ქართული ბანქო, რომელზეც ისტორიული ფიგურებია გამოსახული
117 Views
Momos Design Studio
Tbilisi · 1 month ago

ბანქოს ბევრი ჩვენგანის ცხოვრების რაღაც ეტაპზე მაინც მნიშვნელოვანი ადგილი ეჭირა: ფურთი, ქურდი ქალი, გაცურობანა თუ ღორობანა განსაკუთრებით ნაცნობი იქნება იმ თაობებისთვის, რომელთაც ბავშვობაში სოციალური ქსელები, ანდროიდები და ინტერნეტთან წვდომა არ ჰქონდათ თავზესაყრელი დროის გასაყვანად.

ბანქო ახლაც შეუცვლელი თავშესაქცევია, როცა ცოტა ხნით მაინც ვივიწყებთ ტექნოლოგიებს და მეგობრებთან ერთად მხიარულებისთვის, არც ისე იშვიათად კი დაუნდობელი დაპირისპირებისთვისაც მზად ვართ.

ამ თამაშის მოყვარულებს ბანქო მრავალგვარი დიზაინით გვინახავს, მათ შორის არიან გიორგი ბიბილეიშვილი და მარინა სარქისიანი, რომელთაც ერთი რიგითი თამაშის დროსაც უბრალოდ გაიფიქრეს, როგორი იქნებოდა ქართული თემატიკის ბანქო და გადაწყვიტეს, მათივე ფანტაზიისთვის შეესხათ ხორცი.

ამ ახალი დიზაინით შექმნილ ბანქოზე საქართველოს ისტორიიდან და კულტურიდან ყველასთვის კარგად ნაცნობი პირები არიან გამოსახულნი: მაგალითად, დედოფალი, რა თქმა უნდა, თამარ მეფეა, როგორც ყველაზე ძლიერი ქალის სახე საქართველოს ისტორიაში.

ჯოკერის შემთხვევაში პეტრე ოცხელის ნამუშევრებია გამოყენებული, რაც თავისი ხასიათით, ვიზუალითა და განწყობით კიდევ უფრო განსაკუთრებულ ხიბლს სძენს ამ ფიგურებს.

აღსანიშნავია, რომ ამ წამოწყების მიზანი არ არის მხოლოდ ვიზუალურად განსხვავებული და საინტერესო პროდუქტის შექმნა: იდეის ავტორებს სურთ, რომ ბანქოს ამ დიზაინის წარმოებით ამავდროულად ქართული კულტურის პოპულარიზაციას შეუწყონ ხელი.

სწორედ ამის გამო ბანქოს თან მოჰყვება ინფორმაციული შინაარსის მასალა, რომელიც ნებისმიერ დაინტერესებულ პირს მასზე გამოსახული ფიგურების შესახებ ცნობებს მიაწვდის, რაც საერთაშორისო ბაზარზე მისი გატანის შემთხვევაში, დამატებით ხიბლს შესძენს ბანქოს, როგორც ქართული ისტორიის გაცნობის საშუალებას.

როგორც იდეის ავტორები აღნიშნავენ, მათ უკვე დამზადებული აქვთ სატესტო ვერსია რამდენიმე ეგზემპლარის სახით და უფრო ფართო წარმოებისათვის ფინანსურ მხარდაჭერას ეძებენ, რათა ის გაყიდვაში ჩაეშვას და ნებისმიერმა მსურველმა შეძლოს მისი შეძენა.

ამ უჩვეულო და საინტერესო იდეის ავტორები სწორედ გიორგი ბიბილეიშვილი და მარინა სარქისიანი არიან. მათ შორის სწორედ მარინამ იმუშავა ბანქოს დიზაინზე და ფიგურების ილუსტრაციებზე.

წყარო: on.ge

____________

გამოიწერეთ გვერდი და ადევნეთ თვალყური ქართულ თანამედროვე დიზაინ-სიახლეებს მომოსთან ერთად 🖤

#დიზაინი

#პროდუქტისდიზაინი #ახალიამბები #ხელოვნება #კარტი #დიზაინი #დიზაინერები #დიზაინერი #დიზაინსიახლეები #დიზაინნიუსი #თანამედროვედიზაინი #ქართველიდიზაინერი #კარგიდიზაინი #პროდუქტისდიზაინი #დღისდიზაინი #ქართულიდიზაინი #გრაფიკული #გრაფიკა #გრაფიკულიდიზაინი
Momos Design Studio
Tbilisi · 1 month ago
12
Write a comment