთ გემრიელ ნიგვზიან და თხილის ჩურჩხელას, ახალ წლამდე ვინ გააჩერებს?😊 შეუკვეთეთ საიტზე და მეორე დღესვე სახლში მოგიტანენ. #business

Tiflis Tex -ის ქართული წინდები ორ ქვეყანაში საბერძნეთსა და აზერბაიჯანში Made in Georgia-ს სახელით ექსპორტირდება. ამ ორი ქვეყნიდან ერთერთი ევროკავშირის წევრია. აქედან გამომდინარე, ქართული წინდები ევროკავშირის ბაზარზე გადის. #business