მინიმუმ სექტემბრამდე 3 თვით უნდა გადავადდეს საკრედიტო შენატანების ვალდებულება - ამბობს ,,ნაციონალური მოძრაობის" თავმჯდომარე ნიკა მელია. მელია სოფელ ქერთუბანში გოჩა მარკოზაშვილს ოჯახს ესტუმრა. ოჯახს ბანკიდან კრედიტი აქვს გამოიტანილი. საკრედიტო შეღავათის ვადის ამოწურვის შემდეგ ყოველთვიური გადასახადიც მნიშვნელოვნად გაეზარდა და ამის გამო იძულებული გახდა, ნაკვეთი გაეყიდა. ნიკა მელიამ ხელისუფლებას კიდევ ერთხელ მოუწოდა, მსგავსი პრობლემების მოსაგვარებლად, საბანკო შეღავათების კიდევ 3 თვით გახანგრძლივება. „10-დან საქართველოს 7 სრულწლოვან მოქალაქეს აქვს საბანკო ვალდებულება. ჩვენი კატეგორიული მოთხოვნაა და მე ვფიქრობ ამ მოთხოვნაში ყველა ერთსულოვანია, როგორც ნაციონალური მოძრაობის მხარდამჭერები, ასევე ქართული ოცნების გულშემატკივრები. მინიმუმ სექტემბრამდე 3 თვით უნდა გადავადდეს საკრედიტო შენატანების ვალდებულება. ვგულისხმობ, როგორც პროცენტის გადახდის ვალდებულებას, ასევე თანხის ძირის ვალდებულებას“, - განაცხადა ნიკა მელიამ.

კომუნალური გადასახადების გადავადების ან არგადახდის საკითხი ჯერჯერობით არ დგას, – ამის შესახებ ეკონომიკისა და მდგრადი განვითარების მინისტრმა, ნათია თურნავამ განაცხადა ჟურნალისტების კითხვაზე, ხომ არ მიმდინარეობს მოლაპარაკებები შეღავათებზე კომუნალური სერვისების მიმწოდებელ კომპანიებთან. მინისტრის თქმით, ძალიან რთული ვითარებაა და ბევრს შეექმნა ფინანსური პრობლემა. ბანკები ამ საკითხს გაგებით მოეკიდნენ და მოსახლეობას სესხებზე საშეღავათო პერიოდი შესთავაზეს, თუმცა კომუნალურ გადასახადებთან დაკავშირებით ჯერ საუბარი არ მიმდინარეობს. „ჩვენ ძალიან კარგად გვესმის, რომ ახლა ვითარება არის საკმაოდ რთული. ბევრი ფინანსური პრობლემა დაგვიდგა ყველას, საქართველოს მოქალაქეებს. ძალიან კარგია, რომ ბანკები გაგებით ეკიდებიან ამას და სამი თვით ხდება რესტრუქტურირება სესხების. ასევე ის, რომ ჩვენ ბიზნესებს ვუწევთ შეღავათებს, გვაძლევს საშუალებას, ეს ადამიანები დასაქმებული იყვნენ და ბიზნესებმა მაქსიმალურად შეინარჩუნონ თანამშრომლები და გადაიხადონ ხელფასი. რაც შეეხება კომუნალურ გადასახადებს, არ უნდა დაგვავიწყდეს, რომ კომუნალური მომსახურების მომწოდებელი კომპანიები, იქნება ეს „თელასი“,„ენერგოპრო“, თუ „თბილისი ენერჯი“, კერძო კომპანიები არიან, მათაც საკმაოდ რთული პერიოდი უდგათ დღეს, როგორც ნებისმიერ სხვა ბიზნესს, რადგან საკმაოდ ბევრი პრობლემა აქვთ გადასაწყვეტი. აქედან გამომდინარე, ჯერჯერობით საუბარი იმაზე, რომ კომუნალური გადასახადები გადავადდება ან არ უნდა იქნეს გადახდილი, არ დგას“, – განაცხადა ნათია თურნავამ.#stopcovid19 #covid19 #კორონავირუსი

„ჩვენ გვაქვს წინადადება, რომელიც შემოსავლებდაკარგული ადამიანების გადასარჩენად, აუცილებელი ფინანსების მობილიზებას გულისხმობს” – ამის შესახებ საქართველოს პარლამენტის წევრმა, გია ჟორჟოლიანმა ბრიფინგზე განაცხადა. „ჩვენი წინადადება ითვალისწინებს შემდეგს – შედარებით მაღალი შემოსავლების მქონე ადამიანები განახორციელებენ შემდეგ შენატანებს: 3 ათასი ლარიდან-დან 6 ათას ლარამდე შემოსავლის 20%-ს, 6 ათასი ლარიდან 8 ათასამდე – 30%-ს, ხოლო 8000 ლარის ზემოთ – 40%-ს. ეს გადასახადი შემოღებულ უნდა იქნას დროებით – 1 წლის ვადით მთავრობის მიერ“. – ამბობს ჟორჟოლიანი. მისივე განცხადებით, დარწმუნებით შეიძლება ითქვას, რომ მოსახლეობის უდიდესი უმრავლესობა ამ სოლიდარულ აქციას მხარს დაუჭერს. „ჩვენი წინადადება უზრუნველყოფს სერიოზული თანხების მობილიზებას, წელიწადში დაახლოებით 700-800 მილიონი ლარის ოდენობით”, – ამბობს დეპუტატი. „მთავრობა ამ დრომდე ეფექტურად და კომპეტენტურად მოქმედებდა, დადგა დრო უფრო თამამი და პასუხისმგებლიანი ნაბიჯების გადადგმისა“, – განაცხადა გია ჟორჟოლიანმა.

საკრედიტო-საგარანტიო სქემის სახელმწიფო პროგრამაში ცვლილებები დამტკიცდა. პროგრამის ფარგლებში მეწარმეებს, რომლებსაც სესხის მისაღებად საკმარისი საგარანტიო უზრუნველყოფა არ გააჩნიათ, შესაძლებლობა ეძლევათ, სესხი სახელმწიფოს თავდებობით აიღონ. საკრედიტო გარანტია წარმოადგენს სააგენტოსა და კომერციულ ბანკს ან მიკროსაფინანსო ორგანიზაციებს შორის ამ პროგრამის ფარგლებში გაცემული სესხების დეფოლტის საფუძველზე წარმოქმნილი ფინანსური რისკის გადანაწილების ინსტრუმენტს. პროგრამის ფარგლებში საფინანსო ორგანიზაციის მიერ გაცემულ თითოეულ სესხზე, სახელმწიფო გარანტია სესხის ძირი თანხის არაუმეტეს 90 პროცენტს შეადგენს, ხოლო რესტრუქტურიზებულ სესხზე ძირი თანხის არაუმეტეს – 30 პროცენტს. კომერციული ბანკის მიერ გაცემული სესხებისთვის საგარანტიო თანხის უზრუნველყოფის მიზნით, საქართველოს ეკონომიკისა და მდგრადი განვითარების სამინისტროს სააგენტო – „აწარმოე საქართველოში“ უფლებამოსილია, კომერციულ ბანკში გახსნას სადეპოზიტო ანგარიში. რაც შეეხება მსესხებელს, საქართველოს მთავრობის 2020 წლის 4 ივნისის N352 დადგენილების თანახმად, მეწარმე სუბიექტი „ბუღალტრული აღრიცხვის, ანგარიშგებისა და აუდიტის შესახებ“ საქართველოს კანონის შესაბამისად უნდა აკმაყოფილებდეს მესამე ან მეოთხე კატეგორიის საწარმოსთვის დადგენილ მოთხოვნებს, მხოლოდ შემოსავლის კომპონენტში. ამასთანავე, მეწარმის სასესხო ვალდებულება 12 მილიონ ლარს არ უნდა აღემატებოდეს. ამასთან, დადგენილებაში აღნიშნულია, რომ კომერციული ბანკის მიერ პროგრამის ფარგლებში ბენეფიციარისთვის გაცემული სესხის მინიმალური მოცულობა შეადგენს 50 ათას ლარს, მიკროსაფინანსო ორგანიზაციის მიერ გაცემული სესხის მინიმალური მოცულობა – 20 ათას ლარს, ხოლო მაქსიმალური მოცულობა − 5 მილიონ ლარს. უცხოურ ვალუტაში გაცემული სესხების რესტრუქტურიზებისას კი, სესხის მინიმალური და მაქსიმალური ოდენობები განისაზღვრება ეკვივალენტური/შესაბამისი ოდენობებით, უცხოურ ვალუტაში სესხის რესტრუქტურიზაციის დღისთვის არსებული ეროვნული ბანკის გაცვლითი კურსის შესაბამისად. ამასთან, პროგრამის ფარგლებში სესხის რესტრუქტურიზებისას სესხის მოცულობად მიიჩნევა რესტრუქტურიზების განხორციელების მომენტში არსებული სესხის ნაშთი და არა, გაცემული სესხის თავდაპირველი ოდენობა. დოკუმენტის მიხედვით, პროგრამის ფარგლებში ბენეფიციარი უფლებამოსილია, ისარგებლოს რამდენიმე სესხით, თუ პროგრამის ფარგლებში გაცემული სესხების ჯამური მოცულობა არ აღემატება 5 მილიონ ლარს. პროგრამის ფარგლებში სესხი გაიცემა მხოლოდ ეროვნულ ვალუტაში, ხოლო სესხის რესტრუქტურიზება/რეფინანსირება შესაძლებელია როგორც უცხოურ, ასევე ეროვნულ ვალუტაში. საკრედიტო გარანტია მოქმედებს სესხის გაცემიდან არაუმეტეს 10 წლის განმავლობაში. რაც შეეხება სესხის აღების პროცესს, კომერციული ბანკი ან მიკროსაფინანსო ორგანიზაცია მეწარმეს დადგენილი სტანდარტების მიხედვით ამოწმებს, კრიტერიუმებთან შესაბამისობის დადგენის შემთხვევაში, სააგენტოს უგზავნის მიმართვის ფორმასა და საგარანტიო თანხის ჩარიცხვის მოთხოვნას. თავის მხრივ, აღნიშნულ მონაცემებს, პროგრამის კრიტერიუმებსა და პირობებთან შესაბამისობის კუთხით, სააგენტოც ამოწმებს. ორი სამუშაო დღის განმავლობაში სააგენტო „აწარმოე საქართველოში“ ადასტურებს ან უარყოფს სესხის ძირითადი მახასიათებლების შესაბამისობას პროგრამის კრიტერიუმებსა და პირობებთან. სააგენტოს დასტურის შემთხვევაში, სესხი პროგრამის ფარგლებში დამტკიცებულად მიიჩნევა. პროგრამით სარგებლობის წესებთან, პირობებთან და კრიტერიუმებთან ერთად, მთავრობის დადგენილებას დანართის სახით თან ახლავს იმ საქმიანობების ჩამონათვალი, რომელ სფეროშიც შესაძლებელია საკრედიტო-საგარანტიო მექანიზმით სარგებლობა.