ნარკოდანაშაულის საქმეზე განსაკუთრებით დიდი ოდენობის ქრთამის აღების ბრალდებით დაკავებულმა პროკურორმა, დავით შაკიაშვილმა დღეს სასამართლო პროცესზე ბრალი აღიარა და პროკურატურას ბოდიში მოუხადა.

,,მე შევცდი, არ ვიცი როგორ, რანაირად, როცა თავად მე ღირსების მეტი არაფერი მქონია ცხოვრებაში, ეს უღირსი საქციელი ჩავიდინე ღირსეულმა ადამიანმა. არ ვიცი, სატანა დამაჯდა მხარზე, თუ რა ჯანდაბა მოხდა. მივატოვე 2 ოჯახი, ერთი – პროკურატურა და მეორე ჩემი ნამდვილი ოჯახი, რომელიც ასე მივატოვე. ძლივს ამოვედით გაჭირვებიდან და ისევ უკან ჩავვარდით. მე გთხოვთ, რომ გამოიყენოთ გირაო”, – განაცხადა დავით შაკიაშვილმა სასამართლო პროცესზე.

დიდუბე-ჩუღურეთის რაიონული პროკურატურის თანამშრომელი, დავით შაკიაშვილი გუშინ, 9 მარტს დააკავეს. პროკურატურის განცხადების მიხედვით, გამოძიებით დადგინდა, რომ პროკურორმა დ.შ-მ თავისი საპროცესო ხელმძღვანელობის ქვეშ არსებულ სისხლის სამართლის საქმეზე, საქართველოს სისხლის სამართლის კოდექსის 260-ე მუხლის მე-6 ნაწილის „ა“ ქვეპუნქტით ბრალდებული პირისთვის საპროცესო შეთანხმების გაფორმების სანაცვლოდ, მოითხოვა განსაკუთრებით დიდი ოდენობის ქრთამი – 50 000 ლარი.

თბილისის საქალაქო სასამართლომ დიდი ოდენობით ქრთამის აღების ფაქტზე დაკავებულ პროკურორს, დავით შაკიაშვილს, აღკვეთის ღონისძიების სახით პატიმრობა შეუფარდა.