სააკაშვილის დანიშვნით თქვენ დადებთ შენელებული მოქმედების ნაღმს - ვოლსკი უკრაინელ ჟურნალისტს

http://pirveliradio.ge/?newsid=142461 არ ვიცი რა ფორმა ექნება ქართული მხარის პროტესტს, მაგრამ ზუსტად ვიცი, რა ელოდება უკრაინას სააკაშვილის დანიშვნის შემთხვევაში ნებისმიერ თანამდებობაზე აღმასრულებელ ხელისუფლებაში. თქვენ ამით დებთ შენელებული მოქმედების ნაღმს. ვფიქრობ, რომ პირველ რიგში უკრაინის ინტერესებზე უნდა ვიფიქროთ. სააკაშვილის დანიშვნა არ იქნება სილის გაწნა ქართველის ხალხისთვის, ეს იქნება სილა უკრაინელი ხალხისთვის“,- ამის შესახებ საქართველოს პარლამენტის ვიცე-სპიკერმა გიორგი ვოლსკიმ უკრაინული ტელევიზიის ,,112“-ის მთავარ პოლიტიკურ თოქ-შოუში „პულსი“ განაცხადა. გიორგი ვოლსკიმ ისაუბრა სააკაშვილის მმართველობის პერიოდზე. მისი თქმით, იმ ადამიანის დანიშვნა თანამდებობაზე, რომელიც გასამართლებულია მძიმე დანაშაულებებისთვის, ორი ქვეყნის ურთიერთობებს დააზარალებს. „მან საქართველოში ასე დაიმორჩილა ყველაფერი. მან შექმნა სახელმწიფო სტრუქტურებისგან კარგად ორგანიზებული ჯგუფი, რომელიც იმით იყო დაკავებული, რომ დაუმორჩილებელ მოქალაქეებს აპატიმრებდნენ, აიძულებდნენ ხელი მოეწერათ სახელმწიფოსთვის მათი საკუთრების გადაცემაზე და ამას ერქვა კორუფციასთან ბრძოლა. თუ უკრაინის ხელისუფლებას აინტერესებს რეფორმები, ჩამოვიდნენ, ან ჩვენ ჩამოვალთ და კარგ მაგალითებზე ვაჩვენებთ, რა შეიძლება გაკეთდეს. სააკაშვილის მმართველობის პერიოდსა და სტილზე არსებობს ფაქტები, მაგალითები, რომელთა გაცნობა და ნახვა უკრაინის ხელისუფლებას ძალიან მარტივად შეუძლია“, – განაცხადა ვოლსკიმ. ამასთან, გია ვოლსკიმ 2008 წლის აგვისტოს ომის შესახებ და ამერიკის შეერთებული შტატების იმჟამინდელი სახელმწიფო მდივნის, ელჩებისა და სხვა მაღალჩინოსნების განცხადებებზეც ისაუბრა. „დღეს, თქვენი გადაცემის სტუმარი რომ არ ვყოფილიყავი და ამ თემებზე კომენტარი რომ არ გამეკეთებინა, ჩემს გარეშეც ძალიან მარტივად შეგიძლიათ, აიღოთ, სტრასბურგის გადაწყვეტილება ქართული სასამართლოს სამი ინსტანციის გადაწყვეტილებები, ესაუბროთ ვალერი გელაშვილს, ნახოთ, არა მარტო მისი, არამედ იმ მოკლული ახალგაზრდების ფოტოები, რომლებიც დაცხრილეს, როგორც სააკაშვილი ამბობდა, წესრიგის დასამყარებლად. ვსაუბრობ მხოლოდ ფაქტებით და მაგალითისთვის მოგიყვანთ აგვისტოს ომს. ამ ომში ჩვენმა მეომრებმა გმირობის მაგალითები აჩვენეს, თავდამსხმელი აგრესორების დიდი ნაწილი გაანადგურეს. 9 აგვისტომდე სააკაშვილის მთავრობა არ აღიარებდა, რომ რუსეთი რამე ფორმით ჩართული იყო ამ შეიარაღებულ აგრესიაში. მან არათუ მიმართა საერთაშორისო ორგანიზაციებს, რისი გაკეთებაც მას ჯერ კიდევ ივლისში შეეძლო, არამედ, რუსეთის წარმომადგენლის შეთავაზებით, იტალიაში გაემგზავრა დასასვენებლად და იქიდან ჩამოსული ამბობდა, რომ რუსეთი საერთოდ არ არის დაინტერესებული სამხრეთ ოსეთით და საერთოდაც, „სამხრეთ ოსეთი ის მორყეული კბილია, რომელიც შეიძლება, მოიძრო“, ვციტირებ. არის ციტატები, არის საგზაო რუკა, რომელიც ევროკავშირისა და ამერიკის შეერთებული შტატების მიერ, ჩვენს ექსპერტებთან ერთად იყო შედგენილი. მან ყველაფერი გადახაზა. გაეცანით, რას წერს კონდოლიზა რაისი, ამერიკის შეერთებული შტატების მაშინდელი სახელმწიფო მდივანი, ან მოუსმინეთ ამერიკის ელჩებს, ვინც მაშინ საქართველოში მუშაობდნენ, მოუსმინეთ მაილსს, ან სხვა მაღალჩინოსნებს“, – აღნიშნა ვოლსკიმ.