პლანეტის ნახევარი (4 მილიარდი ადამიანი) სავალდებულო კარანტინში იმყოფება. აღნიშნულ ინფორმაციას New York Times ავრცელებს. თვითიზოლაციის რეჟიმმა და სავალდებულო კარანტინმა დედამიწის მოსახლეობის ნახევარი - დაახლოებით 3.9 მილიარდი ადამიანი მოიცვა. წყაროს ცნობით, კორონავირუსის პანდემიის გამო გამკაცრებული ზომები 90-ზე მეტმა სახელმწიფომ შემოიღო. ადამიანებს სახლიდან გასვლა, ქალაქის ან ქვეყნის დატოვება აუკრძალეს. გარდა ამისა, იმ ქვეყნებში, სადაც სახიფათო ვირუსი გავრცელდა, კომენდანტის საათი ამოქმედდა - ჩვენი ქვეყანა ამის მაგალითია. უკანასკნელი დადასტურებული ინფორმაციით, საერთო ჯამში მსოფლიოს მასშტაბით COVID-19-ით ინფიცირების ფაქტი 1,193,655 ადამიანს დაუდგინდა. ამ წუთისთვის ახალი ვირუსი 203 ქვეყანაში გავრცელდა. როგორც ცნობილია, კორონავირუსს 64,277 პირი ემსხვერპლა, ხოლო 246,110 სრულიად გამოჯანმრთელდა.#კორონავირუსი #პანდემია #მსოფლიო #საქართველო #newyorktimes #სტატისტიკა #coronavirus #pandemic #world #georgia #statistics

ჩრდილოეთ იტალიაში, კორონავირუსის ეპიდემიური აფეთქების გამო, ქვეყნის პრემიერ-მინისტრმა ჯუზეპე კონტემ სავალდებულო კარანტინი გამოაცხადა. კონკრეტულად ლომბარდიის რეგიონსა და 14 პროვინციაში, 16 მილიონი ადამიანი სავალდებულო კარანტინში იმყოფება. მთავრობის განკარგულებით, დროებით დაიხურება საზოგადოებრივი თავშეყრის ობიექტები - სპორტული დარბაზები, აუზები, მუზეუმები და სათხილამურო კურორტები. არსებული მდგომარეობით, კარანტინი ლომბარდიის რეგიონში, მილანში, ვენეციაში, პარმაში, მოდენასა და კიდევ რამდენიმე პროვინციაში 3 აპრილამდე გაგრძელდება და ამ დრომდე, გადაუდებელი შემთხვევების გარდა აღნიშნული ტერიტორიების დატოვება ან იქ შესვლა იკრძალება. იტალია კორონავირუსის გავრცელების თვალსაზრისით მსოფლიოში ჩინეთისა და სამხრეთ კორეის შემდეგ მესამე ადგილზე იმყოფება. იტალიაში ვირუსით ინფიცირების 5,883 ხოლო გარდაცვალების 233 შემთხვევა დაფიქსირდა. #news

მთავრობის ადმინისტრაცია კორონავირუსთან დაკავშირებით შექნილი უწყებათაშორისო საბჭოს დღევანდელ სხდომაზე მიღებული გადაწყვეტილებებისა და განხილული საკითხების შესახებ ინფორმაციას ავრცელებს. „საქართველოს იმ მუნიციპალიტეტებს, სადაც მოსახლეობის პროაქტიული თერმოსკრინინგი ტარდება და სპეციალური გამშვები პუნქტებია მოწყობილი, ვანის მუნიციპალიტეტი დაემატა. აღნიშნული გადაწყვეტილება უწყებათაშორისმა საკოორდინაციო საბჭომ დღევანდელ სხდომაზე მიიღო, რომელიც პრემიერ-მინისტრ გიორგი გახარიას ხელმძღვანელობით ვიდეოკონფერენციის ფორმატით გაიმართა. გადაწყვეტილების მიღების პროცესში საბჭომ გაითვალისწინა ეპიდემიოლოგების რეკომენდაცია, ვინაიდან კორონავირუსით ინფიცირების რამდენიმე ახალი შემთხვევიდან ერთი ვანის მუნიციპალიტეტს უკავშირდება. აღნიშნულ შემთხვევაში უკვე მიღებულია შესაბამისი ზომები და მიმდინარეობს კონტაქტების მოძიება, თუმცა დამატებითი ღონისძიებები ხელს შეუწყობს საჭირო ნაბიჯების ეფექტურობას. ვიდეოკონფერენციისას განხილული იყო საგანგებო მდგომარეობით დადგენილი შეზღუდვებისა და ჯანდაცვის სამინისტროს რეკომენდაციების შესრულების შემოწმების პროცესი იმ საწარმოებში, რომლებიც ფუნქციონირებას განაგრძობენ ან შესაბამისი განაცხადით ეკონომიკისა და მდგრადი განვითარების სამინისტროს მიმართეს. მინისტრ ნათია თურნავას ინფორმაციით, გასული ორი დღის განმავლობაში, ჯანდაცვის სამინისტროს შრომის ინსპექციასთან ერთად, ინსპექტირება ჩატარდა საქართველოს მასშტაბით 76 საწარმოში, რომელთაგან 14-ში ხარვეზები დაფიქსირდა. ჯანდაცვის სამინისტროს რეკომენდაციებთან სამუშაო პროცესისა და გარემოს შესაბამისობის უზრუნველსაყოფად მათ დრო მიეცათ. ანალოგიური კონტროლი ხორციელდება სამშენებლო ობიექტებზე. თბილისის მერმა კახა კალაძემ საბჭოს მიაწოდა ინფორმაცია, რომ დედაქალაქში უკვე შემოწმდა 130-მდე სხვადასხვა მშენებლობა. ყველა ობიექტზე, სადაც დაკმაყოფილებულია შესაბამისი სტანდარტები, სამუშაო პროცესი გრძელდება. ის მშენებლობები კი, სადაც უსაფრთხოების ზომების არასათანადო უზრუნველყოფა გამოვლინდა, ამ ეტაპზე შეჩერებულია. შრომის უსაფრთხოების წესების კონტროლი გრძელდება საქართველოს მასშტაბით აგრარულ ბაზრებზეც. მუშაობის განახლებას შეძლებენ ის ბაზრები, რომელთა ადმინისტრაციები სურსათის ეროვნული სააგენტოს სპეციალურ სავალდებულო პროტოკოლს სრულად დააკმაყოფილებენ. სხდომაზე განიხილეს ადგილობრივი წარმოების, მათ შორის პირბადეების წარმოების მიმართულებით არსებული ვითარება. აღინიშნა, რომ ქართული წარმოების პირბადეები საქართველოს მასშტაბით სააფთიაქო ქსელებში უკვე გაყიდვაშია და მასზე გეოგრაფიული ხელმისაწვდომობა ეტაპობრივად გაიზრდება. საქართველოში წარმოებული დოლბანდის პირბადეების საცალო ღირებულება 50 თეთრი იქნება. ამასთან, აქტიურად გრძელდება პირველადი ჯანდაცვის სისტემის მზადყოფნის კონტროლი. საქართველოს პრემიერ-მინისტრმა ხაზი გაუსვა ამ პროცესის და შესაბამისი კონტროლის ჯგუფის გაძლიერების აუცილებლობას, რომელსაც პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარე დიმიტრი ხუნდაძე ხელმძღვანელობს. მთავრობის მეთაურის დავალების შესაბამისად, ჯგუფის საქმიანობაში აქტიურად ჩაერთვებიან ადგილობრივი ხელისუფლების წარმომადგენლები, რათა პროცესი კიდევ უფრო აქტიურად, ჯანდაცვის სამინისტროსთან სრულ კოორდინაციაში წარიმართოს. ამასთან, გრძელდება საზღვარგარეთ მყოფი საქართველოს მოქალაქეების სამშობლოში დაბრუნების პროცესი. ამ მიზნით, სხვადასხვა ქვეყნიდან ხორციელდება სპეციალური რეისები ჯანმრთელობის მსოფლიო ორგანიზაციის რეკომენდაციების შესაბამისად. მკაცრად კონტროლდება ბილეთების გაყიდვა დადგენილ ფასად, რომელიც მთავრობის გადაწყვეტილებით, 199 ევროს არ უნდა აღემატებოდეს. საგარეო საქმეთა მინისტრ დავით ზალკალიანის ინფორმაციით, დღეისთვის სამშობლოში დაბრუნებულია საქართველოს 5000-მდე მოქალაქე, ხოლო საქართველოს დიპლომატიურმა წარმომადგენლობებმა შესაბამისი მატერიალური და ტექნიკური დახმარება გაუწია 40 ქვეყანაში მყოფ საქართველოს 2 425 მოქალაქეს. სხდომაზე ასევე განიხილეს ქვეყანაში არსებული ეპიდემიოლოგიური მდგომარეობა, რომელიც თანდათან რთულდება. აღინიშნა, რომ ქვეყანაში არსებობს ინფიცირების შემთხვევების ზრდის მოლოდინი, ამიტომ მთავრობა კიდევ ერთხელ მოუწოდებს მოქალაქეებს, მკაცრად დაიცვან დადგენილი წესები და სახლიდან მხოლოდ უკიდურესი აუცილებლობის შემთხვევაში გავიდნენ. დღევანდელი მონაცემებით, საქართველოში კორონავირუსით ინფიცირების 208 დადასტურებული შემთხვევაა, საიდანაც 48 პირი უკვე გამოჯანმრთელდა. სამწუხაროდ, სიცოცხლესთან შეუთავსებელი მრავლობითი თანმდევი და ქრონიკული დაავადებების გამო, გარდაცვლილია 3 ადამიანი, რომელთა ოჯახებს საკოორდინაციო საბჭომ კიდევ ერთხელ მიუსამძიმრა. ინფიცირებულ პირებს შესაბამისი მკურნალობა უტარდებათ. ამ ეტაპზე კარანტინში იმყოფება 4682 ადამიანი, ხოლო სტაციონარში, მეთვალყურეობის ქვეშ - 375 პირი. უწყებათაშორისი საკოორდინაციო საბჭო კოორდინირებული ნაბიჯების გადადგმის მიზნით სხდომებს პრემიერ-მინისტრის ხელმძღვანელობით, ინტენსიურად ვიდეოკონფერენციის ფორმატში განაგრძობს. საბჭოს მუშაობაში აქტიურად მონაწილეობენ საქართველოს პარლამენტი და პრეზიდენტის ადმინისტრაცია“, - აცხადებენ მთავრობის ადმინისტრაციაში.#უწყებათაშორისოსაბჭო #კორონავირუსი #გადაწყვეტილებები #tbilisidaily

ჯანდაცვის ექსპერტის, აკაკი ზოიძის განცხადებით, მარნეულში კორონავირუსით ინფიცირებულის საკმაოდ ბევრი კონტაქტი იკვეთება. მისი თქმით, ამ დროისთვის ჯამში საუბარია 1700-მდე კონტაქტზე. აქედან 90 უშუალო კონტაქტია. „მარნეულში და ბოლნისში საკმაოდ პრობლემატური საკითხია ის, რომ ძალიან ბევრი კონტაქტი იკვეთება, რაც არის დაახლოებით 1700-მდე უკვე. იმ 90-დან შემდგომი ტალღა კონტაქტების 1700-მდეა და მათი ყველას გამოკვლევა და შემდგომი იზოლაცია იქნება საჭირო“ ,- აღნიშნა აკაკი ზოიძემ. შეგახსენებთ, კორონავირუსი მარნეულში შუა ხნის ქალს დაუდასტურდა. ამ შემთხვევაში ინფიცირების უშუალო წყარო ცნობილი არ არის. საქართველოს პრემიერ-მინისტრმა, გიორგი გახარიამ გვიან ღამით გამართულ ბრიფინგზე განაცხადა, რომ მარნეულსა და ბოლნისში კარანტინი გამოცხადდა. აღნიშნულ მუნიციპალიტეტებში კარანტინისას საზოგადოებრივ წესრიგს დაიცავს და საგანგებო რეჟიმს უზრუნველყოფს შინაგან საქმეთა სამინისტრო. ამასთან, შინაგან საქმეთა სამინისტროსთან კოორდინაციით, პროცესში ჩართულია საქართველოს თავდაცვის ძალებიც.#coronavirus #covid19 #stopcovid19 #marneuli

ვისღა შეუძლია წარმოთქვას ფრაზა „ვირუსულად გავრცელდა“ ისე, რომ შიშმა არ აიტანოს? ვისღა შეუძლია შეხედოს საგნებს – კარის სახელურს, მუყაოს ყუთს, ბოსტნეულის ტომარას – ისე, რომ არ წარმოიდგინოს მათზე შემოჯარული უხილავი, უკვდავი, უსიცოცხლო, ჯამისებრი საწოვარებით დაწინწკლული ბურთულები, რომლებიც ჩვენს ფილტვებზე მიმაგრებას ელიან? ნამდვილი შიშის გარეშე ვისღა შეუძლია იფიქროს უცხო ადამიანის კოცნაზე, ავტობუსში ასვლაზე ან ბავშვის სკოლაში გაშვებაზე? ვისღა შეუძლია რისკების გამოთვლის გარეშე იფიქროს ყოველდღიურ სიამოვნებაზე? რომელი ჩვენგანი არ არის ცრუ ეპიდემიოლოგი, ვიროლოგი, სტატისტიკოსი და წინასწარმეტყველი? რომელი მეცნიერი ან ექიმი არ ლოცულობს ფარულად სასწაულისთვის? რომელი მღვდელი არ ემორჩილება – ფარულად მაინც – მეცნიერებას? და თუნდაც ვირუსის გავრცელების ფონზე, ვინ არ ააღელვა დიდ ქალაქებში ჩიტების ჭიკჭიკის გაძლიერებულმა ხმამ, გადასასვლელებზე ფარშევანგების ცეკვამ და დადუმებულმა ზეცამ? მსოფლიოში ინფიცირებულთა რაოდენობამ მილიონს გადააჭარბა. დაღუპულია 50 ათასზე მეტი ადამიანი. შესაძლოა ასობით ათასი ან უფრო მეტი კიდევ დაინფიცირდეს. ვირუსი თავისუფლად გადაადგილდა სავაჭრო გზებთან და საერთაშორისო კაპიტალთან ერთად, და მისმა თანმხლებმა საშინელმა ავადმყოფობამ ადამიანები თავიანთ ქვეყნებში, ქალაქებსა და სახლებში გამოკეტა. თუმცა კაპიტალის მოძრაობისგან განსხვავებით, ეს ვირუსი გავრცელებისკენ ისწრაფვის და არა მოგებისკენ. მან გაუაზრებლად, გარკვეული დოზით დინებას მიმართულება შეუცვალა. მასხრად აიგდო საიმიგრაციო კონტროლი, ბიომეტრია, ციფრული კონტროლი და სხვა ნებისმიერი სახის მონაცემთა ანალიზი. ჯერჯერობით ყველაზე მეტად გავრცელდა მსოფლიოს ყველაზე მდიდარ, ძლიერ ქვეყნებში, მწყობრიდან გამოიყვანა კაპიტალიზმის ძრავა. შესაძლოა, დროებით, მაგრამ საკმაო დროით იმისთვის, რომ მისი ნაწილები შევისწავლოთ, რათა შევაფასოთ და გადავწყვიტოთ, მისი შეკეთება გვირჩევნია, თუ უკეთესი ძრავის ძიება. სამთავრობო პირები, რომლებიც პანდემიის მართვას ხელმძღვანელობენ, გატაცებით საუბრობენ ომზე. ისინი „ომს“ როგორც მეტაფორას კი არა, პირდაპირი გაგებით იყენებენ. და ეს მართლაც რომ ომი იყოს, ვინ მოემზადებოდა აშშ-ზე უკეთ? წინა ხაზის მებრძოლებს ნიღბებისა და ხელთათმანების ნაცვლად – იარაღები, „ჭკვიანი ბომბები“, ბუნკერის ასაფეთქებლები, წყალქვეშა ნავები, რეაქტიული გამანადგურებლები და ატომური ბომბები რომ სჭირდებოდეთ, იქნებოდა კი მათი დეფიციტი? ღამღამობით ნახევარი მსოფლიოს დაშორებით, ზოგიერთი ჩვენგანი ნიუ-იორკის გუბერნატორს გაუგებარი აღტაცებით უყურებს. თვალს ვადევნებთ სტატისტიკას და ვისმენთ ამბებს ამერიკის გადატვირთულ საავადმყოფოებზე, დაბალანაზღაურებად, მუშაობით გადამწვარ ექთნებზე, რომლებსაც ნიღბების ნაგვის ჩანთებისგან და ძველი საწვიმრებისგან დამზადება უწევთ, რომლებიც ყველაფერს რისკავენ ავადმყოფის დასახმარებლად. ვისმენთ ამბებს, როგორ ეცილებიან შტატები ერთმანეთს ვაჭრობაში სასუნთქი აპარატების მისაღებად; ვისმენთ ექიმების დილემის შესახებ, რომლებსაც უწევთ არჩევანი გააკეთონ, ვინ მიიღებს სასუნთქ აპარატს და ვის გაწირავენ სასიკვდილოდ. ჩვენ კი ჩვენთვის ვფიქრობთ, „ღმერთო ჩემო! ეს ამერიკაა!“ ტრაგედია არის უეცარი, ნამდვილი, მასშტაბური და ის ჩვენს თვალწინ იშლება. თუმცა ეს არ არის ახალი. ეს იმ მატარებლის მარცხია, წლების განმავლობაში რომ გზიდან ვარდებოდა. ვის აღარ ახსოვს ვიდეოები „გადაგდებულ პაციენტებზე“ – იმ ავადმყოფებზე, რომლებსაც ჯერ კიდევ საავადმყოფოს პერანგი ეცვათ, საჯდომი მოშიშვლებოდათ და რომლებსაც მალულად იშორებდნენ ქუჩის კუთხეში? საავადმყოფოების კარი ძალიან ხშირად დახურულა ამერიკის უიღბლო მოქალაქეებისთვის, მიუხედავად იმისა, რამდენად სერიოზული იყო მათი ავადმყოფობა ან როგორ იტანჯებოდნენ. ახლა მაინც აღარ ხდება ასე – რადგან ახლა, ვირუსის ხანაში ღარიბი ადამიანის ავადმყოფობამ შეიძლება მდიდრის ჯანმრთელობას ავნოს. და ახლა, ამ პერიოდშიც კი ბერნი სანდერსს, სენატორს, რომელიც საყოველთაო ჯანდაცვის ხისტ კამპანიას ეწეოდა, თავისსავე პარტიაშიც კი თეთრი სახლისთვის შეუფერებლად მიიჩნევენ. ჩემს ქვეყანაზე რაღა ვთქვა, ჩემს მდიდარ-ღარიბ ქვეყანაზე, ინდოეთზე – სადღაც ფეოდალიზმსა და რელიგიურ ფუნდამენტალიზმს, კასტურობასა და კაპიტალიზმს შორის გაჭედილზე, რომელსაც რადიკალი მემარჯვენე ინდუსი ნაციონალისტები მართავენ. დეკემბერში, სანამ ჩინეთი ვირუსს უჰანში ებრძოდა, ინდოეთის მთავრობას ასობით ათასი მოქალაქის საპროტესტო გამოსვლასთან უწევდა გამკლავება. მოქალაქეები მუსლიმთა წინააღმდეგ მიღებულ დისკრიმინაციულ კანონს აპროტესტებდნენ. COVID-19-ის პირველი შემთხვევა ინდოეთში 30 იანვარს დადასტურდა, დელი მხოლოდ რამდენიმე დღის შემდეგ დატოვა რესპუბლიკის დღის აღსანიშნავი აღლუმის საპატიო სტუმარმა, ამაზონის ტყის მშთანთქმელმა და COVID-ის უარმყოფელმა ჯაირ ბოლსონარომ [ბრაზილიის პრეზიდენტი]. თუმცა თებერვალში უამრავი საქმე იყო საიმისოდ, რომ მმართველი პარტიის დღის წესრიგში ვირუსის საკითხი დაეყენებინათ. თვის ბოლოს პრეზიდენტ დონალდ ტრამპის ვიზიტი იყო დაგეგმილი. ის მიიტყუეს იმ დაპირებით, რომ გუჯარათის შტატის სპორტულ მოედანზე მილიონიან აუდიტორიას დაახვედრებდნენ. ამ ყველაფერმა ბევრი დრო და ფული წაიღო. შემდეგ იყო დელის საკანონმდებლო ასამბლეის არჩევნები, რომელშიც პარტია ბჰარატია ჯანატა („ხალხის პარტია“) დამარცხებისთვის იყო განწირული, ძალისხმევის გაორმაგების მიუხედავად – მავნე, ყველაფრის მკადრებელი ინდუსნაციონალისტური კამპანიით. ეს კამპანია ფიზიკური ძალადობისა და „მოღალატეების“ ამოხოცვის მუქარით იყო გაჯერებული. ისინი მაინც დამარცხდნენ [ბჰარატია ჯანატა მეორე ადგილზე გავიდა]. ამიტომ ამ დამცირებაში ბრალდებული მუსლიმები უნდა დაესაჯათ. შეიარაღებული ინდუსი ვიჯილანტების ბრბომ დელიში, მუშათა კლასის დასახლებაში მცხოვრებ მუსლიმებს შეუტია. მათ პოლიციაც უმაგრებდა ზურგს. გადაწვეს სახლები, მაღაზიები, მეჩეთები და სკოლები. საპასუხოდ იმ მუსლიმებმაც შეუტიეს, რომლებიც ამბის ასეთ განვითარებას ელოდნენ. დაიღუპა 50-ზე მეტი ადამიანი. ათასობით ადამიანი ადგილობრივ სასაფლაოებზე მდებარე დევნილთა ბანაკებში გადასახლდა. ჯერ კიდევ დასახიჩრებული გვამებისგან ბინძურ, მყრალ საკანალიზაციო ქსელს ასუფთავებდნენ, როდესაც მთავრობის წევრებმა პირველი შეხვედრა გამართეს COVID-ის შესახებ და ინდოელთა უმეტესობამ პირველად გაიგო „ხელის სანიტაიზერის“ შესახებ. მარტის თვეც დატვირთული იყო. პირველი ორი კვირა დაეთმო ცენტრალურ შტატში, მადჰია-პრადეშში მთავრობის კონგრესს და „ხალხის პარტიის“ მთავრობის დანიშვნას. 11 მარტს ჯანდაცვის მსოფლიო ორგანიზაციამ COVID-19 პანდემიად გამოაცხადა. ორი დღის შემდეგ, 13 მარტს ჯანდაცვის მინისტრმა კი განაცხადა, რომ კორონა „ჯანმრთელობისთვის არ არის საგანგაშო“. საბოლოოდ, 19 მარტს ინდოეთის პრემიერ-მინისტრმა ერს მიმართა. ბევრი არ უვარჯიშია. მან უბრალოდ საფრანგეთისა და იტალიის სტრატეგიები მიითვისა. გაგვაფრთხილა „სოციალური დისტანცირების“ საჭიროებაზე (ეს მარტივი გასაგებია საზოგადოებისთვის, რომელიც ასე ღრმად არის ჩაფლული კასტურ წყობაში) და 22 მარტიდან კომენდანტის საათი გამოაცხადა. არაფერი უთქვამს იმაზე, თუ რის გაკეთებას აპირებდა მთავრობა კრიზისის დროს, თუმცა ხალხს სთხოვა, გამოსულიყვნენ აივნებზე და ჯანდაცვის მუშაკებთან მისასალმებლად ქვაბებსა და ტაფებზე დაეკრათ. პრემიერ-მინისტრს იმ დრომდე არც კი ეხსენებინა, ინდოეთი რომ კვლავ ეწეოდა დამცავი და სასუნთქი აღჭუღვილობების ექსპორტს. ნაცვლად იმისა, რომ ეს აღჭურვილობა საავადმყოფოებისა და სამედიცინო პერსონალისთვის შემოენახათ. გასაკვირი არც იყო, ნარენდა მოდის [პრემიერ-მინისტრის] წინადადებას დიდი ენთუზიაზმით რომ შეხვდნენ. ურტყამდნენ ქვაბებს, ცეკვავდნენ და აწყობდნენ პროცესიებს. მთლად სოციალური დისტანცირებაც არ გამოვიდა. მომდევნო დღეებში კი კაცი წმინდა ძროხის ნაკელის გროვაში ჩახტა, ხოლო „ხალხის პარტიის“ მხარდამჭერებმა ძროხის შარდის სმის წვეულებები გამართეს. ობიექტურობისთვის ისიც უნდა ითქვას, რომ ბევრმა მუსლიმურმა ორგანიზაციამ გამოაცხადა, რომ ყოვლისშემძლე [ღმერთი] იყო პასუხი ვირუსისთვის და მორწმუნეებს მეჩეთებში შეკრებისკენ მოუწოდა. 24 მარტს, საღამოს 8 საათზე მოდი ტელეკრანზე ისევ გამოჩნდა და გამოაცხადა, რომ შუაღამის შემდეგ მთელი ინდოეთი მკაცრი თვითიზოლაციის რეჟიმზე გადაერთვებოდა. მისივე თქმით, იზღუდებოდა კერძო და საზოგადოებრივი ტრანსპორტის გადაადგილება. ისიც დასძინა, რომ ამ გადაწყვეტილებას იღებდა არა როგორც პრემიერ-მინისტრი, არამედ როგორც ჩვენი ოჯახის უხუცესი. ვის შეუძლია გადაწყვიტოს, რომ 1.38-მილიარდიანი სრულიად მოუმზადებელი მოსახლეობა თვითიზოლაზიაში გადავიდეს? თან ისე, რომ ამის შესახებ 4 საათით ადრე ატყობინებ. მან ეს მთავრობასთან შეუთანხმებლად გადაწყვიტა, მთავრობას კი ამ გადაწყვეტილების საზიანო შედეგებთან გამკლავება მოუწევს. ინდოეთის პრემიერ-მინისტრი მოქალაქეებს მოიაზრებს მტრულ ძალად, რომელსაც თავს მოულოდნელად უნდა დაესხა და არასდროს ენდო – მისი მეთოდები სწორედ ასეთ შთაბეჭდილებას ტოვებს. და ვიყავით თვითიზოლაციაში. ჯანდაცვის ბევრი სპეციალისტი და ეპიდემიოლოგი ამ ნაბიჯს მიესალმა. შეიძლება, ისინი თეორიულად მართლები არიან. თუმცა, ცხადია, არცერთ მათგანს არ შეუძლია მხარი დაუჭიროს დამღუპველ რამეს – გეგმის არქონას. ან მზაობას, ანუ მსოფლიოს ყველაზე დიდ, სადამსჯელო იზოლაციას, რომელიც ბოლოს დასახული მიზნების სრულიად საპირისპირო მოვლენად იქცა. კაცმა, რომელსაც სეირის ყურება უყვარს, თვითონვე შექმნა ყველა სეირის სეირი. სანამ შეშფოთებული მსოფლიო აკვირდებოდა, ინდოეთმა ყველა თავისი სირცხვილი გამოააშკარავა – სისასტიკე, სტრუქტურულობა, სოციალური და ეკონომიკური უთანასწორობა, გაუხეშებული ინდიფერენტულობა ტანჯვის მიმართ. იზოლაციამ იმ ქიმიური ექსპერიმენტივით იმუშავა, დამალულ ნივთიერებებს რომ ამჟღავნებს. მაღაზიების, რესტორნებისა და სამშენებლო ინდუსტრიის დახურვასთან ერთად, მდიდარი და საშუალო კლასი გალავანშემორტყმულ დასახლებებში გამოიკეტა. ჩვენმა ქალაქებმა და მეგაქალაქებმა კი მუშათა კლასის თავიდან მოცილება დაიწყო. მიგრანტ მუშებს წანაზარდებივით იშორებდნენ. ბევრი მათგანი დამსაქმებელმა ან მიწათმფლობელმა გაიყვანა ქალაქიდან. ხოლო რადგანაც საზოგადოებრივი ტრანსპორტი არსად ჩანდა, საკუთარ სოფლებამდე ფეხით მსვლელობა დაიწყო მილიონობით ღატაკმა, მშიერმა, მწყურვალმა, ახალგაზრდამ და მოხუცმა, კაცმა, ქალმა, ბავშვმა, სნეულმა, შეზღუდული შესაძლებლობის მქონემ, მათ, ვისაც წასასვლელი აღარსად ჰქონდა. ისინი დღეების განმავლობაში მიაბიჯებდნენ ასობით კილომეტრით დაშორებულ ბადაუნისკენ, აგრასკენ, აზამგარჰისკენ, ალიგარჰისკენ, ლუქნავისკენ, გორაკჰპურისკენ. ზოგიერთი მათგანი გზაში დაიღუპა. მათ იცოდნენ, რომ შინ ბრუნდებოდნენ, რათა შიმშილი დაეოკებინათ. ალბათ ისიც იცოდნენ, რომ შეიძლებოდა ვირუსის გადამტანი ყოფილიყვნენ და ოჯახის წევრებისთვის, მშობლებისა და ბებია-ბაბუებისთვის გადაედოთ. თუმცა მათ საშინლად სჭირდებოდათ სიახლოვის ნამცეცი, საკვებივით სჭირდებოდათ – თუ სიყვარულივით არა – თავშესაფარი და ღირსების გრძნობა. სანამ მიდიოდნენ, ზოგიერთს კომენდანტის საათის წესების დარღვევის გამო სასტიკად უსწორდებოდა და ამცირებდა პოლიცია. ბიჭებს ქუჩაში ხტუნვასა და ბუქნების გაკეთებას აიძულებდნენ. ქალაქ ბარელისთან კი ადამიანები შეაჯგუფეს და ქიმიური სპრეი გადაასხეს. რამდენიმე დღის შემდეგ მთავრობამ ვირუსის გავრცელების შიშით შტატების შესასვლელები ქვეითებისთვისაც ჩაკეტა. ადამიანები, რომლებიც დღეების განმავლობაში სახლებისკენ მიიწევდნენ, შეაჩერეს და აიძულეს ქალაქების იმ ბანაკებში დაბრუნებულიყვნენ, საიდანაც ასევე იძულებით წამოვიდნენ. ხანდაზმულებს 1947 წლის გადასახლების მოგონებები გაუცოცხლდათ, როდესაც ინდოეთი გაიხლიჩა და პაკისტანი დაიბადა. ოღონდ იმ განსხვავებით, რომ ახლანდელი გამოსვლა [ბიბლ.] არა რელიგიამ, არამედ კლასობრივმა დაყოფამ განაპირობა. თუმცა ისინი ინდოეთის უღარიბეს ადამიანებს არ წარმოადგენდნენ. მათ სამსახური მაინც ჰქონდათ (აქამდე მაინც) ქალაქში და სახლი, სადაც დაბრუნდებოდნენ. უსამსახურონი, უსახლკარონი და უიმედონი ისევ იქ რჩებოდნენ, სადაც აქამდე იყვნენ – ქალაქებსა თუ სოფლებში, სადაც დიდ გაჭირვებას ამ ტრაგედიამდე კარგა ხნით ადრე ჰქონდა ფესვი გადგმული. ამ კოშმარული დღეების მიუხედავად, შინაგან საქმეთა მინისტრი ამიტ შაჰი საჯაროდ მაინც არ გამოჩენილა. როცა დელიში მსვლელობა დაიწყო, ღაზიპურამდე მისასვლელად იმ ჟურნალის პრესბარათი გამოვიყენე, რომლისთვისაც რეგულარულად ვწერ. ბიბლიური სცენა იყო. ან შეიძლება არც იყო. ბიბლია ვერ წარმოიდგენდა ადამიანების ასეთ სიმრავლეს. ფიზიკური დისტანცირების მიზნით გამოცხადებულმა თვითიზოლაციამ საპირისპირო შედეგი გამოიღო – წარმოუდგენელი მასშტაბის ფიზიკური სიმჭიდროვე. ინდოეთის ქალაქებშიც კი ეს არის სინამდვილე. მთავარი ქუჩები შეიძლება ცარიელი იყოს, მაგრამ ღარიბები გამოკეტილნი არიან ბარაკებში, ჯურღმულებსა და ქოხმახებში. მსვლელობაში მონაწილეთაგან ვისაც ვესაუბრე, ყველა ღელავდა ვირუსის გამო. თუმცა ის ამ ადამიანების ცხოვრებაში ნაკლებად რეალური, ნაკლებად ხელშესახები იყო, განსხვავებით მოსალოდნელი უმუშევრობისგან, შიმშილისა და პოლიციის ძალადობისგან. ყველა იმ ადამიანს შორის, ვისაც გავესაუბრე (მათ შორის ერთი კვირით ადრე ანტიისლამურ თავდასხმებს გადარჩენილ მუსლიმი მკერავების ჯგუფს), ერთი კაცის სიტყვებმა განსაკუთრებით ამაღელვა. ის დურგალი იყო, მარჯიტი ერქვა და გორახპურამდე, ნეპალის საზღვრის მახლობლად განეზრახა მისვლა. „იქნებ, როცა ბატონი მოდი ამ გადაწყვეტილებას იღებდა, ჩვენ შესახებ არვინ არაფერი უთხრა. იქნებ მან ჩვენზე არ იცის?“, – თქვა მან. ეს „ჩვენ“ დაახლოებით 460 მილიონი ადამიანია. შტატების ადგილობრივმა მთავრობებმა (აშშ-ის მსგავსად) მეტი გულისხმიერება გამოიჩინეს კრიზისის დროს. სავაჭრო გაერთიანებები, კერძო პირები და სხვადასხვა კოლექტივი საკვებსა და განსაკუთრებით საჭირო პროდუქტებს არიგებდნენ. ცენტრალური მთავრობა კი აუჩქარებლად პასუხობდა ადგილობრივ ხელისუფლებათა სასოწარკვეთილ თხოვნებს ფულად სახსრებზე. ირკვევა, რომ პრემიერ-მინისტრის დახმარების ეროვნულ ფონდს არ გააჩნია ხელმისაწვდომი მზა თანხა. ამის ნაცვლად, კეთილისმსურველთა ფული როგორღაც ახალ ამოუცნობ ფონდში PM-CARES-ში გადაუტანიათ. წინასწარ შეფუთულმა საკვებმაც დაიწყო გამოჩენა, შეფუთვებზე პრემიერ-მინისტრის სახე იყო გამოსახული. ამ ყველაფერთან ერთად, პრემიერ-მინისტრმა იოგა ნიდრას ვიდეო გამოაქვეყნა. ვიდეოში კომპიუტერული ანიმაციით შექმნილი, საოცნებო სხეულის მქონე თავისივე პროტოტიპი იოგას მოძრაობებს ასრულებს, რათა ხალხს თვითიზოლაციის სტრესთან გამკლავებაში დაეხმაროს. ნარცისიზმი ძალზედ შემაწუხებელია. შეიძლება, ერთ-ერთი ასანა [იოგას პოზა] სათხოვარი ასანა იყოს, რომლის მეშვეობითაც პრემიერი მოდი საფრანგეთის პრემიერ-მინისტრს სთხოვს: დაგვრთოს ნება, რომ დავარღვიოთ ის პრობლემური შეთანხმება Rafale-ის რეაქტიულ გამანადგურებლებზე [ინდოეთის მთავრობამ საფრანგეთისგან 7,8 მილიარდ ევროდ 36 ახალი საბრძოლო ხომალდი შეისყიდა] და ის 7,8 მილიარდი ევრო სასიცოცხლოდ მნიშვნელოვან საგანგებო ღონისძიებებს მოვახმაროთ მილიონობით მშიერი ადამიანის დასახმარებლად. ფრანგებიც უეჭველად გაგვიგებენ. თვითიზოლაციის მეორე კვირას მომარაგების ჯაჭვი წყდება, წამლები და განსაკუთრებული მნიშვნელობის მარაგები თავდება. ათასობით სატვირთოს მძღოლი ცოტაოდენი საკვებითა და წყლით შუა გზაშია მიტოვებული. მოსამკელად გამზადებული თავთავები ნელ-ნელა ლპება. დგას ეკონომიკური კრიზისი. მიმდინარეობს პოლიტიკური კრიზისი. კორონავირუსის ამბავი მეინსტრიმულმა მედიამ ერთხმად გადააქცია 24-საათიან, ტოქსიკურ ანტიმუსლიმურ კამპანიად. „სუპერგამავრცელებელი“ აღმოჩნდა ორგანიზაცია Tablighi Jamaat. ისინი ინფორმაციას მუსლიმთა სტიგმატიზებისა და დემონიზების მიზნით ავრცელებდნენ. ზოგადი რიტორიკა კი ისეთი იყო, თითქოს მუსლიმებმა შექმნეს ვირუსი და გაავრცელეს, როგორც ჯიჰადის ფორმა. Covid-ის კრიზისი ჯერ კიდევ წინ არის. ან არ არის. არ ვიცით. თუ/როდესაც ეს კრიზისი დადგება, შეგვიძლია დარწმუნებულნი ვიყოთ, რომ არსებული ცუდი წინასწარგანწყობები რელიგიის, კასტისა და კლასის მიმართ კიდევ უფრო გამძაფრდება. დღეს (2 აპრილს) ინდოეთში კორონავირუსის თითქმის 2 000 დადასტურებული შემთხვევა და 58 გარდაცვლილია. ცხადია, ეს მონაცემები სანდო არც არის, რადგან ის, სამწუხაროდ, ტესტების უმნიშვნელო რაოდენობას ემყარება. ექსპერტთა მოსაზრებები ერთმანეთს არ ემთხვევა. ზოგიერთი მილიონობით ინფიცირებულს წინასწარმეტყველებს. სხვები ფიქრობენ, რომ დანაკარგი გაცილებით ნაკლები იქნება. ჩვენ შეიძლება ვერასდროს დავინახოთ კრიზისის კონტურები, მაშინაც კი, როცა ჩვენ შემოგვიტევს. რაც ვიცით, ის არის, რომ ჯერ საავადმყოფოებზე მოთხოვნა არ გაზრდილა. ინდოეთის სახელმწიფო ჰოსპიტლები და კლინიკები ვერ უმკლავდებიან მილიონამდე ბავშვს, რომლებიც ყოველწლიურად იღუპებიან დიარეის, საკვების უკმარისობისა და ჯანმრთელობის სხვა პრობლემების გამო. ვერ უმკლავდებიან ტუბერკულიოზით დაავადებულ ასობით ათას პაციენტს (მსოფლიოში დაავადებულთა მეოთხედი), ანემიურ და კვების უკმარისობით დასუსტებულ პოპულაციას, რომლისთვისაც ნებისმიერი ავადმყოფობა შეიძლება ფატალური აღმოჩნდეს – აქ ისეთ კრიზისს ვერ გაუმკლავდებიან, როგორიც ამერიკასა და ევროპაშია. მთელი ჯანდაცვა მეტ-ნაკლებად შეჩერებულია, რადგან საავადმყოფოები ვირუსთან ბრძოლაზე გადაერთნენ. ინდოეთის სამედიცინო დისციპლინების ლეგენდარული ინსტიტუტის ტრავმის ცენტრი დახურულია. კიბოთი დაავადებული ასობით პაციენტი კი, რომლებიც საავადმყოფოს გზებზე ცხოვრობენ, ნახირივით გაფანტულა. მათ „კიბოს დევნილების“ სახელით იცნობენ. ადამიანები დაავადდებიან და სახლებში დაიხოცებიან. ჩვენ მათი ამბავი შეიძლება ვერასოდეს გავიგოთ. ისინი შეიძლება სტატისტიკადაც კი ვერ იქცნენ. ჩვენ მხოლოდ იმედიღა გვრჩება, რომ ის მკვლევრები, რომელთა აზრითაც, ვირუსს ცივი ამინდი მოსწონს, არ ცდებიან (თუმცა სხვა მკვლევრებს ამაში ეჭვი ეპარებათ). ასე ძლიერად, ასე ირაციონალურად ხალხს არასოდეს უნატრია მწველი, სასტიკი ინდური ზაფხული. რა არის ეს, რაც ჩვენ დაგვემართა? კი, ვირუსია. მას არ გააჩნია მორალური ღირებულება. თუმცა ის ნამდვილად ვირუსზე მეტია. ზოგიერთს სწამს, რომ ეს უფლის გზაა ჩვენს აზრზე მოსაყვანად. ზოგიერთის აზრით, ეს ჩინური კონსპირაციაა, რათა მსოფლიოზე ბატონობა შეძლონ. #პოლიტიკა #პანდემია #კრიზისი

მოსკოვსა და რუსეთის სხვა დიდ ქალაქებში სასაფლაოებზე სააღდგომოდ გასვლა აიკრძალა. ამის შესახებ მოსკოვის მერმა სერგეი სობიანინმა განაცხადა. მისი თქმით, საფლავებზე მისვლა მოქალაქეებს მხოლოდ დაკრძალვის ცერემონიის გამო შეეძლებათ, ისიც შეზღუდული რაოდენობით, სხვა შემთხვევაში საფლავებზე გასვლა იკრძალება. მერის თქმით, ჩვეულებრივ აღდგომის დღესასწაულის კვირაში საფლავებზე მილიონობით ადამიანი გადის, რაც ახლა საფრთხის შემცველია. ”სამწუხაროდ, ამ გაზაფხულზე შეუძლებელი იქნება ამის გაკეთება“, - აღნიშნა მერმა. ამასთან, აღდგომის დღეებში საფლავებზე გასვლის აკრძალვას მხარს უჭერს რუსეთის მართლმადიდებლური ეკლესიაც. საპატრიარქოს პრესსამსახურში აცხადებენ, რომ გადაწყვეტილება გონივრულია. მათივე თქმით, საფლავებზე არგასვლა არც გარდაცვლილთა ხსოვნას შეურაცხყოფს და არც ცოდვად არ ითვლება.#russia #covid19 #stopcovid #coronaviruss

დილიდან, 27 აპრილიდან, დაშვებულია მსუბუქი ავტოსატრანსპორტო საშუალებებით გადაადგილება, ასევე ტაქსების ოპერირება; სრულად დაშვებულია ონლაინვაჭრობა (საბითუმო და საცალო), მიტანის მომსახურება ნებისმიერ პროდუქტზე და ღია ტიპის აგრარული ბაზრების საქმიანობა, - ამის შესახებ საქართველოს პრემიერ-მინისტრის პრესსპიკერმა, ირაკლი ჩიქოვანმა განაცხადა. პრემიერის პრესსპიკერმა განმარტა, რომ აღნიშნული შეზღუდვები მოიხსნება მთელი ქვეყნის მასშტაბით, გარდა იმ მუნიციპალიტეტებისა და ადმინისტრაციული ერთეულებისა, სადაც დაწესებულია მკაცრი საკარანტინო შეზღუდვები. „როგორც ცნობილია, მთავრობამ საგანგებო მდგომარეობით დაწესებული აკრძალვების შემსუბუქების ეტაპებად გაწერილი გეგმა შეიმუშავა, რომელიც პრემიერ-მინისტრმა პარასკევს წარადგინა; აღნიშნული გეგმის შესაბამისად, ღონისძიებების შემსუბუქებისა და ეკონომიკის გახსნის პირველი ეტაპი 27 აპრილიდან ამოქმედდება. ეს ნიშნავს იმას, რომ 27 აპრილიდან დაშვებულია მსუბუქი ავტოსატრანსპორტო საშუალებებით გადაადგილება, ასევე ტაქსების ოპერირება, სრულად დაშვებულია ონლაინ ვაჭრობა (საბითუმო და საცალო), მიტანის მომსახურება ნებისმიერ პროდუქტზე და ღია ტიპის აგრარული ბაზრების საქმიანობა. აღნიშნული შეზღუდვები მოიხსნება მთელი ქვეყნის მასშტაბით, გარდა იმ მუნიციპალიტეტებისა და ადმინისტრაციული ერთეულებისა, სადაც დაწესებულია მკაცრი საკარანტინო შეზღუდვები. ამასთან, ხაზგასმით აღსანიშნავია, რომ ეს ყველაფერი ეხება იმ კომპანიებს, დაწესებულებებს და ობიექტებს, რომლებიც აკმაყოფილებენ ჯანდაცვის სამინისტროს მიერ შემუშავებულ წესებს“, - განაცხადა ირაკლი ჩიქოვანმა. ამასთანავე, როგორც ცნობილია, 15 აპრილის 21:00 საათიდან აკრძალულია თბილისში, რუსთავში, ბათუმში და ქუთაისში შესვლა და ამ ქალაქებიდან გასვლა საგანგებო მდგომარეობის მოქმედების ვადით. თუმცა, 27 და 28 აპრილს, საგამონაკლისო წესით, დასაშვებია აღნიშნულ დიდ ქალაქებში შესვლა და ამ ქალაქებიდან გასვლა მხოლოდ ფაქტობრივ საცხოვრებელ მისამართზე დაბრუნების მიზნით. ამასთან, ირაკლი ჩიქოვანმა აღნიშნა, რომ ეპიდემიოლოგიური ვითარების ანალიზის საფუძველზე, შესაძლოა, ხელახლა დაწესდეს მოხსნილი შეზღუდვები, ასევე ყოველი შემდგომი ეტაპის ამოქმედების ვადა გადაიხედოს. „27 და 28 აპრილს, საგამონაკლისო წესით, დასაშვებია აღნიშნულ დიდ ქალაქებში შესვლა და ამ ქალაქებიდან გასვლა ფაქტობრივ საცხოვრებელ მისამართზე დაბრუნების მიზნით და არა სხვა მიზნებით, ხაზს ვუსვამ - მხოლოდ ფაქტობრივ მისამართზე დაბრუნების მიზნით. აქვე უნდა აღვნიშნოთ, რომ ამ ქალაქებში შესვლა და გასვლა, რეგისტრირებულ, იურიდიულ მისამართზე დაბრუნების მიზნით, მოქმედი რეგულაციის მიხედვით, შესაძლებელია ნებისმიერ დროს. საგანგებო მდგომარეობის ფარგლებში დაწესებული ყველა სხვა შეზღუდვა ძალაში რჩება. მათ შორის, ძალაში რჩება კომენდანტის საათის მოქმედება 21:00 საათიდან 06:00 საათამდე. ამასთან, კვლავ გვსურს განვაცხადოთ, რომ ეპიდემიოლოგიური ვითარების ანალიზის საფუძველზე შესაძლოა მოხდეს როგორც მოხსნილი შეზღუდვების ხელახლა დაწესება, ასევე ყოველი შემდგომი ეტაპის ამოქმედების ვადის გადახედვა“, - აღნიშნა ირაკლი ჩიქოვანმა.#StopCoV #COVID19

ჩინეთსა და ინდოეთს შორის არსებულ სადავო ტერიტორიაზე წამოწყებული დაპირისპირება ძალადობრივ შეტაკებებში გადაიზარდა, რასაც სულ მცირე 20 ინდოელი ჯარისკაცის სიცოცხლე ემსხვერპლა. ჩინეთის მხარეს არსებულ დანაკარგებზე ინფორმაცია ჯერჯერობით არ არსებობს. აზიის ორ რეგინალურ ძალას შორის, რომელთაც დემარკაცია/დელიმიტაციის გარეშე არსებული 3500 კმ-იანი სახმელეთო საზღვარი აკავშირებთ, დაძაბული გარემო საკმაოდ ხშირად წარმოიშობა. ჩინეთი და ინდოეთი ძირითადად იმ ტერიტორიების დაკავებას ცდილობენ, რომელიც დაუსახლებელია. ორშაბათს, 15 ივნისს მომხდარი დაპირისპირება 1975 წლის შემდეგ იყო პირველი, როდესაც შეტაკებებს ჯარისკაცების სიცოცხლე ემსხვერპლა. პირველი შეტაკება 1962 წელს დაფიქსირდა, მაგრამ ინციდენტების რიცხვი ბოლო წლებში მნიშვნელოვნად გაიზარდა. ორ ბირთვულ სახელმწიფოს შორის ბოლო დაპირისპირება მიმდინარე წლის მაისის თვეში, ტიბეტის მოსაზღვრედ, ინდოეთის კუთვნილ ლადახის (Ladakh) რეგიონში წარმოიშვა. ინდოეთის ოფიციალური პირების განცხადებით, ჩინელმა სამხედროებმა საზღვარი სამ სხვადასხვა წერტილში გადალახეს, რის შემდეგაც ტერიტორიის დაკავების მიზნით კარვები გაშალეს და დადგენილ პოზიციებზე გუშაგები განალაგეს. 9 მაისს სიკიმის (Sikkim) შტატის მაღალმთიან სასაზღვრო ზოლზე, რამდენიმე ჩინელი და ინდოელი ჯარისკაცი დაშავდა მათ შორის მომხდარი ხელჩართული დაპირისპირებისას. ოფიციალური დელის განცხადებით, ჩინური დანაყოფები, ლადახის რეგიონში, რამდენიმე დღის მანძილზე არღვევდნენ სასაზღვრო ზოლს, რის შემდეგაც ინდოეთმა ამ ტერიტორიაზე დამატებითი სამხედრო ძალების გადაწყვეტილება მიიღო. დაძაბული ფონის შესამსუბუქებლად, მხარეებმა გასულ კვირას ჩინეთის დე-ფაქტო კონტროლის ქვეშ არსებულ ე.წ. მალდოს (Maldo) სასაზღვრო პუნქტზე მოლაპარაკებები გამართეს. ამავდროულად, ინდოეთის საგარეო საქმეთა სამინისტროში განაცხადეს, რომ სასაზღვრო რაიონებში მშვიდობისა და სტაბილურობის უზრუნველსაყოფად, მხარეები ყველანაირ სამხედრო და დიპლომატიურ არხებს იყენებენ. აქვე, ოფიციალურმა პეკინმაც დაახლოებით ანალოგიური განაცხადა და აღნიშნა, რომ მათ მიაღწიეს „პოზიტიურ კონსესუსს“ საზღვარზე არსებული დაძაბულობის განსამუხტად. რეალურად მოლაპარაკებები არანაირი შედეგის მომტანი აღმოჩნდა. ინდური საინფორმაციო სააგენტოების მიხედვით, გასულ კვირას ინდოეთის არმიამ ჩინეთის „სახალხო განმანთავისუფლებელ არმიას“ დაუთმო კონკრეტული ტერიტორიები - პანგონის (Pangong) ტბის ჩრდილოეთი მხარე და სტრატეგიული მნიშვნელობის მდინარე გალვანის (Galwan) ხეობა. შეტეკებების დროს დაღუპულთა შესახებ ინფორმაციის გავრცელების შემდეგ, ჩინეთის საგარეო უწყების ოფიციალური წარმომადგენლის ჟაო ლი ჯიანის განცხადებით, ინდურმა დანაყოფებმა ორჯერ გადაკვეთეს სასაზღვრო ზოლი, რის შემდეგაც მოახდინეს ჩინელი სამხედროების პროვოცირება, რამაც „მნიშვნელოვანი ფიზიკური კონფრონტაცია“ გამოიწვია. მსოფლიოს ორ ყველაზე მრავალრიცხოვან და ამავდროულად ბირთვულ სახელმწიფოს შორის დაპირისპირება თითქმის 40 წელს ითვლის. ქვემოთ მოცემულია ამ თემასთან დაკავშირებული რამდენიმე მნიშვნელოვანი თარიღი: ნერუს ვიზიტი პეკინში 1959 წელს ინდოეთის ხელისუფლებამ ჩინეთთან არსებული სასაზღვრო დავა მემკვიდრეობით ბრიტანელი კოლონიზატორი მმართველებისგან მიიღო, რომლებმაც 1914 წელს, საზღვრების დადგენის მიზნით, ტიბეტისა და ჩინეთის მთავრობებთან კონფერენცია გამართეს. ოფიციალურ პეკინს არასდროს უღიარებია 1914 წელს დადგენილი საზღვრები (ცნობილი როგორც “McMahon Line”) და დღემდე პრეტენზიას აცხადებს 90 000 კვ/კმ-ის ტერიტორიაზე - ფაქტიურად რასაც ინდოეთის შტატი არუნაჩალ-პრადეში (Arunachal Pradesh) წარმოადგენს. ზემოხსენებულ სასაზღვრო დავასთან არსებულ პირველ მნიშვნელოვან თარიღს, 1959 წელს, ინდოეთის იმჟამინდელი პრემიერ-მინისტრის ჯავაჰარიალ ნერუს (Jawaharial Nehru) პეკინში ვიზიტი წარმოადგენს. ნერუმ ეჭვქვეშ დააყენა ჩინეთის ოფიციალურ რუქებზე მითითებული საზღვრები, რითაც ჩინეთის პრემიერი ჟოუ ენლაი აიძულა გამოეთქვა აზრი, რომ ოფიციალური პეკინი კოლონიურ საზღვარს არ ეთანხმებოდა. 1962 წლის ჩინეთ-ინდოეთის ომი 1962 წელს, საზღვრების დემარკაციის პროცესში, ჩინურმა დანაყოფებმა სადავო ტერიტორია გადაკვეთეს. აღნიშნულმა ოთხკვირიანი ომი გამოიწვია, რასაც ინდოეთის მხარეს ათასობით ადამიანის დაღუპვა მოჰყვა. ომის შემდეგ, ჩინეთმა გაიყვანა თავის დანაყოფები, მაგრამ შეინარჩუნა ტიბეტსა და დასავლეთ ჩინეთს შორის დამაკავშირებელი ე.წ. აქსაი ჩინის (Aksai Chin) სტრატეგიული მნიშვნელობის დერეფანი. ინდოეთი დღემდე აცხადებს პრეტენზიას ზემოთ აღნიშნულ დერეფანზე, ისევე როგორც ჩრდილოეთ ქაშმირში, ჩინეთის მიერ კონტროლირებად შაქსგამის (Shaksgam) ხეობაზე. 1967 წლის „ნათუ ლას“ კონფლიქტი მხარეთა შორის კიდევ ერთი გადაკვეთის წერტილი სასაზღვრო-გამშვები პუნქტი „ნათუ ლა“ (Nathu La) აღმოჩნდა, რომელიც ბუტანს, ტიბეტსა და ნეპალს შორის მოქცეულ უღელტეხილზე მდებარეობს. წარმოშობილი კონფლიქტის შემდეგ, ოფიციალურმა დელიმ განაცხადა, რომ შეტაკებებს 80 ინდოელის და კიდევ 400 ჩინელი სამხედროს სიცოცხლე ემსხვერპლა. 1975 წლის „ტულუნ ლას ჩასაფრება“ აღნიშნული შეტაკება იყო უკანასკნელი, სადაც, არსებული საზღვრის გასწვრივ ცეცხლსასროლი იარაღი იქნა გამოყენებული. 4 ინდოელ ჯარისკაცს ჩასაფრება მოუწყვეს და მათი ლიკვიდაცია განახორციელეს. ინდოეთმა ჩინეთი დაადანაშაულა სასაზღვრო კონტროლის დარღვევასა და ტერიტორიაზე შეჭრაში, რაც ოფიციალურმა პეკინმა უარყო. 2017 წლის ინციდენტი აღნიშნულ წელს, ორ სახელმწიფოს შორის მას შემდეგ დაიძაბა ვითარება, რაც ბუტანის სიახლოვეს არსებულ დოქლამის (Doklam) პლატოზე, ჩინეთის ხელისუფლებამ ავტომაგისტრალის მშენებლობა დაიწყო. ინდოეთის მთავრობამ მშენებლობის შესაჩერებლად სამხედრო ძალებიც გაგზავნა. „დოქლამის პლატოს“ სტრატეგიული მნიშვნელობა აქვს გამომდინარე იქიდან, რომ არის ე.წ. ვიწრო გასასვლელი, რომელიც ინდოეთის ჩრდილოეთ შტატებს ქვეყნის დანარჩენ ნაწილთან აკავშირებს. საკითხი მოლაპარაკებების შემდეგ მოგვარდა. მომზადებულია რატი ერისთავის მიერ. #China #India #borders #clash #conflict#ახალიამბები #პოლიტიკა

რა მოხდებოდა იმ შემთხვევაში, თუკი კორონავირუსის პანდემიისას სახელმწიფოები საზღვრებს არ ჩაკეტავდნენ და კარანტინს არ გამოაცხადებდნენ - მკვლელვარების განცხადებით ასეთ შემთხვევაში COVID-19-ით მილიარდამდე დამიანი დაინფიცირდებოდა. ბერკლის კალიფორნიის უნივერსიტეტის გლობალური პოლიტიკის ლაბორატორიის მკვლევრებმა ის 1,700-ზე მეტი საპრევენციო ზომა გააანალიზეს, რომელიც ექვსმა ქვეყანამ, აშშ-მ, ჩინეთმა, სამხრეთ კორეამ, იტალიამ, საფრანგეთმა და ირანმა, ბოლო რამდენიმე თვის განმავლობაში მიიღეს. შესწავლილ შეზღუდვებს შორის იყო მოგზაურობის აკრძალვა, სკოლების დახურვა, რელიგიური ცერემონიების შეჩერება, ღონისძიებების გაუქმება და თვითიზოლირება. მეცნიერებმა გამოითვალეს, რომ აშშ-ში მოქალაქეთა გადაადგილებისა და კონტაქტის ყოველგვარი შეზღუდვის გარეშე ინფიცირებულთა რაოდენობა 3 მარტიდან 6 აპრილამდე თითქმის ყოველ ორ დღეში გაორმაგდებოდა. ეს იმას ნიშნავს, რომ დღეისთვის ქვეყანაში 60 მილიონზე მეტი დაავადებული შეიძლებოდა ყოფილიყო (აშშ-ში ამ დროისთვის 2 მილიონზე მეტი შემთხვევაა აღრიცხული). საკარანტინო ზომები ჩინეთში კიდევ უფრო წარმატებული აღმოჩნდა. მკვლევრებმა აღმოაჩინეს, რომ ქვეყანაში 16 იანვრიდან 5 მარტამდე მიღებულმა ზომებმა 285 მილიონი ადამიანი დაიცვა ინფექციის შეყრისგან. ოფიციალური ცნობით, ჩინეთში დღეისთვის, დაახლოებით, 83 ათასი შემთხვევაა დაფიქსირებული. ქვეყნის მასშტაბით თავდაპირველი შეზღუდვები ვირუსის გაჩენის ეპიცენტრს, უხანს შეეხო. მარტში ჩატარებული კვლევის თანახმად, 23 იანვარს უხანის კარანტინში მოქცევამ ჰუბეის პროვინციაში ათობით ათასი ადამიანი დაიცვა, რაც იმას ნიშნავს, რომ ზომების მიუღებლად დაავადების შემთხვევები 65 პროცენტით გაიზრდებოდა. ამავე კვლევის მიხედვით, საკარანტინო შეზღუდვებმა ირანში 54 მილიონი, იტალიაში 49 მილიონი, საფრანგეთში 45 მილიონი, ხოლოდ სამხრეთ კორეაში 38 მილიონი ადამიანი დაიცვა ვირუსისგან. "პანდემიის შესანელებლად მიღებულმა ზომებმა ამ ექვს ქვეყანაში მნიშვნელოვანი შედეგი გამოიღო", - წერენ მკვლევრები, "თუმცა შესაბამისი პოლიტიკის განხორციელების პროცესში ერთი შეხედვით უმნიშვნელო შეფერხებებმა, სავარაუდოდ, დრამატულად განსხვავებულ შედეგებამდე მიგვიყვანეს". სხვა სიტყვებით რომ ვთქვათ, იმ ქვეყნებში, რომლბმაც ჩინეთის მსგავსად მალევე მიიღეს საკარანტინო ზომები, დღეს მდგომარეობა სტაბილურია; მაშინ, როცა აშშ-სა და იტალიაში ზომების დაგვიანებულად მიღების შედეგად, დიდი ალბათობით, მრავალი ისეთი ადამიანი შეეწირა ვირუსს, რომელთა გადარჩენაც წესების დროულად შემოღების შემთხვევაში შესაძლებელი იქნებოდა. კოლუმბიის უნივერსიტეტის მეცნიერებმა გამოითვალეს, რომ აშშ ინფიცირების 645 ათას შემთხვევას და 36 ათასი ადამიანის სიკვდილს აიცილებდა თავიდან, თუკი კარანტინი ერთი ან ორი კვირით ადრე დაწესდებოდა. იტალიაში მკვლევართა გუნდმა ახლახანს გამოიანგარიშა, რომ ქვეყანაში შემოღებულმა კარანტინმა 21 თებერვლის პირველი შემთხვევის დაფიქსირებიდან 25 მარტამდე 200 ათასი ადამიანი დაიცვა ჰოსპიტალიზაციისგან. ლონდონის საიმპერიო კოლეჯის კვლევის თანახმად კი, მარტიდან 4 მაისამდე ევროპის 11 ქვეყანაში მიღებულმა საკარანტინო ზომებმა 3.1 მილიონი ადამიანის სიცოცხლე გადაარჩინა. ამ 11 ქვეყნიდან სიკვდილის ყველაზე მეტი, 690 ათასი და 630 ათასი შემთხვევის თავიდან აცილება საფრანგეთმა და იტალიამ შეძლეს. გერმანიაში, სადაც მოსახლეობის 1 პროცენტზე ნაკლებს შეეყარა ვირუსი, ეს რიცხვი 560 ათასია. ესპანეთსა და გაერთიანებულ სამეფოში ინფიცირებულთა პროცენტული მაჩვენებელია ხუთია, ხოლო კარანტინით გადარჩენილ ადამიანთა რაოდენობა თითო ქვეყანაში 400 ათასია. ამავე კვლევის მიხედვით, დანიაში 34 ათასი, შვედეთში 26 ათასი, ხოლო ნორვეგიაში 12 ათასი ადამიანი იხსნა კარანტინმა. შვედეთში დღეისთვის მოსახლეობის 3 პროცენტია ინფიცირებული, დანიაში 1 პროცენტი, ნორვეგიაში კი 0.5 პროცენტი. საბოლოო ჯამში, მკვლევრები ასკვნიან, რომ კარანტინმა ვირუსის გავრცელების დინამიკაზე მნიშვნელოვანი ზეგავლენა მოახდინა. თერთმეტივე ქვეყანაში დღეისთვის ერთი პაციენტის კვლავწარმოებითი მაჩვენებელი (იმ ადამიანთა საშუალო რაოდენობა, რომელსაც დაავადებული აინფიცირებს), 1-ზე დაბალია. ეს კი იმის ნიშანია, რომ თითოეული სახელმწიფოს შიგნით ეპიდემია გაკონტროლებულია. "ჩვენ დარწმუნებით ვერ ვიტყვით, რომ დღევანდელი ზომებით ევროპაში ვირუსის შეჩერება მომავალშიც ეფექტიანად გაგრძელდება", - წერენ მკვლევრები, "თუმცა თუ არსებული ტენდენცია შენარჩუნდება, ოპტიმიზმის საფუძველიც გვექნება". პანდემია საფრთხეე Covid19 TbilisiDaily

ჩინეთის მოსახლეობა მუშაობას უბრუნდება. სანდოა თუ არა ახლა გარეთ გასვლა? ღირს თუ არა ქვეყანა რომელიც ვირუსს სამი თვის განმავლობაში ებრძოდა დაუბრუნდეს ჩვეულ რიტმს? შემდეგ კვირას ვუჰანში დარჩენილ ადამიანებს ექნებათ შესაძლებლობა ქალაქი დატოვონ. თუმცა აღდგენილი ცოხვრების რიტმის მიუხედავად ოფიციალური პირები მოსახლეობას აფრთხილებენ : თუ არ აქვთ მნიშვნელოვანი საქმე , არ არის გადაუდებელი საჭიროება ნუ დატოვებენ სახლებს და მოერიდონ ხალხმრავალ ადგილებს. დაიბადა კითხვა, აძლევდა თუ არა ჩინეთი ზუსტ რიცხვებს დაავადებულთა შესახებ მაოფლიოს? ქვეყნის საგარეო საქმეთა მინისტრმა კი ამ კითხვას მკაცრად უპასუხა, რომ იგი აძლევდა ღია, გამჭვირვალე და დროულ პასუხს მსოფლიოს. ასევე WHO წარმომადგენელმა ჟენევაში პრესკონფერენციაზე უარი თქვა ეპასუხა კითხვაზე , რომელიც ჩინეთის მიმართ დაუსაბუთელებ ბრალდებას შეიცავდა. ჩინეთის გამოცემებში გავრცელდა ინფორმაცია, რომ ვუჰანში იმაზე მეტი დასაკრძალი ურნა გამოითხოვეს ვიდრე ეს ციფრებში იყო მოცემული. გამოდის რომ გარდაიცვალა იმაზე მეტი ადამიანი ვიდრე მსოფლიომ ამის შესახებ იცის. თუმცა ჩინეთის მასშტაბით 11 მილიონი დაკრძალვის სერვისი შეჩერდა 25 იანვარს. ეს ყველაფერი ბადებს კითხვას თუ რისთვის დასჭირდათ უფრო მეტი ურნა ვიდრე 11 მილიონ დამკრძალავ ბიუროში შეეძლოთ მოეპოვებინათ. წყარო -CNN#Wuhan #Coronavirus #covid19 #Chines