თბილისის საქალაქო სასამართლოში ცოტნე გამსახურდიას ჯგუფურად მკვლელობის მცდელობის საქმეზე პირველი სასამართლო პროცესი დღეს გაიმართება. გამსახურდიების ოჯახის ადვოკატის, ამირან გიგუაშვილის განცხადებით, დღევანდელ პროცესზე მტკიცებულებების შეფასება მოხდება. „გაიმართება პირველი სასამართლო სხდომა ცოტნე გამსახურდიას ჯგუფურად მკვლელობის მცდელობის ფაქტზე დაკავებული პირების მიმართ. ეს არის ორი ადამიანი – გიორგი სოლოღაშვილი და ტატო ღარიბაშვილი. ხოლო დანარჩენი სამს, ვინც ასევე პასუხისგებაშია მიცემული, ბრალდება, რომ მათ არ ითანამშრომლეს გამოძიებასთან. მათთან დაკავშირებითაც ასევე ჩატარდება წინასასამართლო სხდომა. უნდა შეფასდეს, არის თუ არა საკმარისი მტკიცებულებები, რომ არსებითი განხილვა განხორციელდეს ამ საქმეზე. არაერთხელ გავეცანი გამოძიების მასალებს და მიმაჩნია, რომ საქმეზე არსებობს პირდაპირი სახის მტკიცებულებები იმ ფაქტის დასადასტურებლად, რომ აღნიშნულ პირებს, ვგულისხმობ პირველ რიგში ცოტნე გამსახურდიას მკვლელობის მცდელობაში ბრალდებულ ორ პირს, გამოუტანონ გამამტყუნებული განაჩენი“, – აცხადებს ადვოკატი. მისივე თქმით, აქვს მოლოდინი, რომ საქმეზე გამამტყუნებელი განაჩენი დადგება. მოსამართლემ დღეს უნდა გადაწყვიტოს, ეს საქმე მაღალი ალბათობით შეიცავს იმ მტკიცებულებებს, რომ დადგეს გამამტყუნებელი განაჩენი თუ არ შეიცავს. მე მიმაჩნია, რომ ამ საქმეზე არსებობს პირდაპირი მტკიცებულებები, რომლებიც ადასტურებს ბრალდების სახით მიცემული პირების ბრალეულობას. ჩემი აზრით, ამ საქმეზე გამამტყუნებელი განაჩენი დადგება და ეს არის ჩემი მოლოდინი“, – განაცხადა ადვოკატმა, ამირან გიგუაშვილმა. საქართველოს პირველი პრეზიდენტის შვილი ცოტნე გამსახურდია 2019 წლის 19 დეკემბერს, ვერაზე , საკუთარ სახლთან დაჭრეს. მას თავდაპირველად ხეჩინაშვილის კლინიკაში მკურნალობდნენ, შემდეგ კი, თურქეთის კლინიკაში გადაიყვანეს. #ცოტნე გამსახურდია#დაჭრა#სასამართლო პროცესი#Tbilisi Daily#DailyNews

20 ივნისის საქმეზე ბრალდებული თავდაცვის ყოფილი მინისტრის, ირაკლი ოქრუაშვილის საქმეზე სასამართლო განაჩენს 13 აპრილს გამოაცხადებს. აღნიშნულის შესახევ ოქრუაშვილის ადვოკატმა, მამუკა ჭაბაშვილმა განაცხადა როგორც ჭაბაშვილი განმარტავს, ირაკლი ოქრუაშვილს გამამართლებელი განაჩენის გამოტანის მოლოდინი არ აქვს. „მტკიცებულებებით განაჩენი რომ არ დადგება, ეს ყველასთვის გასაგებია. მტკიცებულებები არც ჰქონიათ, რაც ბუნებაში არ იყო, როგორ ექნებათ? აქ მთავარი სხვა რამ არის, ამ განაჩენის გამოტანას ჩქარობენ, მეორე საქმეზე მოწმეების დისტანციურად დაკითხვა უნდათ, მაშინ როცა, ყველა სხვა საქმე გადაგვიდეს, არ გვიტარებენ, მაგრამ ირაკლისთან მიმართებაში აბსოლუტურად სხვა მიდგომა აქვთ. სიმართლე გითხრათ, გამამართლებელი განაჩენის გამოიტანა ამ ვითარებაში, როცა პოლიტიკა უფრო მაღლაა, ვიდრე სამართალი, ირაკლისაც ეეჭვება, მაგრამ ყველაფერი შეიძლება მოხდეს“, - განაცხადა ჭაბაშვილმა. ცნობისთვის, ირაკლი ოქრუაშვილი 20 ივნისის აქციის დარბევისას სისხლის სამართლის კოდექსის 225-ე მუხლით გათვალისწინებული დანაშაულისთვის დააკავეს, რაც ჯგუფური ძალადობის ხელმძღვანელობას და მასში მონაწილეობას გულისხმობს. #politics #news #opinion #სასამართლო #შსს #სიახლე #პოლიტიკა #20ივნისი

პოლიტპატიმრები - დასჯილი დამნაშავეები თუ გარემოებათა მსხვერპლნი? ,,ხელისუფლების დამხობის შემდეგ ამ ციხის კარები ფართოდ გაიღება და ყველა პოლიტპატიმარი გათავისუფლდება” - ეს მატროსოვის ციხიდან გამოსული ვანო მერაბიშვილის პირველი გზავნილია ქართული საზოგადოებისადმი. ჩნდება კითხვა - ვინ არიან ეს პოლიტპატიმრები? დასჯილი დამნაშავეები თუ გარემოებათა მსხვერპლნი? აღსანიშნავია, რომ თავად ვანო მერაბიშვილთან მიმართებით პოლიტპატიმრის სტატუსის განსაზღვრა მუდამ მსჯელობის საგანს წარმოადგენდა. ოპოზიციური სპექტრი დღემდე აპელირებს მერაბიშვილის პოლიტიკური ნიშნით დევნასა და გასამართლებაზე. თავის დროზე სტრასბურგის დიდმა პალატამ დაადასტურა, რომ მართალია ვანო მერაბიშვილს წინასწარი პატიმრობა „ნაციონალურ მოძრაობასა” და ,,ქართულ ოცნებას” შორის მწვავე პოლიტიკური დაპირისპირების ფონზე“ მიესაჯა, თუმცა არ არსებობს საკმარისი არგუმენტები იმის საჩვენებლად, რომ დაპატიმრების მთავარი მიზანი ქართული პოლიტიკიდან მისი ჩამოშორება და არა მის წინააღმდეგ სისხლის სამართლებრივი წარმოების სათანადო განხორციელება იყო. ამგვარად, შეიძლება ითქვას, ვანო მერაბიშვილს პოლიტიკურ პატიმრად მხოლოდ საკუთარი თანაგუნდელები და თანამოაზრეები მიიჩნევენ. აღსანიშნავია, რომ ოპოზიციონერისთვის რაიმე დანაშაულში ბრალის წაყენება ნებისმიერ შემთხვევაში მის პოლიტიკურ დევნას არ ნიშნავს. კანონის დარღვევისას ნებისმიერმა პირმა უნდა აგოს პასუხი, ხელისუფლების ოპონენტის დაკავება კი შესაძლოა საერთოდ არ უკავშირდებოდეს პოლიტიკურ სარჩულს. თუმცა, თუ საქმის წარმოება მნიშვნელოვანი დარღვევებით მიმდინარეობს და პირს არაადეკვატურ სასჯელს უსჯიან, მაშინ ჩნდება გონივრული ეჭვი, რომ საქმეში პოლიტიკური მოტივები არსებობს. პოლიტპატიმარში არ მოიაზრება მხოლოდ ის პოლიტიკური პერსონა, რომელსაც დანაშაული არ ჩაუდენია. ამ სტატუსის განსაზღვრისას მნიშვნელოვანია პოლიტიკური კონტექსტის გააზრებაც, თუ როდის, რა გარემოებებში მოხდა პირის დაკავება, რა მოვლენები უძღოდა თავისუფლების აღკვეთას წინ, ვის ინტერესებში შედიოდა ამა თუ იმ პერსონის პოლიტიკური სცენიდან ჩამოშორება და ა.შ ასევე, მნიშვნელოვანია საკითხია რამდენად არსებობს ნდობა სასამართლოს და კონკრეტულად იმ მოსამართლის მიმართ, ვინც საქმეს განიხილავს. მაგალითად, გიგი უგულავას შემთხვევაში სამართლებრივ მდგენელთან ერთად გამოიკვეთა ინტერესთა კონფლიქტიც. უგულავას უზენაესმა სასამართლომ 3 წლით პატიმრობა მიუსაჯა, მისი საქმე კი მოსამართლე შალვა თადუმაძემ განიხილა, რომელიც ამ საქმის თავდაპირველი მიმდინარეობისას გენერალური პროკურორის თანამდებობას იკავებდა და თავად იყო უგულავას ბრალმდებელი. აქედან გამომდინარე გაჩნდა ობიექტური ეჭვი, რომ თადუმაძე ვერ იქნებოდა მიუკერძოებელი მსაჯული. აღსანიშნავია, რომ უგულავას დაკავებას წინ უძღოდა პოლიტიკური კონტექსტიც - წინასაარჩევნო პერიოდი და საარჩევნო სისტემასთან დაკავშირებული მოლაპარაკებები. უზენაესი სასამართლოს გადაწყვეტილებამ ევროპარლამენტარებშიც გააჩინა კითხვები პროცედურასთან, მის დროულობასა და მოტივაციასთან დაკავშირებით. მათი შეფასებით, უგულავას დაკავება კიდევ უფრო ამძაფრებს დაძაბულობას საქართველოში შექმნილ ისედაც რთულ პოლიტიკურ ვითარებაში. ოპოზიციურ სპექტრში პოლიტპატიმრად მიიჩნევენ ირაკლი ოქრუაშვილსაც. იგი 20-21 ივნისის მოვლენების შემდეგ დააკავეს და ბრალი 225-ე მუხლით წაუყენეს, რაც მასობრივი ძალადობის ორგანიზებას, ხელმძღვანელობას ან მონაწილეობას გულისხმობს. მმართველი გუნდის ოპონენტებმა ოქრუაშვილის დაკავებაში პოლიტიკური მოტივების ძებნა დაიწყეს, ხელისუფლების წარმომადგენლები კი აცხადებდნენ, რომ ოპოზიციის წარმომადგენლებს პარლამენტის შტურმით აღების მცდელობა ჰქონდათ, რაც კანონის წინაშე არავის არ უნდა ეპატიოს. პოლიტიკური ინტერესების შესახებ ეჭვს აჩენს სასამართლო პროცესების გაჭიანურება, დაინტერესებული მოწმეების არსებობა და დისკრიმინაციული მიდგომებიც. ოპოზიცია პოლიტიკურ პატიმრად ასახელებს გიორგი რურუასაც, ასევე, 20-21 ივნისის მოვლენების დროს დაკავებულ აქტივისტებს - ბესიკ თამლიანს, ზურაბ ბუდაღაშვილს, კახაბერ კუპრეიშვილსა და ცოტნე სოსელიას. ოპოზიციასა და სამოქალაქო სექტორში მიიჩნევენ, რომ დღეს ხელისუფლება პოლიტიკური ნიშნით დევნის ბადრი ჯაფარიძეს, მამუკა ხაზარაძეს, ნიკა მელიას, გიგა ბოკერიას, ნიკა გვარამიას და ა.შ აღნიშნავენ, რომ წინასაარჩევნოდ ამ ადამიანების წინააღმდეგ აღძრული საქმეები სწორედ პოლიტიკურად აქტიური ფიგურების გენეიტრალებასა და დისკრედიტაციას ისახავს მიზნად. ამაზე აქტიურად მიანიშნებენ ქვეყნის საერთაშორისო პარტნიორებიც. ასეა თუ ისე, პოლიტიკოსობა ინდულგენცია არ არის და იგი არ იძლევა ხელშეუხებლობის გარანტიას. კანონის წინაშე ყველა თანასწორია და სწორედ ეს არის დემოკრატიული საზოგადოების ერთ-ერთი ფუნდამენტური პრინციპი. ამასთანავე, მნიშვნელოვანია, საქართველოში არსებობდეს სამართლიანი და ობიექტური მართლმსაჯულება, რომელსაც ნდობის მაღალი ხარისხი ექნება.#თბილისი #საქართველო #ვანო #მერაბიშვილი #გიგი #უგულავა #შალვა #თადუმაძე #ირაკლი #ოქრუაშვილი #გიორგი #რურუა #პოლიტპატიმრები #tbilisidaily

რატომ არ თანამშრომლობენ ნარეკვავის დასახლებაში მომხდარ ჩხუბში მონაწილე პირები სრულად გამოძიებასთან - იქამდე, ვიდრე ექსპერტიზა გიორგი შაქარაშვილის გარდაცვალების ზუსტ მიზეზებს დაადგენს, ამავე საქმეზე დაკავებული 17-ვე პირი ისევ ამტკიცებს, რომ ყველა უდანაშაულოა. ამ ვერსიას მათი ადვოკატები სამართლებრივად იმით ხსნიან, რომ საქმეში არსებული მტკიცებულებებით, არანაირი დანაშაული არ იკვეთება. ეს პოზიცია პირველი ინსტანციის მოსამართლემ უარგუმენტოდ მიიჩნია, რის გამოც ახალგაზრდა ფეხბურთელის გარდაცვალების საქმის ფარგლებში დაკავებული ყველა ახალგაზრდა პატიმრობაში დატოვა. უფლებადამცველები ამ გადაწყვეტილების გასაჩივრებას გეგმავენ. საქმის ოქროს მოწმეს - გურამ ამირხანაშვილს, როგორც ცნობილია, გამოძიებისთვის 4 ჩვენება აქვს მიცემული. დღეს უფლებადამცველები საუბრობენ იმაზე, რომ ჩვენებების ნაწილი არის განსხვავებული, ანუ გურამ ამირხანაშვილი დაახლოებით 2 ჩვენებაში წერს, რომ მას თავისუფლება "ტოიოტა კამრის" მგზავრებმა უკანონოდ აღუკვეთეს და ნაწილ ჩვენებებში ის საუბრობს იმაზე, რომ მას შეეძლო "ტოიოტა კამრის" ავტომობილიდან გადმოსვლა, თუმცა თავისი ნებით წამოჰყვა თბილისში. უფლებადამცველები ამბობენ, რომ ეს მათ ბევრ კითხვას უჩენს. მოსამართლის გადაწყვეტილება - პატიმრობა კი მათ სწორედ ამის გამო უსამართლოდ მიაჩნიათ. "სასამართლომ მიიღო ძალიან დაუსაბუთებელი და უკანონო გადაწყვეტილება. კერძოდ, მან ასე უაპელაციოდ არასრულწლოვანს შეუფარდა ყველაზე მძიმე აღკვეთის ღონისძიების სახით პატიმრობა. აქედან გამომდინარე, ჩვენ გავასაჩივრებთ ამ გადაწყვეტილებას. მან არ გაიზიარა მთელი რიგი არგუმენტაცია, რომელიც დაცვის მხარემ წარვუდგინეთ. მან არ გაიზიარა ის არგუმენტაცია, რომ სახელმწიფო ინსპექტორის სამსახურში დაწყებული არის გამოძიება არასრულწლოვანზე ჩვენების მიცემისთვის იძულება და მასზე ზეწოლა და ყველა ამ არგუმენტზე მან, უბრალოდ, თვალი დახუჭა," – აცხადებს ადვოკატი გიორგი გელხაური. საკმაოდ ბევრი კითხვა არსებობს კვლავ იმასთან დაკავშირებით, თუ რა ბედი ეწია რეალურად გიორგი შაქარაშვილს მაშინ, როდესაც უფლებადამცველები საუბრობენ, რომ მათი დაცვის ქვეშ მყოფები უდანაშაულონი არიან და მათ ინციდენტში მონაწილეობა არ მიუღიათ. "არ არსებობდა ფაქტობრივი და არც ფორმალური საფუძველი აღკვეთის ღონისძიების გამოყენებისა, ხოლო თუ სასამართლო ჩათვლიდა, რომ არსებობდა დასაბუთებული ვარაუდის სტანდარტი, ეს მინიმალური სტანდარტი, ჩვენ ვფიქრობდით, რომ არსებობდა რიგ შემთხვევებში, გირაოს გამოყენების შესაძლებლობა. ჩვენ 48 საათის განმავლობაში კანონი გვანიჭებს უფლებამოსილებას გავასაჩივროთ ეს სადაო განჩინება უკვე სააპელაციო სასამართლოს საგამოძიებო კოლეგიაში. ჩვენ ვფიქრობთ, რომ უკვე სააპელაციო სასამართლო უფრო სრულყოფილად და უფრო კანონიერად, სამართლიანად განიხილავს აღნიშნულ საჩივარს," - განაცხადა ადვოკატმა ვასილ მამულაშვილმა. "კურიერი" ასევე ვახტანგ ჩიქოვანისა და ნიკა ჟვანიას ადვოკატს ესაუბრა. შეგახსენებთ, რომ ვახტანგ ჩიქოვანი არის პირი, რომელსაც აგარაკზე მომხდარი დაპირისპირების დროს თავის არეში მიაყენეს დაზიანებები, ის ჩაჯდა ერთ-ერთ ავტომობილში და ერთ-ერთი ვერსიით, თბილისში ჩამოვიდა, რათა მათი ახლობლებისთვის დახმარება ეთხოვა, შემდეგ კი გამოძიების ვერსიით ის მის მეგობრებთან ერთად ნარაკვევის ტერიტორიაზე შურის საძიებლად ბრუნდება. ნიკა ჟვანიას რაც შეეხება, ერთ-ერთი ვერსიით, სწორედ ის იყო პირი, რომელსაც რკინის ხელკეტი ეჭირა და გიორგი ქათამაძეს და კოკო ღიბრაძეს გაუსწორდა. ის საქმეში "დიჯეის" სტატუსით ფიგურირებს. ამ გარემოებების მიუხედავად, დღეს მისი უფლებადამცველიც ფიქრობს, რომ მისი დაცვის ქვეშ მყოფები უდანაშაულოები არიან და ისიც მოსამართლის გადაწყვეტილების გასაჩივრებას აპირებს. "აღნიშნული განჩინება მოსამართლის აღკვეთის ღონისძიების სახით პატიმრობის გამოყენებასთან დაკავშირებით არ ჩაგვბარებია. დღეს, დღის მეორე ნახევარში ჩაგვბარდება ჩაგვბარდება აღნიშნული განჩინება და გაცნობის შემდგომ ჩვენ გავასაჩივრებთ სააპელაციო სასამართლოში. ბრალად წარდგენილ ქმედებას გამოვრიცხავთ. მტკიცებულებების საფუძველზე გამოირიცხება ბრალად წარდგენილი ქმედება როგორც ვახტანგ ჩიქოვანის, ასევე ნიკა ჟვანიას შემთხვევაში," - აცხადებს ვახტანგ ჩიქოვანისა და ნიკა ჟვანიას ადვოკატი, არჩილ ბერიანიძე. დაკავებულებს, რომელთა შორის 3 არასრულწლოვანია, გამოძიება თავისუფლების უკანონოდ აღკვეთას, ჯგუფური ძალადობის ორგანიზებასა და მასში მონაწილეობას, ასევე ხულიგნობასა და დანაშაულის შეუტყობინებლობას ედავება. წყარო: რუსთავი 2

ბუტა რობაქიძის საქმეზე ირაკლი ოქრუაშვილის სასამართლო პროცესი გაიმართა. ყოფილი მაღალჩინოსნის წინააღმდეგ ჩვენება მსჯავრდებულებმა - შინაგან საქმეთა სამინიტროს საზოგადოებასთან ურთიერთობის სამსახურის ყოფილმა უფროსმა გურამ დონაძემ და საპატრულო პოლიციის თბილისის მთავარი სამმართველოს ყოფილმა უფროსმა ზურაბ მიქაძემ მისცეს. ირაკლი ოქრუაშვილის ადვოკატის თქმით, მსჯავრდებულებმა აღნიშნული ჩვენება საპროცესო შეთანხმების სანაცვლოდ მისცეს. "ეს მოწმეები რამდენჯერმე არიან დაკითხული 2012 წლიდან და აბსოლუტურად სხვადასხვა ჩვენებებს იძლევიან. კანონი გვეუბნება, რომ ასეთი მოწმეების ჩვენება სასამართლომ არ უნდა გაიზიაროს. ის, რაც გვაქვს საქმეში, სასამართლოს არ მისცემს იმის საშუალებას, რომ გამამტყუნებელი განაჩენი გამოიტანოს," - განაცხადა ადვოკატმა მამუკა ჭაბაშვილმა.

თავდაცვის ყოფილი მინისტრი ირაკლი ოქრუაშვილი სასამართლომ დამნაშავედ ცნო და მას 5 წლით თავისუფლების აღკვეთა შეუფარდა. აღნიშნული გადაწყვეტილება თბილისის საქალაქო სასამართლოს მოსამართლე ლავრენტი მაღლაკელიძემ გამოაცხადა გამოძიება ირაკლი ოქრუაშვილს 20-21 ივნისის მოვლენებთან დაკავშირებით სისხლის სამართლის კოდექსის 225-ე მუხლის პირველი და მეორე ნაწილით გათვალისწინებულ დანაშაულს ედავება, რაც მასობრივი ძალადობის ორგანიზებას, ხელმძღვანელობას ან მონაწილეობას გულისხმობს. შეგახსენებთ, რომ, ირაკლი ოქრუაშვილი 20 ივნისის საქმეზე სისხლის სამართლის კოდექსის 225-ე მუხლის პირველი და მეორე ნაწილით გათვალისწინებული დანაშაულისთვის დააკავეს, რაც ჯგუფური ძალადობის ხელმძღვანელობასა და მასში მონაწილეობას გულისხმობს. ჯგუფური ძალადობის ხელმძღვანელობა 6-დან 9 წლამდე, მასში მონაწილეობა კი 4-დან 6-წლამდე თავისუფლების აღკვეთას ითვალისწინებს. ირაკლიოქრუაშვილი #პატიმრობა #tbilisidaily

როგორც საზოგადოებისთვისაა ცნოილი, 13 აპრილს გორის მერობის და მაჟორიტარობის ყოფილ კანდიდატს, ირაკლი ოქრუაშვილს, სასამართლომ 5 წლით თავისუფლების აღკვეთა მიუსაჯა, საქმეზე, რომელიც ეხებოდა 20 - 21 ივნისის „გავრილოვის ღამედ“ ცნობილ მოვლენებში მონაწილეობას. კერძოდ სასამართლომ ოქრუაშვილი დამნაშავედ ცნო: „ჯგუფურ მოქმედებაში მონაწილეობისათვის, რასაც თან ახლდა ძალადობა, რბევა, სხვისი ნივთის დაზიანება და განადგურება, იარაღის გამოყენებით ხელისუფლების წარმომადგენლისადმი წინააღმდეგობა და მათზე თავდასხმა“, საქმეში. ამბავი, რომელიც არ შეიძლება, ერთ ჩვეულებრივ სასამართლო პროცესად ჩაითვალოს მცირე ისტორიულ შესავალს საჭიროებს. კონტექსტი რომელიც თან ახლავს 20-21 ივნისის საპროტესტო აქციებს და მას შემდგომ განვითარებულ მოვლენებს, დამატებით წონას სძენს, გავრილოვის ღამეს და მის შემდგომ დაკავებულ ადამიანების პროცესს. გასული წლის 20 ივნისის შემდგომ, ქვეყანაში არსებული პოლიტიკური ტემპერატურა და დუღილი, რომელიც ყველაზე მძლავრად პანდემიამდე შეიგრძნობოდა, ნელ-ნელა გასცდა ქვეყნის საზღვრებს და მკაცრი შეფასებები საერთაშორის პარტნიორებისგანაც წამოვიდა. გაჩნდა კითხვები, ქვეყანაში პოლიტიკური პატიმრების არსებობის და სასამართლოს, როგორც პოლიტიკური ზემოქმედების იარაღად გამოყენების შესახებ. განსაკუთრებით გამწვავდა ვითარება, ხელისუფლების მხრიდან, პროპორციული სისტემით არჩევნების ჩატარების დაპირების ჩაგდების შემდგომ. ყოველივე ამას მოჰყვა, მთელი ოპოზიციური სპექტრის გაერთიანება. ქვეყანაში შეიქმნა კრიზისული ვითარება. ვერ ხდებოდა შეჯერება საარჩევნო სისტემაზე. ხელისუფლება არ აღიარებდა საკონსტიტუციო ცვლილების განზრახ ჩაგდებას, ისევე როგორც 20 ივნისის და შემდგომი პერიოდს დაპატიმრებულთა მიმართ, პოლიტიკურ ანგარიშწორებას. არსებული კრიზისიდან გამოსავლისთვის კი დაიწყო პარტნიორი ქვეყნების ელჩების მონაწილეობით, შეხვედრების ორგანიზება ოპოზიციასა და ხელისუფლების წარმომადგენლებს შორის, მოლაპარაკებები მძიმე და ხანგრძლივი იყო, საბოლოოდ კი აშშ-ს ელჩისა და ევროკავშირის წარმომადგენლის ხელშეწყობით, მიღწეულ იქნა დოკუმენტზე ხელმოწერა, რომლის ერთ-ერთი პუქტი, სასამართლოს და პროკურატურის პოლიტიკური მიზნით გამოყენების დაუშვებლობას გულისხმობდა. ოპოზიცია აცხადებდა, რომ ერთ-ერთი მთავარი პუნქტი, სწორედ 20 ივნისის შემდგომ დაპატიმრებულტა გათავისუფლებას გულისხმობდა. სწორედ ამ დოკუმენტზე შეთანხმების შემდგომ მოხდა გავრილოვის ღამის საქმეზე დაკავებული, ბესიკ თამლიანის გათავისუფლება და შეიქმნა განცდა, რომ აღნიშნული პროცესი გაგრძელდებოდა, მათ შორის გიორგი რურუას, გიგი უგულავასა და ირაკლი ოქრუაშვილთან მიმართებაში, თუმცა მალევე დაიწყო ახალი კორონავირუსის პანდემია და როგორც მსოფლიოში, ისე საქართველოში პოლიტიკური ცხოვრების დღის წესრიგი შეიცვალა. გუშინ სასამართლომ ირაკლი ოქრუაშვილს პატიმრობა შეუფარდა და ოპოზიციას ამ ყველაფერზე მკვეთრი რეაქცია ჰქონდა, მათ შორის ე.წ. პანდემიისას აღებულ მორატორიუმზე უარის თქმის თუ იმ შეთანხმებიდან გასვლიდან, რომელიც მძიმე მოლაპარაკებების გზით იქნა მიღწეული. ფაქტია, შეიქმნა განცდა, რომ ხელისუფლებამ, როგორც პროპორციულ არჩევნების დაპირების ჩაგდების შემდგომ, მეორედ თქვა გარკვეულ შეთანხმების შესრულებაზე უარი და ეს იმ ვითარებაში, როდესაც ჰქონდათ რწმენა, რომ დასავლელ პარტნიორებს მსოფლიოში არსებული ვითარებიდან გამომდინარე საქართველოსთვის არ ეცალათ. თუმცა დღეს განცხადება გააკეთა აშშ-ს საელჩოს და მისი შინაარსი, სწორედ ამყარებს ზემოთ გამოთქმულ ეჭვებს: „ირაკლი ოქრუაშვილის დაპატიმრების დრომ და გარემოებამ გამოიწვია შეშფოთება პოლიტიკურ ჩარევასა და შერჩევითი სამართლის გამოყენებასთან დაკავშირებით. ეს საქმე ჩრდილს აყენებს სამართალწარმოების მიუკერძოებლობას — საკითხს, რომლის ირგვლივ არსებული შეშფოთების გაქარწყლებას ემსახურებოდა 8 მარტის ერთობლივი განცხადება. ჩვენ მოვუწოდებთ ყველა ხელმომწერ მხარეს, სრულად დაიცვან 8 მარტის შეთანხმება.“ საეჭვოა, აღნიშნული საკიტხზე პოზიციის დაფიქსირება, მხოლოდ აშშ-ს მხრიდან ამოიწუროს და მოლაპარაკებების მეორე თავდები ევროკავშირის მხრიდანაც მოყვება, თუმცა აქ კიდევ ერთი საკითხია, რომელიც როგორც ამ ქვეყნის მოქალაქეებს უდნა გვაფიქრებდეს და გვაწუხებდეს. რამდენ ხანსაც არ უნდა გაგრძელდეს კორონა ვირუსით გამოწვეული საგანგებო მდგომარეობა, საკარანტინო რეჟიმი თუ კომენდატის საათი, ფაქტია ჩვენი ქვეყანა ღრმა ეკონომიკური გამოწვევების წინაშე აღმოჩნდება. ჩვენ ეკონომიკა ძალიან სუსტია, მკვეთრად ჩამოუვარდება მთელ რიგ ასპექტებში, თანამედროვე განვიტარებულ ეკონომიკებს და სწორედ ასეთი ქვეყენბი აღმოჩნდებიან მოწყვლადები, პანდემიის გადავლის შემდგომ. ჩვენ არ ვართ ისეთი მძლავრი კავშირის წევრი, როგორიც ევვროკავშირია და სწორედ, აქ აუცილებელია ისეთი პარტნიორების მხარდაჭერა, როგორიცაა აშშ, დიდი ბრიტანეთი თუ ევროკავშირის წამყვანი ქვეყნებია და სწორედ ამის ფონზე, სასამართლოს გუშინდელი გადაწყვეტილება, დიდი და სახიფათო გამოწვევების წინაშე გვაყენებს, პარტნიორებთან ურთიერთობაში თუ იმ ეკონომიკური კრიზისიდან გამოსვლის მხრი, რომელშიც ჩვენი ქვეყანა, არათუ აღმოჩნდება, არამედ უკვე დღეს არის.#გორი #სასამართლო #კორონავირუსი #ირაკლიოქრუაშვილი #გავრილოვისღამე #პოლიტპატიმრები #აშშ #goridaily

სააპელაციო სასამართლოში მიხეილ კალანდიას სასამართლო პროცესი გაიმართება. სხდომაზე დაცვის მხარე პირველ ინსტანციაზე გამოკვლეული ყველა მტკიცებულების ხელახალ გამოკვლევას მოითხოვს. ჯერჯერობით უცნობია დაესწრება თუ არა პროცესს თავად მიხეილ კალანდია . ადვოკატი მიიჩნევს, რომ კალანდიას დისტანციური მონაწილეობით მსჯავრდებულის მიმართ უშუალობის პრინციპი ირღვევა. „სხდომას ადვოკატები დავესწრებით. უშუალოდ ჩატარდება სხდომა. დადგება ჩვენი შუამდგომლობები, რომელიც უნდა იქნას განხილული სააპელაციო ინტანციაზე. შუამდგომლობები ეხება იმ დარღვეული სამართლიანი სასამართლოს უფლების დარღვევის შესახებ აღდგენას, რასაც სააპელაციო ინსტანციას რამდენიმე ხანია ვთხოვთ. საქმე ეხება ყველაზე არსებითი ხასიათის სამართლიანი სასამართლოს უფლების დარღვევას, რაც შეეხებოდა მოწმეების დაკითხვის ნაწილში, როდესაც მოსამართლე არ ასრულებდა თავის ფუნქციას ისე გამოიტანა განაჩენი“, - განაცხადა ადვოკატმა. შეგახსენებთ, რომ კალანდია თბილისში, ხორავას ქუჩაზე დავით სარალიძის ჯგუფურად დამამძიმებელ გარემოებებში ჩადენილი მკვლელობის ბრალდებით სამართალდამცველებმა 4 ივნისს დააკავეს. სასამართლომ დავით სარალიძის მკვლელობაში ბრალდებულ მიხეილ კალანდიას 15 წელი მიუსაჯა. მიუხედავად ამისა, არასრულწლოვანთა მართლმსაჯულების კოდექსიდან გამომდინარე, კალანდია საპატიმროში 11 წელსა და 3 თვეს გაატარებს.

ქუთაისში მამის მკვლელობაში ბრალდებულ მამაკაცს ორთვიანი წინასწარი პატიმრობა შეეფარდა. სხდომა ქუთაისის საქალაქო სასამართლოში დიატანციურად დღეს გაიმართა. დაკავებულის ადვოკატის ირაკლი შენგელიას თქმით, მოლოდინი ქონდათ, რომ მისი დაცვისქვეშმყოფი სასამართლოს დასრულებამდე აღკვეთის ღონისძიების გარეშე დარჩებოდა, რადგან საქმეში არსებული გარემოებები ამის შესაძლებლობას ტოვებდა. როგორც ადვოკატი აცხადებს, დაცვის მხარემ პროცესზე 10 000 ლარიანი გირაოს შუამდგომლობაც დააყენა, თუმცა მოსამართლემ არ გაითვალისწინა. დაცვის მხარე გადაწყვეტილების გასაჩივრებას და მუხლის გადაკვალიფიცირებას მოითხოვს. ადვოკატი აცხადებს, რომ დაკავებული მამის მიერ ნაცემია, მას სხეულზე დაზიანებებიც აქვს და ის იძულებითი მოგერიების მიზნით თავს იცავდა. რაც შეეხება დაკავებულს, ადვოკატის თქმით, ფაქტს აღიარებს და მომხდარს ინანიებს. შეგახსნებთ, 24 მაისს შვილმა მამა მოკლა. გამოძიება ოჯახის წევრის მიმართ დამამძიმებელ გარემოებაში ჩადენილ განზრახ მკვლელობის ფაქტზე, საქართველოს სისხლის სამართლის კოდექსის 11 პრიმა-109-ე მუხლის მე-2 ნაწილის "ვ" ქვეპუნქტით დაიწყო.

დღეს ცნობილი გახდა შაქარაშვილის საქმეზე ექსპერტიზის დასკვნა, რომლის საფუძველზე, 19 წლის ფეხბურთელის გარდაცვალებაზე საქმე ჯგუფურად განზრახ მკვლელობის მუხლით გადაკვალიფიცირდა. ამ საქმეზე 17 დაკავებულიდან ერთ-ერთი ბრალდებულის, გიგა ტატიაშვილის ადვოკატი გიორგი ყიფშიძე ამბობს, რომ ექსპერტიზის პასუხები საქმის შინაარსს მნიშვნელოვნად ცვლის. გიორგი ყიფშიძე, ადოკატი: ეს დასკვნა ერთ მიმართულებას კატეგორიულად ადასტურებს, მაგრამ სულაც არ გამორიცხავს იმ ჩვენს მითითებებს, რასაც ვვარაუდობდით, რომ ეს ადამიანი დამოუკიდებლად იქ ვერ ჩავარდებოდა. აქედან გამომდინარე, ვერსია, რომ წყალში ჩააგდეს და მერე გარდაიცვალა, ამ დასკვნით ფაქტობრივად, გამორიცხულია. კი გარდაიცვალა წყალში ჩავარდნის შემდეგ, მაგრამ ჩვენ თავიდანვე იმას ვამბობდით, რომ ის წყალში მოხვდა უკვე, სავარაუდოდ, გათიშულ მდგომარეობაში. - ანუ, ამ დასკვნით არ დასტურდება, რომ გათიშულ მდგომარეობაში ჩავარდა წყალში? - ზოგადი კონტექსტია იმიტომ, რომ ექსპერტი ვერ დაწერს იმას, რომ როცა გადააგდეს, იყო უგონოდ, ამას ექსპერტიზა ვერასდროს დაადგენს. - აბა, როგორ შეიძლება ამის დადგენა? - სამუშაო აქვს გამოძიებას, რომ ეს დაზუსტდეს. იქნებ, ჩვენებები, სხვა მტკიცებულებები მოიპოვოს იმიტომ, რომ მაინც ვარაუდის დონეზე გამოდის. როგორც ექსპერტი წერს, ჩარტყმული აქვს მძიმე რაღაცები, დაზიანებები აქვს მიყენებული და თან მტკიცებულებებით, რასაც ამბობენ ჩვენებებში „ოქროს მოწმეები“, შაქარაშვილი გარბოდა და მისდევდნენ. ადამიანი იბრძვის საკუთარი თავის გადასარჩენად და ჩანთას უდრტვინველად დებს სადღაც ბეტონზე და მერე წყალში ვარდება და იხრჩობა? - ეს ხომ წარმოუდგენელია! აქედან გამომდინარე, ამ დასკვნაში ლოგიკა არის, თუმცა სხვა დასკვნებია მოსასვლელი, რაც სურათს უფრო დააზუსტებს. გენეტიკური და უამრავი სხვა დასკვნა უნდა მოვიდეს, რაც უფრო შეცვლის სურათს. - პროკურატურამ, პრაქტიკულად, გვითხრა, რომ გიორგი შაქარაშვილი არის მოკლული, თან ჯგუფურად განზრახ მკვლელობით აღძრა საქმე. ეს უმძიმესი მუხლია და უვადო პატიმრობას ითვალისწინებს, არა? - დიახ, საშინელი მუხლია. ნასამართლევები თუ არ არიან, უვადო პატიმრობას არავინ მისცემს. 16-დან 20 წლამდე თავისუფლების აღკვეთას გულისხმობს ეს მუხლი. - მოკლედ, მთავარ კითხვად რჩება - ვინ მოკლა გიორგი შაქარაშვილი? - დიახ, რა თქმა უნდა. საგამოძიებოს დამატებითი კვლევები და გამოკითხვები და სპეციფიკური მოქმედებები აქვს ჩასატარებელი, რომ ეს დაამტკიცოს, რადგან მარტო ამ დასკვნით ვიღაცებზე წაყენებული ბრალი სასამართლოში ვერ იმუშავებს. არავინ ჩვენებას არ იძლევა, ყველა უარყოფს ბრალს და აქედან გამომდინარე, წარმოუდგენელი იქნება ამ მიმართულებით გამამტყუენებელი განაჩენის დაყენება. - როგორ ფიქრობთ, შეძლებს გამოძიება ამ დეტალების დაზუსტებას? - რაც ვნახე დასაწყისში, იმდენი სისულელე აქვთ გაკეთებული, ათმაგი შრომა მოუწევთ, რომ ის, რაც გაშვებულია, როგორმე შეავსონ და ინფორმაციული დეფიციტი არ იყოს საქმეში. ამისთვის ტიტანური შრომა აქვთ გასაწევი, მაგრამ უნდა ვაღიარო - ვატყობ, რომ მონდომება აშკარად აქვთ. რადგან, ალბათ, მოქმედებს საზოგადოებრივი ინტერესი და განსაკუთრებით თქვენი, მედიის, ფაქტორი. - ამ საქმეში ჩანთის დეტალს ყოველთვის ხაზს უსვამთ. ჩანთაზე დნმ-ის კვლევის პასუხი როდის იქნება ცნობილი? - დნმ-ის კვლევას შეიძლება, ცოტა დააგვიანდეს, რადგან ყველაზე რთული მოლეკულარული კვლევაა და საკმაოდ დიდი დრო სჭირდება. - თქვენი დაცვის ქვეშ მყოფის, გიგა ტატიაშვილის ბრალთან დაკავშირებით, გავრცელებული დასკვნის საფუძველზე, რაიმე იცვლება? _ აბსოლუტურად არაფერი. ამ საქმეს ასე გაბედულად იმიტომ მივყვები და ხმამაღლა იმიტომ ვლაპარაკობ, რომ ამაში დარწმუნებული ვარ და საერთოდ გამოვრიცხავ მის ბრალეულაბას ნებისმიერი მუხლით. - რატომ? - იმიტომ, რომ არანაირი ორგანიზება არ გაუწევია ამ ბავშვს. როგორ შეიძლებოდა, ორგანიზება გაეწია ნახევარ საათში და ორგანიზებული ჯგუფი შეექმნა? ლოგიკურად, ეს წარმოუდგენელი და არასერიოზულია. -გასაგებია, რომ შეიძლება ორგანიზებული ჯგუფის შექმნა არ დაუმტკიცდეს, მაგრამ ტატიაშვილს ხომ არ წარუდგება ბრალი შაქარაშვილის განზრახ მკვლელობაზე? - არა, ეს გამორიცხულია. საერთოდ არ აქვს შემხებლობა, ისეთი წყვეტა აქვთ, რომ ამათ იჩხუბეს, ტატიაშვილმა გააშველა, გადაარჩინა ის ბიჭიები „პოლიცია მოდის“ ძახილით და შემდეგ წამოვიდა თბილისში და 01:35 წუთზე უკვე ნახალოვკაშია და ამის ვიდეომტკიცებულებაც გაგვაჩნია. წყარო: ჰოთნიუსი შაქარაშვილი ექსპერტიზა კითხვები TbilisiDaily