თბილისში დენი გაძვირდა

თბილისში დენი გაძვირდა. სემეკის გადაწყვეტილებით, თბილისში იზრდება როგორც სამომხმარებლო, ასევე, არასაყოფაცხოვრებო ტარიფი. სამომხმარებლო ტარიფი 2,964 თეთრით გაიზარდა, არასაყოფაცხოვრებო ტარიფი კი 9,5 თეთრიდან 10,9 თეთრამდე. ტარიფი 6 თვე იქნება ძალაში, 1 ივლისს სემეკი ტარიფებს ხელახლა გადახედავს. ზრდა უფრო მაღალი იქნებოდა, თუმცა "სემეკმა" 16 მილიონი ლარით შეუმცირეს "თელასს" წარმოდგენილი ხარჯები, რაც საერთო ხარჯის 18 პროცენტი იყო. საყოფაცხოვრებო ტარიფი: 0 კვტ.სთ-დან 101 კვტ.სთ-ის ჩათვლით - იზრდება 12,325 თეთრიდან 15,289 თეთრამდე; 101 კვტ.სთ-დან 301 კვტ.სთ-ის ჩათვლით - იზრდება 15,725 თეთრიდან 18,689 თეთრამდე; 301 კვტ.სთ-დან და მეტი - იზრდება 19,525 თეთრიდან 22,489 თეთრამდე. ეს იმას ნიშნავს, რომ ყოველ მოხმარებულ 100 კვტ.სთ-ზე ოჯახი 3 ლარით მეტს გადაიხდის. არასაყოფაცხოვრებო ტარიფი: 110-35 კვ - იზრდება 13,653 თეთრიდან 23,195 თეთრამდე; 10–6–3.3 კვ - იზრდება 14,307 თეთრიდან 25,124 თეთრამდე; 0.4 კვ - იზრდება 18,067 თეთრიდან 27,908 თეთრამდე. ფასში არ არის გათვალისწინებული დღგ. "ვერ გავიზიარებთ თქვენ მიერ შემოთავზებულ ტარიფების სტრუქტურას... ალბათ, მიზანშეწონილი იქნებოდა, რომ პროექტში აღნიშნული იყოს, რომ 6-თვიან პერიოდში, კომპანიის აცდენა რეალობასთან ტარიფში 2021 წლის ივლისიდან აისახოს... აცდენა ჩვენსა და თქვენს გამოთვლებს შორის არის დაახლოებით 150 მლნ კვტ.სთ, რაც არის დაახლოებით 13 მლნ ლარი.", - განაცხადა "თელასის" წარმომადგენელმა.​ 2021 წლის ივლისისთვის "სემეკი" ტარიფებს ხელახლა გადახედავს. საქართველოს მთავრობის გადაწყვეტილებით, მოქალაქეებს მომავალ წელს არ მოუწევთ ელექტროენერგიის საფასურის გაზრდილი ტარიფით გადახდა. პრემიერ-მინისტრ გიორგი გახარიას განცხადებით, „საქართველოს მთავრობა სხვაობას დღევანდელ ტარიფსა და გაზრდილ ტარიფს შორის, რომელსაც დღეს დაადგენს კომისია, სრულად დაასუბსიდირებს 300 კილოვატამდე მოხმარების აბონენტებისთვის“. გახარიას თქმით, საქართველოში 1 700 000 აბონენტია და მათგან 1 600 000 მოიხმარს 300 კილოვატზე ნაკლებს, რაც ნიშნავს, რომ სუბსიდირება შეეხება ოჯახების 95%-ს. https://www.radiotavisupleba.ge/a/31024174.html #ახალი_ამბები #twitter