“საქართველო მსოფლიოში იქნება ერთ-ერთი პირველი ქვეყანა, რომელიც “გილიარდისგან“ კორონავირუსის სამკურნალო პრეპარატს მიიღებს” პაატა იმნაძე#stopcov19 #covid19 #georgiaa

როცა ჩვენ მივდივართ მასობრივი თავშეყრის ადგილებზე, ეს იმას არ ნიშნავს, რომ გმირები ან თამამები ვართ, -ამის შესახებ პრემიერ-მინისტრმა გიორგი გახარიამ საგანგებო ბრიფინგზე განაცხადა. მისივე თქმით, ეს ნიშნავს იმას, რომ ჩვენ უბრალოდ პატივს არ ვცემთ იმ ადამიანებს, რომლებიც ჩვენ გვერდით არიან, პატივს არ ვცემთ ჩვენს მშობლებს და ჩვენი ოჯახის წევრებს. "მინდა თითოეულ ჩვენს მოქალაქეს მოვუწოდო, რომ ჩვენი ნაბიჯი დღეს არ ნიშნავს მხოლოდ პასუხისმგებლობას ჩვენს ჯანმრთელობასა და ჩვენს სიცოცხლეზე. ეს ნიშნავს პასუხისმგებლობას ჩვენს გვერდზე მდგომი, ჩვენი ოჯახის წევრების, ჩვენი მეზობლის, ჩვენი მოქალაქის, ჩვენი კოლეგის და საბოლოო ჯამში, ქვეყნის ჯანმრთელობასა და მომავალზე",- განაცხადა გახარიამ.#covid19 #coronavirus #stopcovid19 #georgia #pmm

პარიზიდან ჩამოსული 11 მოქალაქე გორის ჰოსპიტალიდან სახლებში, თვითიზოლაციაში გადაჰყავთ 00:51, 20.03.2020 პარიზიდან ჩამოსული 11 ადამიანი გორის სამხედრო ჰოსპიტალიდან საცხოვრებელ სახლებში, თვითიზოლაციაში გადაჰყავთ. ერთ-ერთი მოქალაქის, ანა ყიფიანის თქმით, პარიზიდან ჩამოსვლის შემდეგ, მოქალაქეები აეროპორტში შეამოწმეს და დაბალი ტემპერატურის გამო, გადამოწმების მიზნით, გორის სამხედრო ჰოსპიტალში გადაიყვანეს, სადაც სრული კვლევა ჩაუტარდათ. „ნაწილს ჩაუტარდა ტესტიც კორონავირუსზე და პასუხები იყო უარყოფითი. ეს ყველაფერი ძალიან სწრაფად კეთდებოდა, ძალიან ორგანიზებულად. რა პირობაც პალატაში შეიძლებოდა გვქონოდა, ყველაფერი იყო. ახლა თვითიზოლაციის პირობით გადავყავართ სახლში. გზაში ფანჯარასთან ვიჯექი და შემცივდა, მძღოლს ვთხოვე, ფანჯარა აეწია და მითხრა, რომ ვერ შეძლებდა, რადგან სხვა პაციენტებმა, რომლებიც კარანტინში ან თვითიზოლაციაში გადაჰყავდათ ფანჯრებს წიხლები დაუშინეს და ჩაამსხვრიეს. ახლა პერსონალი გაოცებულია, ჩვენ რომ მშვიდად ვსხედვართ. ყველანაირი კომფორტია, სად გვინდა, რა გვინდა, გვეკითხებიან ყველაფერს. გვეუბნებიან, რომ დაგვეხმარებიან ყველაფერში. ვერ ვხვდები, რატომ უნდა მოიქცე მათნაირად და რატომ უნდა ჩაამსხვრიო ფანჯრები. მათთვის კარანტინი წამებასთან ასოცირდება ალბათ და ვერ ვხვდებით, რატომ. ძალიან ცუდ მდგომარეობაში აგდებენ პერსონალს“, – განაცხადა ანა ყიფიანმა.#კორონავირუსი #საქართველო #კოვიდ19

ევროპის რეგიონი მედიკამენტებისა და სამედიცინო აღჭურვილობის კრიტიკული უკმარისობის წინაშეა, – „სიენენის“ ცნობით, ამის შესახებ ჯანდაცვის მსოფლიო ორგანიზაციის ევროპის რეგიონულმა დირექტორმა, ექიმმა ჰანს ჰანრი კლუგემ განახაცდა. „ჯანდაცვის მსოფლიო ორგანიზაცია თვალყურს ადევნებს მედიკამენტების მიწოდების დარღვევის პოტენციურ რისკს და ფოკუსირებულია სასიცოცხლო მნიშვნელობის მედიკამენტებზე, რომლებიც უმთავრესია პირველადი ჯანდაცვისთვის, მათ შორის ანტიბიოტიკები, ტკივილგამაყუჩებლები, დიაბეტის, ჰიპერტონიის, შიდსის, ტუბერკულოზის სამკურნალო პრეპარატები“, – განაცხადა კლუგემ. როგორც ჯანდაცვის მსოფლიო ორგანიზაციის რეგიონულმა დირექტორმა აღნიშნა, ორგანიზაცია აწვდის ლაბორატორიულ აღჭურვილობას, სამედიცინო მოწყობილობებსა და პერსონალურ დამცავ აღჭურვილობას ქვეყნებს, რომლებსაც ეს სჭირდებათ. „ჩვენ ინფორმირებული ვართ გარკვეული კრიტიკული დეფიციტის შესახებ და ამის აღმოსაფხვრელად ვმუშაობთ პარტნიორებთან, როგორებიც არიან ევროკომისია და კერძო ინდუსტრია “, – განაცხადა ჰანს ჰანრი კლუგემ. ამასთან, კლუგეს აღნიშნულ განცხადებას რამდენიმე დღით ადრე წინ უძღოდა ჯანდაცვის მსოფლიო ორგანიზაციის გენერალური დირექტორის, ტედროს ადჰანომ გებრეიესუსის განცხადება, რომელმაც ევროპა ახალი კორონავირუსის პანდემიის ეპიცენტრად გამოაცხადა.#covid19 #stopcovid19 #who #europe

ეპიდემიის შემდეგ, სამედიცინო მარიხუანას ლეგალიზაციას თავიდან უნდა მოვუბრუნდეთ - წერს ექსპერტი ანდრია გვიდიანი ფეისბუქის გვერდზე. "როდესაც ეპიდემია ჩაივლის და ეკონომიკის რეანიმაციაზე გადავა მთელი კონცენტრაცია, მთავარი ბრძოლა შემდეგ გველოდება. ჩვენ მოგვიწევს ბევრი ნაბიჯის გადადგმა, ექსპერიმენტების დრო არ გვექნება და დანის პირზე უშეცდომოდ უნდა გავიაროთ. აქედანვე უნდა გავაცნობიეროთ, რომ ბევრი არაპოპულარული, მტკივნეული და ამასთანავე უკომპრომისო გადაწყვეტილება იქნება მისაღები. ბევრი პროექტი, რომელიც სრულიად გაუგებარი მიზეზების გამო თაროზეა შემოდებული, ყველა მათგანმა მზის სინათლე უნდა ნახოს და რეალური გახდეს. სამწუხაროდ, ბევრია სხვადასხვა ინტრესების მქონე ჯგუფების უსაფუძვლო ხუშტურების გამო გაჩერებული პროექტები თუ ინიციატივები. ერთ-ერთზე მინდა ყურადღება გავამახვილო. ასეთია ხელისუფლების მიერ ინიცირებული კანონპროექტი, რომელიც სამედიცინო მოხმარების მიზნით მარიხუანას კულტივაციის ლეგალიზაციას გულისხმობდა. რომელიც, სხვათა შორის, სულ ცოტა ხნის წინ გაუგებარი მიზეზებით დაიბლოკა. ვთვლი, რომ როდესაც ეპიდემია ჩაივლის, ამ საკითხს თავიდან უნდა მოვუბრუნდეთ. უამრავმა განვითარებულმა ქვეყანამ (კანადა, იტალია, დიდი ბრიტანეთი, აშშ და სხვა) ეს გზა გაიარა და კონკრეტული ანალიზის გაკეთება შესაძლებელია, თუ რამხელა ბენეფიტები აქვს ამ ინიციატივას. სხვადასხვა გათვლებით, მხოლოდ სამედიცინო მოხმარებისთვის მარიხუანას ლეგალიზაცია საქართველოს 1 მილიარდი დოლარის (მთლიანი ექსპორტის 1/3) საექსპორტო პროდუქციას მისცემდა. გარდა ამისა, მნიშვნელოვანია დასაქმების მაჩვენებლები, ფისკალური სარგებელი და სხვა უამრავი ფაქტორი. ბუნებრივია, მსჯელობის დროს ყველა ჯგუფის მოსაზრება გაზიარებული უნდა იყოს, თუმცა საბოლოო ჯამში გადაწყვეტილება მხოლოდ კონკრეტულ ანალიზს უნდა ეფუძნებოდეს. კარგად უნდა გვესმოდეს, რომ არავინ ცდილობს არც ქართველობის წართმევას, არც მართლმადიდებლობას ემუქრება საფრთხე, არც "საქართველოს ავღანიზაციაზეა" საუბარი. ზოგადად, არავის ინტერესებში შედის ჩვენ ღირებულებებთან ბრძოლა. უბრალოდ არსებული რეალობის გათვალისწინებით, ყველამ უნდა გავაცნობიეროთ, რომ უმართავი ემოციების ნაცვლად, რაციონალური აზროვნება გვჭირდება. ნებისმიერ გადაწყვეტილებას, ქმედებას თუ პროტესტს მხოლოდ ანალიზი უნდა ედოს საფუძვლად და არა ემოციები. მსჯელობა, აზრთა სხვადასხვაობა, განხილვა და ცივი გონებით აზროვნება არის ქვეყნის სწორად მშენებლობის ფუნდამენტი. სინამდვილეში წარმატების რეცეპტი მარტივია. ჩვენ უნდა გამოვიყენოთ ყველა რესურსი და ყველა შესაძლებლობა, ყველაფერი, რაც ჩვენი ქვეყნის განვითარებას დააჩქარებს და ჩვენ მოსახლეობას სწრაფად გაამდიდრებს. უნდა ვიყოთ უფრო გაბედულები, კეკლუცობის და ემოციების დრო არ გვაქვს. ეს პანდემია ბევრ რამეს შეცვლის, ბევრი მიდგომა და ხედვა შეიცვლება. ზოგადად, ჩვენ მივიღებთ ახალ მსოფლიო დღის წესრიგს და, იმედი მაქვს, საქართველოშიც შეიცვლება მთელი რიგი საკითხების მიმართ მსჯელობის სტილი."- წერს ანდრია გვიდიანი.#marikhuana #stopcovid19 #georgia

სუბსიდიის მიიღებთ, თუ ფლობთ სასოფლო-სამეურნეო მიწის ნაკვეთს. სუბსიდიის მოცულობა 1 ჰექტარზე 200 ლარია. ანუ, თუ თქვენ ფლობთ 1 ჰექტარს აგრობარათზე დაგერიცხებათ 200 ლარი, თუ 0.25 ჰექტარს - 50 ლარი. სუბსიდიის გაცემის ზედა ზღვარი 10 ჰექტარი და შესაბამისად 2000 ლარია. თანხა ქულების სახით დაირიცხება აგრობარათზე, სადაც 1 ქულა უდრის 1 ლარს. 0.25 ჰა-დან 1.25 ჰა-მდე მიწის ნაკვეთის მესაკუთრე ბარათზე დარიცხული ქულებით შეიძენს: სასუქებსა თუ მცენარეთა დაცვის და მოვლის სხვა საშუალებებს. ასევე სათესლე და სარგავ მასალებს. 1.25 ჰა-დან 10 ჰა-მდე და მეტი ფართობის სასოფლო-სამეურნეო მიწის ნაკვეთის მესაკუთრე აგრობარათზე დარიცხული ქულებით მიწის მოხვნა-დამუშავებასაც შეძლებს. აგრობარათს, რომელზეც სუბსიდიის თანხა დაირიცხება “ლიბერთი ბაკი” უსასყიდლოდ დაგიმზადებთ. ამისთვის განაცხადი ბანკის სასურველ ფილიალში უნდა გააკეთოთ. აგრობარათზე დარიცხული თანხა შეგიძლიათ გამოიყენოთ სპეციალიზებულ მაღაზიებში, ხოლო თუ იმ კატეგორიაში მოხვდით, ვისაც საუბსიდიის გამოყენეა მიწის ხვნა-დამუშავებისთვისაც შეუძლია, აუცილებლად შპს „სოფლის მეურნეობის ლოჯისტიკისა და სერვისების“ კომპანიას (ყოფილი შპს მექანიზატორი“) უნდა მიმართოთ, რომელსაც საქართველოს რეგიონებში 12 სერვისცენტრი აქვს. პროგრამა 20 მაისიდან დაიწყება და აგრობარათზე დარიცხული ქულების გამოყენება წლის ბოლომდე შეგეძლებათ. #news #სუბსიდია #ფერმერები #დახმარება #tbilisidaily #dailynews

ბიზნეს ასოციაციის აღმასრულებელი დირექტორი ლევან ვეფხვაძე საქართველოს ფინანსთა სამინისტროს მოუწოდებს, შექმნილი რთული ვითარების გათვალისწინებით, იმპორტის დღგ-ს გადახდის არსებული პროცედურები გადაიხედოს. ამის შესახებ ინფორმაციას ბიზნეს ასოციაცია ავრცელებს. როგორც ვეფხვაძემ განაცხადა, იმპორტიორების პრობლემა იყოფა ორ ჯგუფად, კერძოდ, პირველ ჯგუფში შედიან სურსათისა და პირველადი მოხმარების საგნების იმპორტიორები, რომელთაც დიდი დაწოლა აქვთ გაზრდილი მოხმარების გამო, ხოლო მეორე ჯგუფში შედიან ის იმპორტიორები, რომელთა სავაჭრო ობიექტები მთავრობის გადაწყვეტილებით დროებით დაიხურა, მათი პროდუქტი გზაშია საქართველოსკენ, ახლო მომავალში კი მოუწევთ იმპორტის პროცედურების გავლა. რაც შეეხება სურსათის იმპორტიორებს, ლევან ვფხვაძის აზრით, შექმნილი მდგომარეობის გასაუმჯობესებლად და პირველადი მოხმარების პროდუქტის (სურსათის) მიწოდების ჯაჭვის ხელშესაწყობად, საჭიროა სწრაფი და ეფექტური გადაწყვეტილებები, რაც გულისხმობს ზემოთ მითითებული პროდუქტის იმპორტისას დამატებითი ღირებულების გადასახადის გადახდის ვადის გახანგრძლივებას, ნაცვლად არსებული ხუთისა, ორმოცდახუთ დღემდე, როგორც ეს, მაგალითად, გათვალისწინებულია ხორბლის იმპორტისას. "ამ გზით, სახელმწიფოს შეუძლია გამოიყენოს მის ხელთ არსებული ინსტრუმენტები და საგადასახადო შეღავათების დაწესების გარეშე, სტაბილური, დაბალანსებული საბრუნავი ფინანსური საშუალებებით უზრუნველყოს პირველადი მოხმარების პროდუქტის იმპორტიორები, რაც ასევე ხელს შეუწყობს კურსთაშორისი სხვაობით გამოწვეული ზიანის შემცირებას და ფასების მერყეობისაგან დაგვაზღვევს", - აცხადებს საქართველოს ბიზნეს ასოციაციის აღმასრულებელ დირექტორი. ასევე, ლევან ვეფხვაძე ყურადრებას ამახვილებს იმ სავაჭრო ქსელების წინაშე მდგარ გამოწვევებზე, რომელთა სავაჭრო ობიექტები მთავრობის გადაწყვეტილებით დროებით დაიხურა, მათი პროდუქტი კი გზაშია საქართველოსკენ და მოუწევთ საგადასახადო ვალდებულებების შესრულება. ამ შემთხვევაშიც, ასოციაციაში ფიქრობენ, რომ საჭირო შეიძლება გახდეს იმპორტის დღგ-ს გადავადების მექანიზმზე ფიქრი, რათა თავიდან იქნეს აცილებული ისედაც რთულ ფინანსურ მდგომარეობაში მყოფი კომპანიებისათვის დამატებითი საგადასახადო ტვირთის დაკისრება.