ეს იყო გაგრძელება მიხეილ სააკაშვილის, შემდეგ მელიას და ოქრუაშვილის აღიარებების. პირადად მე, დარწმუნებული ვარ, რომ ისინი მსჯელობენ ასეთ საკითხებზე, რადგან ზუსტად იციან, რომ არჩევნები მათი გამარჯვების გზა ვერ იქნება- ასე ეხმაურება საპარლამენტო უმრავლესობის ლიდერი, მამუკა მდინარაძე გიორგი არველაძის განცხადებას. „აქ უბრალოდ გასაჯაროება მოხდა ერთი კონკრეტული ადამიანის, „ნაციონალური მოძრაობის" წარმომადგენლის მიერ ამ გეგმის. ისინი ამ გზაზე ფიქრობენ, მაგრამ ეს გზა არის ასევე არარეალური, რადგან მათ ამის ძალაც არ ეყოფათ, რადგან დღეს სახელმწიფო შემდგარი სახელმწიფოა და რევოლუციური სცენარიც დამარცხებისთვის არის განწირული და ბუნებრივია მათი პარტიაც",- აღნიშნა მამუკა მდინარაძემ. ემზადეთ რევოლუციისთვის- ასე მიმართა გიორგი არველაძემ ქართულ ოპოზიციას. „შეწყვიტეთ თავის და ხალხის მოტყუება, რომ არჩევნებით რამე შეიცვლება! არჩევნები აღარ არსებობს! თუ გამარჯვება და ქვეყნის გადარჩენა გინდათ, თუ გაქვთ ლიდერობის ამბიცია და თუ ჯერ კიდევ არ ჩაგიქნევიათ ხელი საქართველოს მომავალზე, ემზადეთ რევოლუციისთვის! გაფიცვები, პიკეტირება, დაუმორჩილებლობა... რევოლუციური კომიტეტები ქალაქებსა და სოფლებში. შექმენით წინააღმდეგობის რაზმები მთელი ქვეყნის მასშტაბით, რომლებიც მუდმვად ჩაბმულნი იქნებიან ქვეყნის მასშტაბით მცირე აქციებსა და ოპერაციებში, თუ საჭიროა შეტაკებებშიც, რომლებიც საჭირო დროს დადგებიან საარჩევნო უბნებთან ნარკომანი ძველი ბიჭებისთვის პასუხის გასაცემად, რომელთაც საჭირო დროს ექნებათ ჩაფხუტიც, რომ გაუძლონ პოლიციის ხელკეტს, სათვალეც და პირბადეც, რომ დაიცვან თავი ცრემლმდენი გაზისგან და რეპრესიული სისტემის მიერ ამოცნობისგან. არჩევნებს მხოლოდ იმ შემთხვევაში მიეცემა აზრი, თუ რევოლუციისთვის იქნებით მზად", - წერს პარტია „ნაციონალური მოძრაობის" ყოფილი დეპუტატი და ტელეკომპანია „იმედის" ყოფილი დირექტორი.

საქართველოს პარლამენტის უმრავლესობის ლიდერი მამუკა მდინარაძე "ფეისბუკის" საკუთარ გვერდზე გამოეხმაურა მედიასა და საზოგადოებაში არსებულ კითხვას - რატომ არ ჩანს ბიძინა ივანიშვილი? მისი პოსტის თანახმად, კითხვა უსაფუძვლოა და ბიძინა ივანიშვილი აქტიურადაა ჩართული საზოგადოებრივ-პოლიტიკურ პროცესებში, მათ შორის, ახალი კორონავირუსის გამოწვევების დაძლევის ღონისძიებების დაგეგმვაში. "მართალია ამ თემის ყოვლად უაზრო პედალირებას მხოლოდ პარტიული ტელევიზიები ცდილობენ და ახლა ამისი დრო ნამდვილად არ არის, მაგრამ ორი სიტყვით მაინც გამოვეხმაურები, - ერთმა ადამიანმაც კი რომ არ დაიჯეროს ტყუილები, რომელსაც ამ საყოველთაო ერთობის მიუხედავად მაინც არ იშლიან. ყოველ დღე გვეკითხებიან, ვპასუხობთ, მაგრამ მაინც: რატომ არ ჩანს ბიძინა ივანიშვილი? ყველამ კარგად იცის, რომ ბიძინა ივანიშვილი იშვიათად ჩანს ტელეეკრანებზე, იშვიათად გამოდის საჯარო აქტივობებით, თუმცა არც ერთ ადამიანს ამ თემაში ის არ დაუნახავს, რასაც ზოგიერთი ე.წ. "მედიასაშუალება" ეძებს. ,,ქართული ოცნება’’ მთელი შემადგენლობით აქტიურად არის ჩართული ქვეყანაში არსებული გამოწვევების, სადღეისოდ კი ბუნებრივია, მთავარი გამოწვევის, კორონა ვირუსის გავრცელების წინააღმდეგ ბრძოლაში. მმართველი პარტიის თავმჯდომარე, შესაბამისად, აქტიურ კომუნიკაციაშია საკოორდინაციო საბჭოს პოლიტიკური თანამდებობის პირებთან და მნიშვნელოვანი გადაწყვეტილებები სრული კოორდინაციით მიიღება. რა თქმა უნდა პარალელურად სხვა მნიშვნელოვან საკითხებზეც ვმუშაობთ და მმართველ პარტიაში გასულ კვირას პარტიის თავმჯდომარის უშუალო ხელმძღვანელობით ორი შეხვედრა გაიმართა. ის შეხვდა ჩვენს საერთაშორისო პარტნიორებს ქვეყნის და პოლიტიკური გარემოსთვის აქტუალურ საკითხებზე. მისი ხელმძღვანელობით ჩატარდა შტაბის შეხვედრაც. სხვათა შორის შეხვედრების ფოტოები პარტიის facebook გვერდზეც დევს, თუმცა მეორე დღიდანვე მაინც გავხდით კითხვის ადრესატები - სად არის ბიძინა ივანიშვილი? ,,ქართული ოცნების’’ გუნდი სრულ კოორდინაციაში და აქტიურ კომუნიკაციაშია ყველა მიმართულებით, რათა არსებული გამოწვევები ეფექტიანად იქნას დაძლეული. კიდევ ერთხელ ვთხოვ ყველას, გავუფრთხილდეთ ერთმანეთს! გისურვებთ ჯანმრთელობას!" - წერს მდინარაძე.

კორონავირუსის გამო არსებული კარანტინის დარღვევისთვის, შესაძლოა, სანქციები საქართველოშიც დაწესდეს. ამის შესახებ განცხადება ბიუროს სხდომაზე პარლამენტის თავმჯდომარემ გააკეთა. არჩილ თალაკვაძემ უმრავლესობის ლიდერს მოუწოდა, მოამზადოს შესაბამისი საკანონმდებლო ინიციატივა, რომელსაც პარლამენტი დაჩქარებული წესით განიხილავს. თალაკვაძემ აღნიშნა, რომ შეიძლება იყოს ადმინისტრაციული სანქციები ან "სხვა ზომები". "თითოეული ასეთი შემთხვევა წარმოადგენს რისკს შემთხვევათა გადაცემისთვის, რისი უფლებაც ჩვენ ნამდვილად არ გვაქვს ახლა", — თქვა პარლამენტის თავმჯდომარემ. მან ასევე აღნიშნა, რომ პარლამენტი მზადაა ამ ცვლილებების მისაღებად და საჭიროა "მკაცრი, გონივრული და პროფესიონალური პასუხი ყველა რისკზე, რომელმაც შეიძლება ინფექციის გავრცელება გამოიწვიოს". მამუკა მდინარაძის განმარტებით, ცვლილებები, სავარაუდოდ, ადმინისტრაციულ სამართალდარღვევათა კოდექსში იქნება და არ არის გამორიცხული, ჯარიმასთან ერთად, პატიმრობაც დაწესდეს. "ჩვენ უნდა ვიყოთ ადეკვატურად მკაცრები", — ამბობს მდინარაძე. P.s. სტატია ჩვენ არ გვრკუთვნის. სტატია გამოქვეყნებულია on.ge-ს მიერ. #news #politics #coronavirus

დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელის ამირან გამყრელიძის ვარაუდით, საქართველოში შესაძლოა, კორონავირუსის მეოთხეული და მეხუთეული გადაცემის შემთხვევები დაფიქსირდეს. მისი თქმით, ვირუსით ინფიცირებულთა რაოდენობა მოიმატებს. „ველით, რომ ქვეყანაში შემთხვევათა რაოდენობა მოიმატებს. ალბათ, დაფიქსირდება მეოთხეული და მეხუთეული გადაცემის შემთხვევები დიდი ალბათობით უკვე ამ კვირის ბოლოს ან მომავალ კვირაში. ეს ნიშნავს, რომ ეპიდემია გაფართოვდება, მაგრამ ჩვენი მთავარი ამოცანაა, რომ ეს ზრდა მინიმალური იყოს, ანუ ახალი შემთხვევების მინიმიზაცია გავაკეთოთ. ამიტომ, ყველა ერთად უნდა ვიმოქმედოთ და დავიცვათ ის წესები, რასაც დღეს სახელმწიფო ადამიანებს მოუწოდებს“,-განაცხადა გამყრელიძემ. მისი თქმით, ამ ეტაპზე ქვეყანაში კორონავირუსის მხოლოდ მესამეული გადაცემის შემთხვევებია გამოვლენილი. „გიდასტურებთ,რომ ჯერჯერობით ქვეყანაში გვაქვს მხოლოდ დადგენილი მესამეული გადაცემის ფაქტები, ანუ ადამიანი, რომელიც შემოვიდა ინფიცირებული რომელიმე ქვეყნიდან, გადასცა ქართველ ადამიანს, რომელსაც ჩვენ ამ შემთხვევაში, შემთხვევასთან ასოცირებულს ვეძახით. მეოთხეული გადაცემის ფაქტი ამ ეტაპზე ქვეყანაში არ არის დადგენილი.ერთი პაციენტის შესახებ ყოველდღიურად ვლინდება ახალ-ახალი კონტაქტები, ანუ მის ირგვლივ ადამიანების დიდი რაოდენობა გამოკვლეულია, მათ შორის დადგენილია პოზიტიური რამდენიმე ადამიანი. შემდგომი ჩაღრმავებული ეპიდემილოგიური და ლაბორატორიული კვლევები ტარდება. ამ ეტაპისთვის მეოთხეული გადაცემა ქვეყანაში ჯერჯერობით არ გვაქვს. დღევანდელი დღისთვის ქვეყანაში არის 38 ლაბორატორიულად დადსტურებული ახალი კორონავირუსული ინფექციის შემთხვევა. მოგეხსენებათ, რომ მათ შორის ორი გახლდათ ირანის ისტორიასთან დაკავშირებული, ერთი ესპანეთის, უმრავლესობა იტალიის. გვაქვს ასევე საფრანგეთის ისტორიასთან დაკავშირებული შემთხვევები, ასევე მეორეული, მესამეული გადაცემის შემთხვევები. ჯერჯერობით, მეოთხეული, მეხუთეული გადაცემის შემთხვევა, როდესაც უკვე ვერ გავდივართ ინფექციის პირველწყაროზე, ასეთი ქვეყანაში ამ ეტაპისთვის დადასტურებული არ არის“,-განაცხადა გამყრელიძემ. მან აღნიშნა,რომ კორონავირუსით ინფიცირებულთა რაოდენობის ზრდა მოსალოდნელია, რადგან „დღევანდელი რიცხვით, მთელ მსოფლიოში უკვე დადასტურებულ შემთხვევათა რაოდენობა 200 ათასს მიუახლოვდა“. „უკვე ჩინეთს გარეთ, შემთხვევათა რაოდენობა გაცილებით მეტია, ვიდრე თვითონ ჩინეთში. ჩინეთში უკვე ეს მერყეობს 81 ათასის ფარგლებში, ანუ დაახლოებით 120 შემთხვევა ჩინეთს გარეთ გვაქვს“,-აღნიშნავს გამყრელიძე.#stopcovid19 #coronavirus #კორონავირუსი #საქართველო

ჩვენ არ ვთხოვთ ეკლესიას, რომ ეკლესიის კარი დაკეტოს - ამის შესახებ უმრავლესობის ლიდერმა მამუკა მდინარაძემ რუსთავი 2-ის ეთერში ისაუბრა. მან ასევე ისაუბრა იმ ბალანსზე, რომლის მიღწევასაც საგანგებო მდგომარეობისა და პანდემიის პირობებში მთავრობა და ეკლესია რელიგიური დღესასწაულების ჩატარების საკითხთან დაკავშირებით ცდილობს. მამუკა მდინარაძემ აღნიშნა, რომ ხელისუფლება ეკლესიას ტაძრების დაკეტვას არ სთხოვს და იმედი გამოთქვა, რომ სააღდგომო ლიტურგიის ჩატარებასთან დაკავშირებით "ოქროს ბალანსი" მოიძებნება. "ოქროს ბალანსი არცთუ მარტივია, რადგან საკითხი სენსიტიურია, ეს ყველამ ვიცით, გამოვუტყდეთ საკუთარ თავებს და ობიექტურად ვილაპარაკოთ. მაგრამ, ჩვენ არ ვთხოვთ ეკლესიას, რომ ეკლესიის კარი დახუროს. ასეთი თხოვნა სახელმწიფოს მხრიდან ეკლესიის მიმართ არ არის, ეს წარმოუდგენელია. მაგრამ არც ეკლესიის მხრიდან არ არის თხოვნა, რომ რაღაც წესების დარღვევის ხარჯზე განხორციელდეს წირვა, კომენდანტის საათმა გადაიწიოს, გადმოიწიოს და ა.შ. ჩვენ ვფიქრობთ, რომ ამ ოქროს ბალანს ჩვენ შედარებით ადვილად დავიცავთ. შორს ვარ იმ აზრისგან, რომ ნებისმიერი ადამიანის მოწოდების საფუძველზე, არცერთი ადამიანი აღდგომის ღამეს ეკლესიაში არ იქნება, მაგრამ იქნება ძალიან ცოტა, ჩემი აზრით, რადგან ყველა გაითავისებს პასუხისმგებლობას ამასთან დაკავშირებით. ადამიანი, რომელიც სახლში დარჩება და იქ შეხვდება აღდგომას, არანაკლები მორწმუნე შეიძლება იყოს, ვიდრე ის, ვინც ეკლესიაში მივა,"- განაცხადა მამუკა მდინარაძემ.

საქართველოს პარლამენტის თავმჯდომარის მოადგილე, საპარლამენტო უმრავლესობის ლიდერი, მამუკა მდინარაძე მიიჩნევს, რომ საპარლამენტო არჩევნები რა სისტემითაც უნდა ჩატარდეს, „ქართული ოცნება“, ნებისმიერ შემთხვევაში, მყარ გამარჯვებას მოიპოვებს. მისი თქმით, „ქართული ოცნება“ შეთანხმებას პირნათლად შეასრულებს და გუნდი მთლიანად დაუჭერს მხარს 120/30-ზე საარჩევნო სისტემას. „თუ ოპოზიციის ნაწილი სხვა ოპოზიციასაც აიყოლიებს და ისევ დარჩება 77/73-ზე სისტემა, ამ შემთხვევაშიც, ძალიან მყარად მოვიგებთ და უფრო დიდი უპირატესობითაც. მგონია, რომ ამათ არ ყოფნით უკვე ადგილები, რადგან მაჟორიტარობაზე იმდენმა განაცხადა პრეტენზია, აღარ ჰყოფნით 120/30-ზე და სჭირდებათ მეტი მაჟორიტარი იყოს. ამას ნახევრაე ხუმრობით ვამბობ, მაგრამ რეალურად, თუ ერთ ადამიანზე, დავუშვათ, ერთ კრიმინალზე „ჩამოკიდებენ“ ამ პროცესს და იტყვიან, რომ თუ კონკრეტული ადამიანი არ გათავისუფლდება, თუ ხელისუფლება არ ჩაერია მართლმსაჯულებაში და მისი გარეთ გამოშვება არ უზრუნველყო, მაშინ ჩვენ არ მივცემთ ხმას საკონსტიტუციო ცვლილებებსო, ეს მათი საქმეა. ნებისმიერ შემთხვევაში, 120/30-ზე იქნება, თუ ძველი სისტემით, რომელიც თავის დროზე სწორედ თავად ჩააგდეს და მაშინაც მოატყუეს საზოგადოება, მაშინ არც ის არის პრობლემა, რომ იგივე სისტემით გავიდეთ არჩევნებზე და კიდევ უფრო დამაჯერებლად დავამარცხოთ ოპოზიცია“, - განაცხადა მამუკა მდინარაძემ.​