2020 წლის გამოცდებში მონაწილეობის მსურველთა ინტერესების გათვალისწინებით და შექმნილი ვითარებიდან გამომდინარე, საქართველოს განათლების, მეცნიერების, კულტურისა და სპორტის სამინისტროსა და შეფასებისა და გამოცდების ეროვნული ცენტრის გადაწყვეტილებით, რეგისტრაციის ვადა ერთიანი ეროვნული გამოცდებისათვის, საერთო სამაგისტრო გამოცდისა და სტუდენტთა საგრანტო კონკურსისათვის 30 აპრილის 18 საათამდე გახანგრძლივდა. თუ აპლიკანტს გამოცდის დროს ესაჭიროება სპეციალური პირობების/სპეციფიკური საგამოცდო გარემოს შექმნა და მან რეგისტრაციისას მონიშნა ან მონიშნავს შესაბამის გრაფას, ჯანმრთელობის მდგომარეობის შესახებ შესაბამისი ცნობა (ფორმა №100) 16 აპრილის ნაცვლად, 30 აპრილის 18:00 საათამდე უნდა წარმოადგინოს. მნიშვნელოვანია, რომ ცვლილება ეხება მხოლოდ გამოცდებზე რეგისტრაციის ვადებს და არა გამოცდების ჩატარების პერიოდს. სამინისტრო და შეფასებისა და გამოცდების ეროვნული ცენტრი იმოქმედებენ პრემიერ-მინისტრის ხელმძღვანელობით კორონავირუსთან დაკავშირებით მოქმედი საკოორდინაციო საბჭოს მიერ გაცემული რეკომენდაციების შესაბამისად. ნებისმიერი დამატებითი ცვლილების შესახებ ინფორმაცია დაუყოვნებლივ გამოქვეყნდება საქართველოს განათლების, მეცნიერების, კულტურისა და სპორტის სამინისტროს, ასევე შეფასებისა და გამოცდების ეროვნული ცენტრის ოფიციალურ ფეისბუქ და ვებგვერდებზე. აღსანიშნავია, რომ შეფასებისა და გამოცდების ეროვნული ცენტრი ღია კარის დღეების ონლაინ რეჟიმში გამართვას აგრძელებს და აბიტურიენტებს ყველა კითხვაზე პასუხის მიღება ცენტრის ოფიციალურ ფეისბუქ გვერდზე ყოველ ოთხშაბათს, 13:00 საათიდან 16:00 საათამდე შეუძლიათ. ასევე, 24 საათიან რეჟიმში მუშაობს ცენტრის ცხელი ხაზი. საქართველოს განათლების, მეცნიერების, კულტურისა და სპორტის სამინისტროს მიერ შემუშავებულია გეგმა, რომელიც გულისხმობს როგორც ონლაინ, ასევე სატელევიზიო გაკვეთილებით სწავლებას, რაც საშუალებას მისცემს მოსწავლეებს, დაასრულონ მიმდინარე სასწავლო წელი. P.s. სტატია ჩვენ არ გვეკუთვნის. სტატია გამოქვეყნებულია imedinews.ge-ს მიერ. #News #Education #Headline

თბილისის მერის ინიციატივითა და უწყებათაშორისი საკოორდინაციო საბჭოს რეკომენდაციით, დედაქალაქის საჯარო ბაღებში აღსაზრდელების მშობლებისთვის პროდუქტების გაცემა დაიწყო. როგორც „ინტერპრესნიუსს“ თბილისის მერიიდან აცნობეს, პროცესს დედაქალაქის მერი კახა კალაძე, მერის მოადგილე ილია ელოშვილთან და თბილისის საბავშვო ბაგა-ბაღების მართვის სააგენტოს ხელმძღვანელ კახაბერ გვანცელაძესთან ერთად, დიდუბის რაიონში, სამტრედიის ქუჩაზე მდებარე N92 ბაგა-ბაღში გაეცნო. კახა კალაძემ ბაღების თანამშრომლებს მადლობა გადაუხადა და აღნიშნა, რომ პროცესი სპეციალისტების რეკომენდაციებისა და უსაფრთხოების ყველა წესის დაცვით მიმდინარეობს. „დიდუბის რაიონში მდებარე ერთ-ერთ საბავშვო ბაღში საკვების გაცემის პროცესს გავეცანით. ჩვენი გადაწყვეტილებით, არამალფუჭებადი, დაფასოებული პროდუქტები აღსაზრდელების მშობლებს გადაეცემათ. ეს არის ის რაციონი, რომელიც ამ დღეების განმავლობაში უნდა მიეღოთ ჩვენს პატარებს. მშობლებს ორ კვირაში ერთხელ ექნებათ შესაძლებლობა, მობრძანდნენ და ის საკვები, რომელიც ბავშვებს ბაღში უნდა მიეღოთ, სახლში წაიღონ და თავიანთ პატარებს თავად მოუმზადონ. რა თქმა უნდა, ყველა რეკომენდაცია არის გათვალისწინებული, რომელსაც პროფესიონალებისგან, ჯანდაცვის მსოფლიო ორგანიზაციიდან ვიღებთ. მაქსიმალურად არის დაცული სანიტარიულ-ჰიგიენური და უსაფრთხოების ნორმებიც“, - განაცხადა კახა კალაძემ. დედაქალაქის მერმა პროცესში ჩართულ მოხალისეებს მადლობა გადაუხადა, ხოლო მოხალისეობის მსურველ მოქალაქეებს მერიის ცხელ ხაზზე დარეგისტრირებისკენ მოუწოდა. „მინდა, დიდი მადლობა გადავუხადო ჩემს თანამშრომლებსა და იმ მოხალისეებს, რომლებიც პროცესში არიან ჩართული. ბევრი ადამიანი რეგისტრირდება ამ მიმართულებით. კიდევ ერთხელ გავიმეორებ, ვისაც მოხალისეობის სურვილი აქვს, აუცილებლად უნდა დაუკავშირდნენ დედაქალაქის მერიის ცხელ ხაზს, სადაც მოხდება მათი მონაცემების დარეგისტრირება. შემდეგ ჩვენ დავუკავშირდებით მათ, გადავამზადებთ და როდესაც ამის საჭიროება იქნება, ჩვენი ზედამხედველობის ქვეშ სხვადასხვა მიმართულებით მათი ჩართულობა განხორციელდება“, - განაცხადა თბილისის მერმა. საბავშვო ბაგა-ბაღების მართვის სააგენტოს ხელმძღვანელი დღეს, ვაკის რაიონში მდებარე N27 და N44 ბაგა-ბაღებშიც იმყოფებოდა. „დღეს დავიწყეთ პროდუქტების გაცემა მშობლებისთვის. გადასაცემ პაკეტებში მოთავსებულია 12 სახეობის არამალფუჭებადი პროდუქტი. ბაღებში მოწყობილია სპეციალური სივრცეები, სადაც უზრუნველყოფილია სანიტარიულ-ჰიგიენური ნორმები და დაცულია ის ძირითადი წესები, რაც ინსტრუქციის სახით, კორონავირუსის გავრცელების პრევენციის მიზნით, ყველა ბაღს წინასწარ მივაწოდეთ. პროცესი მშვიდად მიმდინარეობს და მინდა, მადლობა გადავუხადო ბაღების თანამშრომლებს, რომლებმაც პროცესის ორგანიზებისთვის ჩვენთან ერთად, უდიდესი შრომა გაწიეს“, - განაცხადა კახაბერ გვანცელაძემ. მისი თქმით, პროექტი, რომლის ღირებულებაც 1 800 000 ლარია, სააღმზრდელო პროცესის განახლებამდე გაგრძელდება. შეგახსენებთ, რომ კორონავირუსის გავრცელების გამო, სააღმზრდელო პროცესი თბილისის საბავშვო ბაღებში 2 მარტიდან შეჩერებულია. დედაქალაქის მერის გადაწყვეტილებით, პროდუქტი, რომელიც საბავშვო ბაღებში ბავშვთა კვებისთვის იყო გათვალისწინებული, აღსაზრდელების მშობლებს გადაეცემა.#კახაკალაძე #კორონავირუსი #მერია #თბილისი

საქართველოს პრემიერ-მინისტრ გიორგი გახარიას ხელმძღვანელობით, კორონავირუსთან დაკავშირებით მოქმედი უწყებათაშორისი საკოორდინაციო საბჭოს ჯანდაცვის თემატური ჯგუფის შეხვედრა გაიმართა. ჯანდაცვის თემატური ჯგუფის შეხვედრაზე საუბარი შეეხო პაციენტთა ნაკადების მართვის თვალსაზრისით საქართველოს მასშტაბით არსებულ ვითარებას, ასევე სახმელეთო საზღვრებზე შემოსულ პირთა საკარანტინო ზონებში გადამისამართების საკითხს. ამ ეტაპზე მიღებულია გადაწყვეტილება, რომ სომხეთის რესპუბლიკასთან არსებული სასაზღვრო-გამშვები პუნქტებიდან, მგზავრებს - საქართველოს მოქალაქეებს, შემოსვლა მხოლოდ სადახლოს სასაზღვრო-გამშვები პუნქტის გავლით შეეძლებათ, ხოლო სატვირთო მოძრაობა დასაშვები იქნება შეუფერხებლად, ყველა სასაზღვრო-გამშვები პუნქტიდან. ანალოგიური შეზღუდვა გავრცელდება აზერბაიჯანთან არსებულ სასაზღვრო-გამშვებ პუნქტებზე, შეუფერხებლად იმოძრავებს ტვირთები, ხოლო საქართველოს მოქალაქეებს შემოსვლა მხოლოდ წითელი ხიდის სასაზღვრო-გამშვები პუნქტის გავლით შეეძლებათ. ამასთან, ყურადღება გამახვილდა ჯანმრთელობის მსოფლიო ორგანიზაციასთან ეფექტურ თანამშრომლობაზე. აღინიშნა, რომ კლინიკური მართვის მიმართულებით საქართველოში ჯანდაცვის სისტემის მხარდასაჭერად, ჯანმრთელობის მსოფლიო ორგანიზაცია ექსპერტებს გამოაგზავნის. უწყებათაშორისი საკოორდინაციო საბჭო, მეტი ეფექტურობის მიზნით, დაიყო ჯანდაცვის, ეკონომიკურ და სამართალდაცვით თემატურ ჯგუფებად და პრემიერ-მინისტრის ხელმძღვანელობით რეგულარულად შეიკრიბება. 21 მარტს საქართველოში საგანგებო მდგომარეობა ამოქმედდა. კორონავირუსი ქვეყანაში უკვე 54 ადამიანს დაუდასტურდა. მათგან სამი ინფექციური კლინიკიდან უკვე გაეწერა. ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა და კლინიკიდან უკვე გაეწერა. ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით. P.s. სტატია ჩვენ არ გვეკუთვნის. სტატია გამოქვეყნებულია imedinews.ge-ს მიერ. #news #politics #headline

30 მარტიდან საზოგადოებრივი მაუწყებლის პირდაპირ ეთერში სკოლის მოსწავლეებისთვის გაკვეთილების ტრანსლირება დაიწყება. ამის შესახებ საქართველოს პრემიერ-მინისტრმა, გიორგი გახარიამ კორონავირუსთან დაკავშირებით გამართულ საკოორდინაციო საბჭოს სხდომაზე განაცხადა. მთავრობის მეთაურის თქმით, განათლების სამინისტროს და საზოგადოებრივი მაუწყებლის ერთობლივი ინიციატივა პანდემიის პირობებში, მნიშვნელოვანი წინგადადგმული ნაბიჯია. „მოგეხსენებათ, რომ სასწავლო პროცესი შეჩერებულია. საგანგებო მდგომარეობა გამოცხადებულია 21 აპრილამდე, თუმცა ობიექტურად რომ შევაფასოთ სიტუაცია, შანსი იმისა, რომ აპრილის ბოლოს სასწავლო პროცესი გაგრძელდება, რა თქმა უნდა, არსებობს, მაგრამ არსებობს შანსი, რომ სასწავლო პროცესი ვერ გაგრძელდეს. ამიტომ, განათლების სამინისტრომ ოპერატიულად მიიღო გარკვეული ნაბიჯები დისტანციური სწავლების გაძლიერებასთან დაკავშრებით და საერთოდ, ქვეყანაში ამ მიმართულების ჩამოყალიბებასთან დაკავშრებით. ძალიან კარგი თანამშრომლობა აქვთ საზოგადოებრივ მაუწყებელთან და 30 მარტიდან უკვე დაიწყება პირდაპირ ეთერში კონკრეტული გაკვეთილები საშუალო სკოლის მოსწავლეებისთვის. რა თქმა უნდა, იდეალურია, როდესაც მოსწავლეს კლასში მასწავლებელთან აქვს პირდაპირი შეხება, თუმცა იმ მდგომარეობაში, რაშიც ჩვენ ვიმყოფებით ამ პანდემიის პირობებში, ესეც წინგადადმული ნაბიჯია და ჩვენ მივესალმებით იმას, რასაც განათლების სამინისტრო და საზოგადოებრივი მაუწყებელი ერთობლივად აკეთებენ“, - განაცხადა გიორგი გახარიამ. პრემიერ-მინისტრმა მოუწოდა ინტერნეტ პროვაიდერებს, რომ გაითვალისწინონ სტუდენტების და მოსწავლეების ინტერესი, რათა მათ მარტივად ჰქონდეთ წვდომა ინტერნეტთან. მთავრობის მეთაურმა აღნიშნული ინიციატივისთვის განათლების მინისტრს მადლობა გადაუხადა. „ამასთან ერთად, მინდა მოვუწოდო თოთოეულ ინტერნეტ პროვაიდერს, რომ გაითვალისწინონ როგორც სტუდენტების, ასევე ჩვენი მოსწავლეების ინტერესი იმასთან დაკავშირებით, რომ მათ მარტივად ჰქონდეთ წვდომა ინტერნეტთან, შესაბამისად, დისტანციურ გაკვეთილებთან. სწორედ ამიტომ იყო ტელევიზია გამოყენებული, იმისთვის, რომ ძალიან კარგად გვესმის, რომ ჯერჯერობით სამწუხაროდ, ჩვენს ყველა მოქალაქეს ინტერნეტთან წვდომა არ აქვს. ეს კიდევ ერთი დამატებითი მიმართულებაა, რომელზეც მთავრობამ უნდა იფიქროს. დღევანდელ რეალობაში დისტანციური სწავლა-განათლება შეიძლება ძალზედ აქტუალური გახდეს ჩვენს ცხოვრებაში. მადლობა ბატონო მიხეილ და წარმატებებს გისურვებთ“, - განაცხადა გიორგი გახარიამ. P.s. სტატია ჩვენ არ გვეკუთვნის. სტატია გამოქვრყნებულია imedinews.ge-ს მიერ. #news #politics #covid19 #headline

სოფლის მეურნეობის სამინისტრომ პრემიერის დავალების თანახმად, უკვე შეიმუშავა მექანიზმი, რომლის საშუალებითაც 8 უმთავრეს სასურსათო პროდუქტზე ფასები არ გაიზრდება. დეტალების შესახებ „ინტერპრესნიუსს“ გარემოს დაცვისა და სოფლის მეურნეობის სამინისტროს, სოფლის მეურნეობის სურსათისა და სოფლის განვითარების დეპარტამენტის უფროსი, თენგიზ კალანდაძე ესაუბრა. მისი ინფორმაციით, გამოიკვეთა 8 სასურსათო პროდუქტი, რომელზეც ფასების უცვლელად შენარჩუნებას სახელმწიფო დააზღვევს. ეს პროდუქტებია: ბრინჯი, წიწიბურა, მაკარონი, ზეთი, ფქვილი, ხორბალი, რძის ფხვნილი და შაქარი. რაც შეეხება უშუალოდ მექანიზმს, თენგიზ კალანდაძის ინფორმაციით, საუბარია კურსთა შორის სხვაობის სახელმწიფოს მიერ დაფარვაზე. მისივე თქმით, აღნიშნულის შესახებ მთავრობის დადგენილება დღეს გამოიცემა და პროცესს სამინისტროს პროექტების მართვის სააგენტო და საბანკო სისტემა განახორციელებენ. „მოგეხსენებათ, ეს პროდუქტები იმპორტირებულია. ჩვენი ბიზნესი, როდესაც ამ პროდუქტებს ყიდულობს, ახდენს ლარის კონვერტაციას ბანკში. ჩვენ დავაფიქსირებთ ლარის კონვერტაციის კურსს, რაც კონკრეტულ დღეს იქნება, როდესაც კონვერტაცია ხდება და 3 ლარის ზემოთ სხვაობას სახელმწიფო დაფარავს. პირობითად თუ 1 დოლარი ღირს 3 ლარი და 10 თეთრი, სახელმწიფო ამ 10 თეთრიან სხვაობას დაფარავს, მას შემდეგ რაც პროდუქტი ქვეყანაში შემოვა, განბაჟდება და ყველა საბუთი ხელმისაწვდომი იქნება. შესაბამისად კურსის სხვაობის გამო, არ იქნება იმისი ობიექტური მიზეზი, რომ ეს 8 პროდუქტი გაძვირდეს. ამაზე შედგა შეთანხმება“,-აღნიშნა თენგიზ კალანდაძემ "ინტერპრესნიუსთან" საუბრისას. ცნობისთვის, აღნიშნული დავალება ფასების ზრდის დაზღვევის მექანიზმის შემუშავების შესახებ პრემიერ-მინისტრმა გიორგი გახარიამ კორონავირუსთან დაკავშირებით შექმნილ უწყებათაშორისი საბჭოს სხდომაზე სოფლის მეურნეობის სამინისტროს გუშინ მისცა. P.s. სტატია ჩვენ არ გვეკუთვნის. სტატია გამოქვეყნებულია ipn.ge-ს მიერ. #news #politics #coronavirus #headline

საქართველოს სკოლებში კორონავირუსთან ეფექტური ბრძოლისა და მისი გავრცელების აღსაკვეთად ინტენსიური სადეზინფექციო სამუშაოები დაიწყო. განათლების მინისტრის მოადგილის, ეკა დგებუაძის განცხადებით, განათლების სამინისტრო ჯანდაცვის სამინისტროსა და დაავადებათა კონტროლის ეროვნულ ცენტრისგან იღებს რეკომენდაციებს, დეზინფექციის პროცესი კი საქართველოს ყველა სკოლაში წარიმართება. როგორც დგებუაძე აღნიშნავს, სადენზიფექციო სამუშაოების ჩატარება კერძო სკოლებსაც დაევალება. „განათლების სამინისტრო ვთანამშრომლობთ ჯანდაცვის სამინისტროსთან და დაავადებათა კონტროლის ეროვნულ ცენტრთან. ჩვენ ყოველდღიურად გვაქვს ინფორმაციის გაცვლა, რეკომენდაციებს ვიღებთ ცენტრიდან, გვაქვს რეკომენდაციების გარკვეული პაკეტი, ასევე განათლების მინისტრის ბრძანებით, შეიქმნა სარეკომენდაციო დოკუმენტი. დეზინფექციის პროცესი საქართველოს ყველა სკოლაში მიმდინარეობს. არსებობს გარკვეული ინსტრუქციები არამარტო დეზინფექციასთან დაკავშირებით, არამედ ყოველდღიურად, როგორ უნდა მოხდეს სკოლის დასუფთავება სველი წესით და ასევე განიავება,” - განაცხადა დგებუაძემ. შეგახსენებთ, რომ კორონავირუსის გავრცელების საფრთხის გამო სკოლებსა და საბავშვო ბაღებში საგაზაფხულო არდადეგები დაიწყო, რომელიც 16 მარტამდე გაგრძელდება. #დეზინფექცია #სკოლა #განათლებისსამინისტრო #ჯანდაცვისსამინისტრო #tbilisidaily

საქართველოს პრემიერ-მინისტრ გიორგი გახარიას ხელმძღვანელობით, კორონავირუსთან დაკავშირებით მოქმედი უწყებათაშორისი საკოორდინაციო საბჭოს მორიგი სხდომა გაიმართა. საბჭოს სხდომაზე განიხილეს საქართველოს მთელ ტერიტორიაზე მოქმედი საგანგებო მდგომარეობის შედეგად დაწესებული შეზღუდვების, მათ შორის მარნეულისა და ბოლნისის მუნიციპალიტეტებში საკარანტინო რეჟიმის აღსრულების საკითხები. შინაგან საქმეთა მინისტრმა, ვახტანგ გომელაურმა აღნიშნა, რომ სამართალდამცავი უწყებების წარმომადგენლები 24-საათიან რეჟიმში მკაცრად აკონტროლებენ საგანგებო მდგომარეობის შედეგად დაწესებული აკრძალვების შესრულებას და ნებისმიერი დარღვევის შემთხვევაში გამოყენებული იქნება კანონით გათვალისწინებული ღონისძიებები. მინისტრის ინფორმაციით, ასევე ინტენსიურად კონტროლდება საქართველოს მასშტაბით საგანგებო მდგომარეობით დაწესებული შეზღუდვების აღსრულების პროცესი, რომელთა დარღვევისთვის კანონით დაწესებული ჯარიმები ცალკეულ შემთხვევებში სამართალდამცავებმა უკვე გამოწერეს. უწყებათაშორისი საკოორდინაციო საბჭოს სხდომაზე აღინიშნა, რომ საზღვარგარეთ მყოფი საქართველოს მოქალაქეების სამშობლოში დაბრუნების პროცესი გრძელდება. საგარეო საქმეთა მინისტრ დავით ზალკალიანის განმარტებით, გუშინ, 26 მარტს, ჩამოფრინდა გეგმური ჩარტერული რეისი ვენიდან, რომლის ბორტზე მყოფი საქართველოს 180-მდე მოქალაქე ეკონომიკისა და მდგრადი განვითარების სამინისტროს ტურიზმის ეროვნული ადმინისტრაციის მიერ მოძიებულ ერთ-ერთ სასტუმროში სავალდებულო 14-დღიან კარანტინს გაივლის. ასევე, უწყებათაშორისი საბჭოს დღევანდელ სხდომაზე აღინიშნა, რომ საქართველოში კორონავირუსით ინფიცირებული 81 პაციენტიდან 13 უკვე გამოჯანმრთელდა. შედარებით მძიმე, თუმცა სტაბილურია ხუთი ინფიცირებულის მდგომარეობა. ყველა მათგანს შესაბამისი მკურნალობა უტარდება. ამ ეტაპზე კარანტინში იმყოფება 4505 ადამიანი, ხოლო სტაციონარში, მეთვალყურეობის ქვეშ – 247 პირი. ამასთან, უწყებათაშორისი საბჭოს სხდომაზე მიღებული გადაწყვეტილებით, საქართველოს ყველა რეგიონში მომზადდება ე.წ „ცხელების ცენტრები“. აღნიშნულ კლინიკებს მიმართავენ პაციენტები, რომლებსაც ტემპერატურა დაუფიქსირდებათ. P.s. სტატია ჩვრნ არ გვეკუთვნის. სტატია გამოქვეყნებულია 1tv.ge-ს მიერ. #news #politics

დაავადებათა კონტროლის ეროვნული ცენტრის დირექტორის ამირან გამყრელიძის განცხადებით, უცხოეთში მყოფი საქართველოს 20 მოქალაქე იმყოფება სხვადასხვა საავადმყოფოში დაკვირვებაზე. როგორც მან დღეს გამართულ ბრიფინგზე განაცხადა, კორონავირუსთან დაკავშირებით შექმნილი უწყებათაშორის საკოორდინაციო საბჭოს სხდომაზე მიიღეს გადაწყვეტილება, რომ ქართველი ეპიდემიოლოგები და საგარეო საქმეთა სამინისტრო მჭიდრო კავშირში იქნება უცხოეთში მყოფ საქართველოს მოქალაქეებთან. „საგარეო საქმეთა სამინისტრო აწამორებს მონიტორინგს ჩვენი მოქალაქეების, რომლებიც სხვადასხვა ქვეყნებში იმყოფებიან. ძირითადად ევროპის ქვეყნებში და მიმდინარეობს დაკვირვება. საავადმყოფოში საქართველოს ოცამდე მოქალაქეა მოთავსებული. ეს ციფრები ყოველდღიურად იცვლება. დღეიდან იქნა გადაწყვეტილება მიღებული, რომ მჭიდრო კომუნიკაცია იქნება ჩვენს ეპიდემიოლოგებს, კლინიცისტებსა და საგარეო საქმეთა სამინისტროს შესაბამის სამსახურს შორის, რათა მოხდეს თითოეულ მოქალაქესთან, რომლებიც სხვადასხვა ქვეყანაში მკურნალობაზე იმყოფებიან, რომ მათთან ჩვენგან იყოს მჭიდრო კომუნიკაცია. როგორც მოქალაქეებთან, ასევე მედპესონალთან. სამწუხაროდ გვაქვს საზღვარგარეთ მყოფ ჩვენს მოქალაქეებში გარდაცვალების შემთხვევა, ესპანეთში. ხანდაზმული მოქალაქის, რომელსაც ჰქონდა კორონავირუსთან ერთად მრავალი რისკფაქტორი, ანუ რამდენიმე თანმხლები ქრონიკული დაავადება. მოგეხენებათ, ამ ინფექციისთვის მთავარი რისკფაქტორია ასაკი და თანხმლები დაავადებები“, - განაცხადა გამყრელიძემ. რაც შეეხება საქართველოს, გამყრელიძის განცხადებით, დღეს 197 ადამიანი გავიდა თვითიზოლაციიდან. „დღემდე ჩატარებულია 238 კონტაქტის ჩაღრმავებული კვლევა და განხორციელებულია მათზე დაახლოებით 10 ათასი სატელეფონო ზარი. კარანტინში დღეისთვის 1344 ადამიანია და თვითიზოლაციაში 1446. დღეს 197 უკვე გავიდა თვითიზოლაციიდან ანუ მათ გაუვიდათ ორკვირიან ვადა, რაც ნიშნავს, რომ ისინი ჯანმრთელები არიან და დაუბრუნდებიან ყოველდღიურ ცხოვრებას“, - აღნიშნა გამყრელიძემ. P.s. სტატია ჩვენ არ გვეკუთვნის. სტატია გამოქვეყნებულია ipn.ge-ს მიერ. #news #ამირანგამყრელიძე #coronavirus

მთავრობის მიერ გაცემული რეკომენდაციებისა და დაწესებული შეზღუდვების აღსრულების მექანიზმები განიხილეს უწყებათაშორისი საკოორდინაციო საბჭოს ეკონომიკის თემატური ჯგუფის შეხვედრაზე, რომელიც პრემიერ-მინისტრ გიორგი გახარიას ხელმძღვანელობით, დღეს მთავრობის ადმინისტრაციაში გაიმართა. ამის შესახებ „ინტერპრესნიუსს“ საქართველოს მთავრობის პრესსამსაურიდან აცნობეს. მათი ინფორმაციით, განსაკუთრებული ყურადღება გამახვილდა იმ მიზნობრივ ეკონომიკურ გეგმაზე, რომელზეც პრემიერის დავალებით ეკონომიკური გუნდი მუშაობს და რომლის მიზანია, მთავრობა მაქსიმალურად დაეხმაროს იმ მოქალაქეებს, რომლებმაც, შექმნილი ვითარების გამო შემოსავლის წყარო დაკარგეს, ასევე მხარი დაუჭიროს ქართულ ბიზნესს კრიზისის გადალახვაში. „ეკონომიკის სექტორების შემდგომი მხარდაჭერის პაკეტის შემუშავების პროცესში, მთავრობის ეკონომიკური გუნდი აქტიურად თანამშრომლობს უმსხვილეს საერთაშორისო საფინანსო ინსტიტუტებთან, მათ შორის დამატებითი მატერიალური რესურსების მობილიზების მიმართულებით. ხაზი გაესვა იმ ფაქტს, რომ ქვეყანაში მსხვილი ინფრასტრუქტურული პროექტების განხორციელება არ შეფერხდება. შეხვედრაზე ისაუბრეს მთავრობის მიერ გაცემული რეკომენდაციების აღსრულების პროცესში არსებულ გამოწვევებზე, მათ შორის რეგიონებში მოქმედ ღია აგრარულ ბაზრობებზე. აღინიშნა, რომ გარემოს დაცვისა და სოფლის მეურნეობის სამინისტრო მკაცრად გააკონტროლებს სავალდებულო წესების შესრულებას, ვინაიდან, როგორც ღია, ასევე დახურული ტიპის აგრარულ ბაზრობებზე დაცული უნდა იყოს სოციალური დისტანცირების ნორმები. ამასთან, გარემოს დაცვისა და სოფლის მეურნეობის სამინისტრო, ჯანდაცვის სამინისტროსა და დაავადებათა კონტროლის ეროვნული ცენტრის რეკომენდაციების შესაბამისად, საკუთარი სპეცტექნიკით, საქართველოს მასშტაბით სასურსათო ბაზრობებზე დეზინფიცირების სამუშაოებს ჩაატარებს“,-ნათქვამია ინფორმაციაში. მათივე განმარტებით, შეხვედრისას ყურადღება დაეთმო პირბადეებისა და სადეზინფექციო საშუალებების ადგილობრივ წარმოებას. ეკონომიკისა და მდგრადი განვითარების მინისტრის ინფორმაციით, ქვეყანაში ამ კუთხით წარმოება უკვე გამართულია და 23 მარტიდან დაიწყება პირბადეების დარიგება 70 წელს გადაცილებული მარტოხელა მოხუცებისთვის, შემდეგ კი თანდათან კერძო სექტორის ყველა პრიორიტეტული ჯგუფისთვის, რომელიც უშუალოდ მოქალაქეებს ემსახურება. „განიხილეს საკარანტინო სივრცეების დამატებით მოძიების აუცილებლობა, რამდენადაც მთავრობის გადაწყვეტილებით, დღეიდან სამშობლოში დაბრუნებული ყველა მოქალაქე სავალდებულო 14-დღიან კარანტინს გაივლის. აღნიშნული გადაწყვეტილების აღსრულება მოითხოვს დამატებითი საკარანტინო სივრცეების მობილიზებას, რაზეც ეკონომიკისა და მდგრადი განვითარების სამინისტრო ინტენსიურ რეჟიმში მუშაობს. შეხვედრაზე ხაზგასმით აღინიშნა, რომ მთავრობისთვის უმნიშვნელოვანესი პრიორიტეტია მოქალაქეების ჯანმრთელობაზე ზრუნვა და ვირუსის გავრცელების მაქსიმალურად შენელება, შესაბამისად, საზღვარგარეთ მყოფი საქართველოს მოქალაქეების სამშობლოში დაბრუნება გაწერილი გეგმის შესაბამისად, ეტაპობრივად განხორციელდება. სწორედ ამ მიზანს ემსახურება მთავრობის ის გადაწყვეტილებაც, რომლის თანახმად, მეზობელი სახელმწიფოებიდან საქართველოში შემოსვლა მოქალაქეებს მხოლოდ ლარსის, სადახლოს, წითელი ხიდის და სარფის სასაზღვრო-გამშვები პუნქტების გავლით შეუძლიათ. აღნიშნული შეზღუდვები არ ვრცელდება სატვირთო მოძრაობაზე. უწყებათაშორისი საკოორდინაციო საბჭო, მეტი ეფექტურობის მიზნით, დაყოფილია ჯანდაცვის, ეკონომიკურ და სამართალდაცვით თემატურ ჯგუფებად და პრემიერ-მინისტრის ხელმძღვანელობით რეგულარულად იკრიბება. შეხვედრებში აქტიურად მონაწილეობენ პარლამენტის შესაბამისი კომიტეტების თავმჯდომარეები“,-ნათქვამია პრესსამსახურის მიერ გავრცელებულ ინფორმაციაში. #მთავრობა #საქართველო #კორონავირუსი #ბიზნესი

საქართველოს მთავრობა და საგარეო საქმეთა სამინისტრო, პრემიერ-მინისტრის დავალებით, ინტენსიურად მუშაობს უცხოეთის ქვეყნებიდან ჩვენი მოქალაქეების სამშობლოში დასაბრუნებლად, - ამის შესახებ საქართველოს საგარეო საქმეთა მინისტრმა, დავით ზალკალიანმა კორონავირუსთან დაკავშირებით საკოორდინაციო საბჭოს სხდომის შემდეგ განაცხადა. მინისტრის განმარტებით უკვე თვენახევარია, რაც საგარეო საქმეთა სამინისტროს ჩართულობით და პრემიერ-მინისტრის დავალებით 3 ათასამდე ჩვენი მოქალაქის სამშობლოში დაბრუნება მოხერხდა. მისივე თქმით, განხორციელდა სპეციალური რეისები ჩინეთიდან, იტალიიდან, პოლონეთიდან, ჰოლანდიიდან, გერმანიიდან და ეს სია საკმაოდ ვრცელია. „მინდა საზოგადოებამ იცოდეს, რომ ჩვენ ვმუშაობთ ინტენსიურად იმისთვის, რომ უახლოეს დღეების და კვირების განმავლობაში იყოს კონკრეტულად გაწერილი ქართულ ავიაკომპანია „ეარზენა ჯორჯიან ეარვეისთან ერთად ის მიმართულებები, რა მიმართულებებიდანაც მოხდება საქართველოს მოქალაქეების ეტაპობრივი გამოყვანა. გუშინ განვმარტე და კიდევ ვიმეორებ, რომ აუცილებელია ჩვენი ჯანდაცვის სისტემა მომზადებული შეხვდეს ჩვენი მოქალაქეების დაბრუნებას. საზოგადოებას მინდა ვაცნობო, რომ შედგენილია 2 კვირის გრაფიკი. დღეს უკვე შედგება რეისი თბილისი-ბერლინი-თბილისი, რომელიც სამშობლოში დააბრუნებს ჩვენს მოქალაქეებს, რომლებიც ამ დროისთვის ბერლინში არიან კონცენტრირებული. საელჩოების მეშვეობით მოხდა მათი თავმოყრა ბერლინში და მოხდება მათი დაბრუნება სამშობლოში. ასევე, ხვალ განხორციელდება ბერძნული ავიაკომპანია „ეგეოსის“ ავიახაზების მიერ თბილისის მიმართულებით რეისი, რომლითაც ისინი ჩამოიყვანენ საქართველოს მოქალაქეებს, დააბრუნებენ საბერძნეთიდან და საქართველოდან წაიყვანენ მათ მოქალაქეებს. 26 მარტს განხორციელდება თბილისი-ვენა-თბილისის რეისი, ხოლო 31 მარტს განხორციელდება თბილისი-ამსტერდამი-თბილისის რეისი. 3 აპრილს განხორციელდება თბილისი-ვარშავა-თბილისის რეისი, ხოლო 7 აპრილს განხორციელდება თბილისი-ათენი-თბილისის რეისი. ასევე, 10 აპრილს განხორციელდება თბილისი-ლარნაგა-თბილისის რეისი. ეს არის ის უახლოესი დღეების განრიგი, რისი შესაძლებლობაც ამ ვითარებაში არსებობს, რომ ჩვენ ეტაპობრივად გამოვიყვანოთ ჩვენი მოქალაქეები. რა თქმა უნდა ჩვენ ვმუშაობთ შემდგომი რეისების დაგეგმვაზე, რომ ეტაპობრივად მოხდეს ჩვენი მოქალაქეების დაბრუნება. ასევე მინდა საზოგადოებას ვაცნობო, რომ პრემიერ მინისტრის დავალებით და ეს იქნება მკაცრად გაკონტროლებული, რომ ბილეთის თანხა არ აღემატებოდეს 199 ევროს! - განაცხადა დავით ზალკალიანმა. P.s. სტატია ჩვენ არ გვეკუთვნის. სტატია გამოქვეყნებულია imedinews.ge-ს მიერ. #news #politics #coronavirus #headline