კიბერტექნოლოგიების სპეციალისტი ანდრო გოცირიძე ამბობს, რომ კომპიუტერულ სისტემაში არსებული ინფორმაცია მომხმარებელმა რაც უნდა წაშალოს, ის კვალს მაინც ტოვებს. ყველა მოქმედება სერვერულად იწერება და დოკუმენტირდება.
„თანამედროვე ტექნოლოგიები იძლევა იმის საშუალებას, რომ კომპიუტერში ნებისმიერი წაშლილი ფაილი აღდგეს. სამხარაულის ექსპერტიზის ბიუროს და შსს-ს საგამოძიებო ორგანოებს აქვთ ამის საშუალება. ამერიკასა და FBI-სთან ურთიერთობა იმ დონეზეა, რომ ყველანაირი დახმარება შესაძლებელია. ფაილების აღდგენა საქართველოშიც შეიძლება.
კომპიუტერულ სისტემაში ყველა მოქმედების აღდგენაა შესაძლებელი, თუ ის მოყვარულმა წაშალა, მაგრამ თუ ერთმანეთს ებრძვის ორი კიბერდანაყოფი, საქმე გართულდება, მაგრამ აღდგენა მაინც შესაძლებელია. თუ გოგონას კომპიუტერში არ არის, მაშინ იქნება იმ პლატფორმების სერვერზე, როგორიცაა "გუგლი", "ფეისბუქი", "იაჰუ" და სხვა, რომლებიც გოგონამ გამოიყენა.
გოგონას ბექგრაუნდიდან გამომდინარე, მას რთული პაროლი უნდა ჰქონოდა. კომპიუტერის მცოდნეს, პროგრამისტს, რომელიც სახლში არაფერს ამბობდა თავის საქმიანობაზე, პასვორდიც დამალული ექნებოდა. მეორე მხრივ, მსგავსი გამოცდილების ადამიანს რაიმე საიდუმლო თუ ჰქონდა, კომპიუტერში არც შეინახავდა. ამიტომ ისიც დასაშვებია, რომ კომპიუტერზე მარტივი პასვორდი ჰქონოდა და მასში სერიოზული არც არაფერი აღმოჩნდეს. ათასობით ფაილი იქნება აღსადგენი. ეს მით უფრო რთულია, როცა პატრონი არ არის ცოცხალი.
რაც შეეხება საიდუმლო ინფორმაციას, მე როგორც აღვიქვი, ლაპარაკია არა სახელმწიფოებრივ საიდუმლოებაზე, არამედ კონფიდენციალურ ინფორმაციაზე. მე თუ ვიღაცას პროგრამას ვუქმნი, ეს სხვა კლიენტს არ უნდა გავანდო, თორემ ფინანსები და მერე პერსონალური ინფორმაციაც გაჟონავს. ამიტომ მე ხელს ვაწერ, რომ კონფიდენციალურობას დავიცავ. თუმცა ინფორმაციის უნებლიე გამჟღავნებაც შეიძლება გახდეს შურისძიების ან დასჯის საფუძველი“, - განაცხადა ანდრო გოცირიძემ
"კვირისპალიტრა"