16 მარტი, 2020- საქართველოს ბანკი კორონავირუსის გავრცელების პრევენციისთვის, იმისათვის რომ თავშეყრის ადგილებში ხალხის ნაკადის შემცირებას შევუწყოთ ხელი, ნახევრადდისტანციურ მუშაობის მოდელზე გადადის. საქართველოს ბანკი ითვალისწინებს მსოფლიო ჯანდაცვის ორგანიზაციის, დაავადებათა ეროვნული ცენტრისა და მთავრობის რეკომენდაციებს. პასუხისმგებლიანი ბიზნესის პოლიტიკის ფარგლებში ნახევრადდისტანციურ მუშაობის მოდელზე გადავა საქართველოს ბანკის სათავო ოფისიც. „როგორც ერთ-ერთი მსხვილი ფინანსური ინსტიტუტი, რომელიც ემსახურება 2,5 მილიონზე მეტ მომხმარებელს და დასაქმებული ყავს 8000 მდე ადამიანი, ვითვალისწინებთ ჩვენს პასუხისმგებლობას როგორც ჩვენი თანამშრომლების, ასევე მომხმარებლის წინაშე. ქვეყანაში COVID-19-ის გავრცელების შესაჩერებლად უმნიშვნელოვანესია მაქსიმალურად შევამციროთ პირისპირი და არააუცილებელი ინტერაქციები. ამ მიზნით საქართველოს ბანკის ბარათის მფლობელ ფიზიკურ პირებს ეძლევათ შესაძლებლობა, ორი თვის განმავლობაში, დისტანციური არხებით - მობილბანკით და ინტერნეტბანკით ტრანზაქციები საკომისიოს გარეშე განახორციელონ. კორონავირუსის გავრცელების პრევენციის მიზნით, საქართველოს ბანკის ყველა ექსპრეს სერვისცენტრი (მეტროში განთავსებული და 24-საათიანი ფილიალების გარდა) გადავა თვითმომსახურების მოდელზე რაც ნიშნავს, რომ ხელმისაწვდომი იქნება სწრაფი ჩარიცხვის აპარატები და ბანკომატები, რომელიც დღეში სამჯერ, სველი წესით მუშავდება. ასევე, მოხდება კადრების გადანაწილება SOLO-ს, საცალო და კორპორატიული მომსახურების მიმართულებით. ნახევრადდისტანციური შრომის მოდელზე გადასვლა უკავშირდება ბიზნესის უწყვეტობის სამოქმედო გეგმას. იმისათვის რომ მომხმარებელმა სერვისებით შეუფერხებლად ისარგებლოს, ცხელი ხაზი 24 საათიან, გაძლიერებულ რეჟიმში იმუშავებს“,- აცხადებენ ბანკში. ერთად ყველაფერი შეგვიძლია ერთად შესაძლებლობები უსაზღვროა

“საქართველოს ხელისუფლება ბოლო კვირების განმავლობაში, ყველა შესაძლო არხით ჩართულია COVID-19-ის გავრცელების პრევენციისთვის ოკუპირებულ ტერიტორიებზე”-ამის შესახებ შერიგებისა და სამოქალაქო თანასწორობის საკითხებში სახელმწიფო მინისტრმა განაცხადა. ქეთევან ციხელაშვილი იმ კითხვებს გამოეხმაურა, რომელიც შეეხებოდა ერთ-ერთი პოლიტიკური ორგანიზაციის წარმომადგენლების მიერ გავრცელებულ ინფორმაციას გალისთვის გადაცემულ დახმარებასთან დაკავშირებით და ასევე მოწოდებებს ხელისუფლების მიმართ აფხაზეთში მოქმედებების შესახებ. მისივე თქმით,ზოგიერთი პოლიტიკოსის განცხადება აღნიშნულ საკითხთან დაკავშირებით გასაკვირია, რადგან სწორედ ისინი მოუწოდებდნენ ხელისუფლებას, ოკუპირებული ტერიტორიების მიმართულებით ნაბიჯები ყოველგვარი პიარის გარეშე გადადგმულიყო. "საქართველოს ხელისუფლება ბოლო კვირების განმავლობაში, ყველა შესაძლო არხით ჩართულია COVID-19-ის გავრცელების პრევენციისთვის ოკუპირებულ ტერიტორიებზე. არაერთი აქტივობა განხორციელდა განსაკუთრებით აფხაზეთის რეგიონის მიმართულებით. ერთის თქმა შემიძლია: თუნდაც მხოლოდ გუშინ განხორციელებულ აქტივობებში, რომელიმე ფონდის თუ პოლიტიკური ორგანიზაციის მიერ გაკეთებული კონტრიბუცია არ ყოფილა არც ერთადერთი და მითუფრო არც პირველი, როგორც ცხადდებოდა. მთელი ამ დღეების და კვირების განმავლობაში, ხელისუფლება და ასევე სხვადასხვა კერძო პირი თუ ორგანიზაცია, თავისი კეთილი ნებით, ასევე ჩვენი საერთაშორისო პარტნიორები, ძალიან აქტიურად არიან ჩართულნი ამ პროცესში და ყველას მადლობა, რა თქმა უნდა. მე პროცესის დეტალებზე კვლავ ვერ ვსაუბრობ, სწორედ ამ პროცესის სენსიტიურობიდან გამომდინარე და იმიტომ, რომ ამ ყველაფრის უკან დგანან ადამიანები, რომელთაც ძალიან სჭირდებათ დახმარება გუშინწინაც, გუშინაც, დღესაც და ხვალაც. მათი სიცოცხლე და ჯანმრთელობა არის ახლა პრიორიტეტი, ყველაზე მთავარი და ყველაზე მაღალი! მე მესმის, რომ შეიძლება ამა თუ იმ პოლიტიკურ პირს თუ ორგანიზაციას ჰქონდეს გარკვეული პოლიტიკური დღის წესრიგი და ინფორმაციის გასაჯაროვება ამას უკავშირდბოდეს, თუმცა იმასაც ვიტყვი, რომ კონკრეტულად ამ პოლიტიკური ძალისაგან ალბათ ცოტა გასაკვირია იმიტომ, რომ სულ რამდენიმე დღის წინ, იგივე ორგანიზაციის წარმომადგენლები მოუწოდებდნენ ხელისუფლებას, ოკუპირებული ტერიტორიების მიმართულებით ნაბიჯები გადადგმულიყო "ყველანაირი ხმაურისა და პიარის გარეშე", რასაც, გარწმუნებთ, ისედაც ვდგამდით და ახლაც ვდგამთ, სწორედ ამ ხმაურის გარეშე, რომ პროცესი არ დაზიანდეს! ამიტომ ვფიქრობ, დღეს განსაკუთრებით, ამხელა გამოწვევასთან ბრძოლაში, ეს სენსიტიური გარემო უმჯობესია ყველამ გაითვალისწინოს"-აცხადებს ქეთევან ციხელაშვილი.

"ჩვენი სისტემური ამოცანა უნდა იყოს, რომ საქართველო შევქმნათ, როგორც პლატფორმა, მსხვილი ქვეყნის ეკონომიკებს შორის, კომფორტული ვაჭრობისთვის და კომფორტული ბიზნესის კეთებისთვის," - ამის შესახებ საქართველოს პრემიერ-მინისტრმა გიორგი გახარიამ განაცხადა. მთავრობის მეთაურის თქმით, საქართველო მხოლოდ მაშინ შეძლებს, გახდეს სანდო და სავაჭრო-ბიზნეს პლატფორმა, თუ მოახერხებს, იყოს კომპეტენციის, კანონმდებლობის, ინსტიტუციურად ყველაზე მყარი და ძლიერი ქვეყანა, "შეხვედრის ადგილი, ასეც შეიძლება დავარქვათ და ეს შეიძლება გახდეს საერთოდ ქვეყნის პოზიციონირების ერთ-ერთი განმსაზღვრელი კომპონენტი. როდესაც ვსაუბრობთ, რომ სტუმარ-მასპინძლობა, ეს ჩვენი დღევანდელობა კი არის, ეს არის ჩვენი ტრადიციები. უნდა გვესმოდეს, რომ სტუმარ-მასპინძლობა მარტო ტურიზმს არ ნიშნავს, ან ტურიზმი არ არის მხოლოდ გართობის, ან ზღვაზე, ან მთის ტურიზმი. ტურიზმი შეიძლება სამედიცინო, ეს უნდა იყოს განათლება, მედიცინა, ბიზნესის კეთება, კომფორტული ტრანზიტი. ეს ყველაფერი უნდა იყოს. ეს შექმნის იმ გარემოს, რომელმაც უნდა მოიზიდოს უფრო მეტი ინვესტიციები ამ ქვეყანაში“, - განაცხადა გიორგი გახარიამ. პრემიერის განმარტებით, კორონა-კრიზისამდე სავაჭრო დეფიციტი დინამიკურად მცირდებოდა, რაც მთავრობის სწორი პოლიტიკის შედეგი იყო. „ჩვენ, თავისუფალი ვაჭრობის რეჟიმების მიმართულებით რომ მივდიოდით, ძალიან კარგად გვესმოდა, რომ საქართველო, იმ სავაჭრო დეფიციტით, რომელიც გვქონდა, როდესაც ჩვენ მოთხოვნას, ჩვენით ვერ ვაკმაყოფილებდით, მიუხედავად იმისა, რომ ეს სავაჭრო დეფიციტი, დღეს, ნელ-ნელა და მიზანმიმართულად, ეტაპობრივად სწორდება, ეს პანდემია რომ არ ყოფილიყო, 2020 წლის დასაწყისში, ეს საკმაოდ დინამიურად სწორდებოდა. ამიტომ, ჩვენ უნდა გვესმოდეს, რომ ჩვენ ეს ქვეყანა უნდა შევქმნათ, როგორც პლატფორმა იმისთვის, რომ უდიდესმა ეკონომიკებმა, რომელთანაც ჩვენ შესანიშნავი სამართლებრივი ჩარჩოები გვაქვს, ერთმანეთთან ივაჭრონ და ბიზნესი აკეთონ აქ. ამის შესაძლებლობა არსებობს. მათ შორის ტრანზიტიც და მათ შორის, შეხვედრის ადგილიც. შეხვედრის ადგილი, გარდა იმისა, რომ კომპეტენციაა, საკმაოდ მაღალი დონის კომპეტენციას მოითხოვს. ამიტომ დაგვჭირდება, რომ აქაც, ვიაროთ გარკვეული დრო. ამიტომ დაგვჭირდება ახალი თაობა, რომელსაც უფრო მაღალი დასავლური ხარისხის განათლება აქვს და კიდევ ბევრი რამ. მაგრამ, უნდა გვესმოდეს, როდესაც ჩვენ ვსაუბრობთ, რომ საქართველომ თავისუფალი ვაჭრობის რეჟიმები გააფორმა ჩინეთთან,ახლა ვაფორმებთ ინდოეთთან, გვაქვს ევროკავშირთან, ყველა მეზობელთან, ისრაელთან მოლაპარაკებებში ვართ, ამერიკის შეერთებულ შტატებთან ვცდილობთ. ხომ უნდა გვესმოდეს, 3.7 მილიონიანმა საქართველომ რა შეიძლება აწარმოოს ისეთი, რომ მიზნად ჰქონდეს ყველასთან თავისუფალი ვაჭრობის რეჟიმები,"-განმარტა პრემიერმა.

სასამართლო იღებს გადაწყვეტილებას და არა პოლიტიკური პარტია - ამის შესახებ განცხადება, საქართველოს პარლამენტის თავმჯდომარის პირველმა მოადგილე გია ვოლსკიმ გააკეთა. „სასამართლო იღებს გადაწყვეტილებას და არა პოლიტიკური პარტია. იყო ის დრო, რომ ის ხალხი ვინც ეხლა ითხოვს რურუას გამოშვებას, ასე განაგებდა ქვეყანას. ვისაც უნდოდათ დაიჭერდნენ ჩასვამდნენ ციხეში, ვისაც უნდოდათ აწამებდნენ და ღირსებას და ჯანმრთელობას წაართმევდნენ. უნდათ, რომ ჩვენც იგივე იარლიყი მოგვაწებონ და ვერ მოხდება ეგ, სასამართლო წყვეტს მაგ საკითხს და არა პოლიტიკური პარტია“, - განაცხდა ვოლსკიმ. ნიკა რურუას ძმა და მთავარი არხის ერთ-ერთი მეწილე გიორგი რურუა 2019 წლის 18 ნოემბერს დააკავეს. შსს-ს განმარტებით ნიკა რურუა პოლიციამ სსკ-ის 236-ე მუხლის მე-3 და მე-4 ნაწილებით გათვალისწინებული დანაშაულისთვის დააკავა, რაც ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს.

Covid 19-ის გავრცელების ყველაზე მაღალ რისკ-ჯგუფს მიეკუთვნებიან იმ პროფესიის ადამიანები, რომლებსაც ინფიცირებულებთან აქვთ შეხება. მასობრივი დაავადების შემთხვევები გარკვეულ ადგილებსაც უკავშირდება. ამ მხრივ, ყველას ახსოვს საკრუიზო ხომალდები. მასაჩუსეტსის უნივერსიტეტის პროფესორი ერინ ბრომაჯი ასეთივე აკატეგრიას მიაკუთვნებს ოფისებს, სპორტულ და გასართობ ღონისძიებებს, წვეულებებს, დაკრძალვებსა და საგუნდო რეპეტიციებს. ყველა ამ შემთხვევაში ინფიცირების რისკი მაღალია, რადგან ადამიანები მნიშვნელოვან დროს ატარებენ შენობაში სხვა ადამიანების კომპანიაში, რომელთა შორის შეიძლება ინფექციის მატარებლები იყვნენ. ერინ ბრომაჯის განმარტებით, მაშინაც კი თუ ინფიცირებული ადამიანი თქვენგან 15 მეტრის დაშორებით იმყოფება, როგორც ეს საგუნდო რეპეტიციის დროს ან ქოლცენტრშია, თქვენამდე მოღწეული ვირუსული ნაწილაკების რაოდენობა მცირეც რომ იყოს, დიდი ხნის განმავლობაში ერთ სივრცეში ყოფნის შედეგად „ინფექციური დოზის“ მიღება შეგიძლიათ. როდესაც ადამიანებს მოუწევთ ჩვეულ სამუშაო რეჟიმს დაუბრუნდნენ, ეს განსკუთღებით საშიში ზოგიერთი პროფესიისთვის იქნება. ყველაზე დიდ პრობლემას ცუდი ვენტილაციის მქონე საოფისე სივრცეები ქმნიან. პროფესორ ბრომაჯს ამის მაგალითად მოჰყავს სამხრეთ კორეა, სადაც ერთ დიდ სივრცეში მუშაობდა 216 ადამიანი, მათგან 94 COVID-19-ით დაავადდა. განსაკუთრებულ რისკჯგუფს სტომატოლოგებიც მიეკუთვნებიან. ერინ ბრომაჯის განმარტებით, მათი მუშაობის პროცესში დიდი რაოდენობით აეროზოლური ნივთიერება წარმოიქმნება. პროფესორის თქმით, ეს საფრთხეს უქმნის არა პაციენტებს, არამედ სტომატოლოგებს. ამიტომაც ადმინისტრაციამ ამ ადამიანებს უსაფრთხო სამუშაო გარემო უნდა შეუქმნას. რისკის კიდევ ერთი ჯგუფია მასწავლებლები. ისინი იძულებული არიან დახურულ სივრცეში თავიანთ მოსწავლეებთან დიდი დრო გაატარონ. ერინ ბრომაჯი პედაგოგებისთვის უსაფრთხო სამუშაო გარემოს შექმნის აუცილებლობაზეც საუბრობს. ერინ ბრომაჯის თქმით, მასობრივი ინფიცირების ცნობილ ეპიზოდებს შორის, ღია ცის ქვეშ ძალიან ცოტა დაფიქსირდა. ამის მიზეზია ის, რომ ქარი და გაშლილი სივრცე ვირუსის კონცენტრაციას ფანტავს, მზის შუქი, სიცხე და ტენიანობა კი მის სიცოცხლისუნარიანობას ამცირებს. დისტანციის შენარჩუნებითა და კონტაქტის ხანგრძლივობის შემცირებით, ინფიცირების რისკს თქვენ კიდევ უფრო ამცირებთ. #news Covid19 #გავრცელებისრისკი #TbilisiDaily

ყველა იწერს ერთ აპლიკაციას და ის ადამიანები, რომლებსაც COVID-19 აღმოაჩნდებათ, ამის შესახებ აპლიკაციაში, სპეციალური ღილაკის დაჭერით განაცხადებენ. შეტყობინებებს მიიღებენ მხოლოდ ის პირები, რომლებსაც ტრანსპორტით სარგებლობისას, თუ სხვადასხვა ადგილზე ყოფნისას, შესაძლოა კონტაქტი ჰქონოდათ დაინფიცირებულთან. ეს არის იდეა, რომლის შესასრულებლადაც Google-ის, Facebook-ის, MIT-ის, Harvard-ისა და Mayo Clinic-ში საქმიანობის გამოცდილების მქონე დეველოპერებმა იმუშავეს. Futurism-ის ცნობით, გუნდი 43 ადამიანისგან შედგებოდა. აპლიკაციას, ანუ მათ პროდუქტს Private Kit: Safe Paths ჰქვია და მისი გადმოწერა Android-ისა და iOS-ის მომხმარებლებს უფასოდ შეგვიძლია. თეორიულად, ძალიან ეფექტური იდეა ჩანს, თუმცა, პრაქტიკაში მას რამდენიმე ღიობი აქვს. პირველი და ლოგიკური ისაა, რამდენად რეალურია, რომ მსოფლიოს/ქვეყნის მასშტაბით ყველას ჰქონდეს ეს აპლიკაცია და ამის მიღმა, ჰქონდეს სოციალური პასუხისმგებლობაც, შეატყობინოს უცნობ გამვლელებს, რომ შესაბამის ზომებს მიმართონ. თუმცა სანამ ამ შესაძლო შეზღუდვებზე, მათ შორის, ინსტიტუციების მხრიდან აპლიკაციის გამოყენებაზე შესაძლო რეკომენდაციის გაცემაზე ვისაუბრებთ, უნდა ავხსნათ, როგორ ახერხებს აპლიკაცია მიზნის მიღწევას. დეველოპერების თქმით, აღნიშნული ეფექტის მიღწევა – შესაძლო, შემთხვევითი კონტაქტების დადგენა და საჭიროების შემთხვევაში, მომხმარებლებისთვის შეტყობინების გაგზავნა, ადგილმდებარეობის ისტორიაზე დაფუძნებით ხდება. თუმცა, როგორც ამბობენ, პერსონალური ინფორმაცია, რომელიც კონკრეტული მომხმარებლის ადგილმდებარეობის ისტორიას მოიცავს, მუშავდება ტელეფონშივე და მასზე წვდომა არ აქვთ აპლიკაციის შემქმნელ კომპანიებს. ეს ინფორმაცია მათთვის ცხადი გახდება მხოლოდ მას შემდეგ, რაც კონკრეტულ მომხმარებელს შეტყობინება მიუვა და მისი თვითიზოლაციის, ან კარანტინში მოთავსების საჭიროება დადგება.