გასული საუკუნის ბოლოს ტექნოლოგიების განვითარებამ უზრუნველყო ალტერნატიული ინფორმაციული სისტემის გაჩენა, რომელმაც მომხმარებლებს სრულიად ახალი შესაძლებლობები შესთავაზა. ინტერნეტმა გააფართოვა საკომუნიკაციო პერსპექტივები. მისმა მულტიმედიურმა და ჰიპეტექსტურმა შესაძლებლობებმა ხელი შეუწყო ინფორმაციის მომენტალურ, დროში შეუფერხებელ გადაცემას, მიმდინარე მოვლენებში აუდიტორიის მეტ ჩართულობას, უკუკავშირისა და რეაგირების გაჩენის შესაძლებლობას, თუმცა ახალი მედიის მზარდი პოპულარობის პირობებში ყალბი ინფორმაციის გავრცელებასთან დაკავშირებულმა გამოწვევებმაც მეტი აქტუალურობა შეიძინა. სოციალურმა სივრცემ ნებისმიერ ადამიანს შესაძლებლობა მისცა დროითი და სივრცითი შეზღუდვის გარეშე მიიღოს და გაავრცელოს ინფორმაცია, ეს უკანასკნელი კი შეიძლება იყოს როგორც რეალური და გადამოწმებული ფაქტი, ასევე, ტყული, ჭორი და დეზინფორმაცია, რაც სპეკულაციისა და ფალსიფიკაციის შესაძლებლობას აჩენს. ყალბი ამბები განსაკუთრებული ზიანის მომტანი კრიზისულ სიტუაციებშია და ეს კორონავირუსის პანდემიის პირობებშიც კარგად გამოჩნდა. ინტერნეტითა და სოციალური ქსელებით Covid 19-თან დაკავშირებით ხშირად მიმდინარეობს საზოგადოებრივი აზრის მართვა ფოტო-, ვიდეო- თუ ტექსტური მანიპულაციებით. ვრცელდება მითები, კონსპირაციული თეორიები, ითესება შიში და პანიკა, ამ ყველაფრის კონტროლის რეალური ბერკეტები და მექანიზმები კი არ არსებობს. გარდა ამისა, ფეისბუქში იქმნება ყალბი ანგარიშები იმ მედიკოსების სახელით, რომლებიც დღეს კორონავირუსთან ბრძოლაში ფრონტის წინა ხაზზე დგან. თავდაპირველად სოციალურ ქსელში გამოჩნდა ამირან გამყრელიძის სახელით შექმნილი ფეისბუქგვერდი. ფაქტს დაავადებათა კონტროლის ეროვნული ცენტრი გამოეხმაურა და აღნიშნა, რომ ამირან გამყრელიძე მხოლოდ ცენტრის ოფიციალური გვერდით სარგებლობს, დღეს კი ცნობილი გახდა, რომ მთავრობის ადმინისტრაციამ Facebook-ს ამირან გამყრელიძის სახელით ათობით ყალბი ანგარიში გააუქმებინა. დღესვე ინფექციური საავადმყოფოს სამედიცინო დირექტორმა, მარინა ეზუგბაიამ განაცხადა, რომ ფეისბუქში მისი სახელით გამოქვეყნებული ინფორმაციები სიმართლეს არ შეესაბამება. მედიკოსმა საზოგადოებას მოუწოდა, ყურადღება არ მიაქციონ ყალბ ანგარიშებს და განმარტა, რომ თავად სოციალური ქსელით საერთოდ არ სარგებლობს. ფაქტია, რომ ყალბი ანგარიშები ხშირ შემთხვევაში კოორდინირებულად მოქმედებენ, რათა სასურველი მიმართულებით წარმართონ საზოგადოებრივი აზრი და გავლენა მოახდინონ არსებულ სოციალურ-პოლიტიკურ დღის წესრიგზე. არსებობს გონივრული ეჭვი, რომ ამ ყალბი გვერდების მიღმა სწორედ პოლიტიკური ინტერესები იმალება. გარკვეული ჯგუფები ცდილობენ, შეარყიონ ხალხის რწმენა და დააჯერონ მოქალაქეები, რომ ხელისუფლება და ჯანდაცვის სისტემა კორონავირუსთან გამკლავებას ვერ შეძლებენ. ასევე, ყალბი ანგარიშები ცრუ ინფორმაციის გავრცელებით ხელს უწყობენ იმ ადამიანების მარგინალიზებას, რომელთაც დღეს საზოგადოებაში დიდი ნდობა გააჩნიათ. ესენი არიან პაატა იმნაძე, ამირან გამყრელიძე, თენგიზ ცერცვაძე, მარინა ეზუგბაია და სხვანი. აღნიშნული მედიკოსების სახელით ვრცელდება ცრუ იფორმაცია არსებული რესურსების, ეპიდსიტუაციიის, ვირუსის პრევენციისა და მისგან განკურნების მეთოდების შესახებაც. ამგვარად, შეიძლება ითქვას, რომ ე.წ ,,ფეიკ ნიუსებისა” და ყალბი ანგარიშების შექმნის უმთავრეს მიზანს საზოგადოებრივი აზრის მანიპულაციის გზით წარმართვა წარმოადგენს. პოლიტიკური ჯგუფები თუ ცალკეული პირები სოციალური ქსელის შესაძლებლობებს არაკეთილსინდისიერად იყენებენ და მიზანმიმართულად ავრცელებენ პროპაგანდისტულ მესიჯებს, რითაც ცდილობენ საყოველთაო დაბნეულობა გამოიწვიონ საზოგადოებაში. უწყვეტ საინფორმაციო ნაკადში მნიშვნელოვანია, მოქალაქეებმა გადაამოწმონ გავრცელებული ინფორმაციის წყარო, ვებგვერდის წარმომავლობა და სანდოობა, რათა უნებლიედ არ გახდნენ კორონავირუსთან დაკავშირებული დეზინფორმაციისა და პროპაგანდის მსხვერპლნი.#ყალბიანგარიში #ამირანგამყრელიძე #მარინაეზუგბაია #პაატაიმნაძე #კორონავირუსი #დეზინფორმაცია #ფეიკნიუსი #tbilisidaily

საქართველოს მთავრობის ადმინისტრაციამ Facebook-ს ამირან გამყრელიძის სახელით შექმნილი ათობით ყალბი ანგარიში გააუქმებინა. „მას შემდეგ, რაც ქვეყანაში დაიწყო კორონავირუსის შემთხვევების დაფიქსირება, დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელის ამირან გამყრელიძის სახელით, სოციალურ ქსელში შეიქმნა ათობით ყალბი ანგარიში, რომლის საშუალებითაც კონკრეტული ჯგუფები მიზანმიმართულად ავრცელებდნენ დეზინფორმაციას. აღნიშნული ყალბი ანგარიშების გაუქმების მოთხოვნით, მთავრობის ადმინისტრაციამ სოციალურ ქსელს მიმართა, რის შედეგადაც ამ დროისთვის ისინი უკვე დახურულია. ამასთან, ადმინისტრაცია აქტიურად იკვლევს საქართველოს სამედიცინო სფეროს სხვა წარმომადგენლების სახელით შექმნილ სხვა ყალბ ანგარიშებსაც”, - ნათქვამია მთავრობის ადმინისტრაციის მიერ გავრცელებულ ინფორმაციაში.#ამირანგამყრელიძე #ყალბი #ანგარიში #tbilisidaily

თბილისის ინფექციური საავადმყოფოს სამედიცინო დირექტორმა, მარინა ეზუგბაიამ უპასუხა ჟურნალისტის კითხვას, თუ როგორ შეაფასებდა იმუნოლოგ, დავით ნანობაშვილის განცხადებას, რომლის თქმითაც, იმ შემთხვევაში, თუკი ნიკა გვარამია Covid19-ით დაინფიცირდება, მას ექიმები არ უმკურნალებენ. ეზუგბაიას თქმით, ექიმები ყველა პაციენტს დახმარებას უწევენ და მკურნალობენ, განურჩევლად მისი გვარ-სახელისა, სქესისა და სტატუსისა. ,,წარმოუდგენელია, რომ ექიმმა ვინმეს არ უმკურნალოს. გილოცავთ ძალიან დიდ დღესასწაულს, რომელსაც ბზობა ჰქვია. ქრისტიანი ადამიანი უარს არასდროს არაფერზე ამბობს, მითუმეტეს ქრისტიანი ექიმი. შენი მტერი უნდა გიყვარდესო და პაციენტი ჩვეულებრივი ადამიანია, რომელსაც დახმარება სჭირდება. პაციენტს სახელი და გვარი არ აქვს, ჩვენ არც სქესზე ვსაუბრობთ და არც სხვა დეტალებზე, რაც იმას ნიშნავს, რომ პაციენტი პაციენტია, მას სხვა კრიტერიუმები არ სჭირდება. ის არის ავად და ავადმყოფს უნდა ვუმკურნალოთ, არ აქვს მნიშვნელობა, ის ჩვენი მეგობარი იქნება, მტერი თუ ვინ“, - განაცხადა ეზუგბაიამ.#ნიკაგვარამია #ეზუგბაია #პაციენტი #კორონავირუსი #tbilisidaily

ლილე აბსანძე რამდენიმე დღის წინ პირველი საუნივერსიტეტო კლინიკიდან გაწერეს. მანამდე იგი კლინიაში 28 დღის განმავლობაში Covid-19-ს მკურნალობდა. გამოჯანმრთელებული პაციენტი სოციალურ ქსელში აქვეყნებს ინფორმაციას განვლილი დღეების, მისი ფსიქოლოგიური მდგომარეობისა და კლინიკაში არსებული ვითარების შესახებ. უცვლელად გთავაზობთ პოსტს: "მგონი უკვე ყველამ იცით, მაგრამ იმ 139 ადამიანიდან, რომელიც covid19-ისგან გამოჯანმრთელდა, ერთ-ერთი მე ვარ. 28 დღე ვმკურნალობდი პირველ საუნივერსიტეტო კლინიკაში და იქედან საერთოდ სხვანაირ ქვეყანაში გამოვედი. მართალია, ძირითადად ყველანი იმაზე ხართ კონცენტრირებული ვირუსისგან თავი როგორ დაიცვათ, სახლში როგორ დარჩეთ და რა თქვა მარინა ეზუგბაიამ ამ დილით, მაგრამ მაინც მოგიყვებით, რა ხდება როცა კორონა გიდასტურდება და ამ სიგიჟეებს უკვე პალატიდან კითხულობ. აქვე აღვნიშნავ, რომ ამ ტექსტში წერია მხოლოდ და მხოლოდ ჩემი გამოცდილება, წყალგაუვალი სიმართლე ეს არ არის, და რა თქმა უნდა, ყველაზეც ნამდვილად არ ვრცელდება. ჩემი ამბავია მარტო. მე მარტის ბოლოს ერთ-ერთ კლინიკაში ვმკურნალობდი ფილტვების ბაქტერიული ანთებით. საერთო პალატაში შემოიყვანეს პაციენტი, რომელმაც კონტაქტები დამალა (მე ასე ვიცი) და როგორც შემდგომ აღმოჩნდა, კორონავირუსით იყო ავად. 2 დღე ამ ადამიანთან ერთად ვმკურნალობდი პალატაში და შემდეგ სახლში გამწერეს. კიდევ ორი დღის მერე, დამირეკა დაავადებათა კონტროლის ცენტრმა და გადამიყვანეს კლინიკაში. მეორე დღეს ლუგარის ლაბორატორიამ ამიღო ნაცხი ცხვირიდან და ხახიდან და 6 საათში დამიდასრუტდა კოვიდ-19. მოსაყოლად ხო ძალიან მარტივია, მაგრამ მგონი ყველაზე ცუდი დღე იყო ჩემს ცხოვრებაში. სანამ სასწრაფო მოვიდა, 20 წუთი ყვველაფერს განურჩევლად ვჩურთავდი ჩანთებში, თან მეტირებოდა, თან ვიგინებოდი, თან ჩემებს ვუყვიროდი ახლოს არ მოსულიყვნენ და არაფერში დამხმარებოდნენ და თან მარტო იმაზე ვფიქრობდი, რომ რა აზრი აქვს, უკვე ყველას გვჭირს. არ გვჭირდა ყველას, არავის ჭირდა ჩემ გარდა, მაგრამ ეს არც მაშინ ვიცოდი, არც მომდევნო 14 დღე ვიყავი დარწმუნებული და ბოლომდე ახლაც არ მჯერა. დღესაც, დედაჩემს რომ ველაპარაკები მარტო იმას ვუსმენ როგორ სუნთქავს და ხომ არ ახველებს. როგორც მე ვიკონტროლებდი ტემპერატურას ბოქსირებულ პალატაში, ისე ვაკონტოლებდი ოჯახის წევრების ტემპერატურას დისტანციურად და ობსესიურად. მე საშუალოზე ოდნავ მძიმე პნევმონია მქონდა, პლაქვენილიც ვსვი (კანფეტი ნამდვილად არ არის) და ხანდახან ჟანგბადსაც ვიშველიებდი სუნთქვისას. ჩემს შემთხვევაში, ხველა გვიან დაიწყო და არც ისე ძლიერი იყო, არც ტემპერატურა მქონია ძალიან მაღალი. ძირითადი სიმპტომები იყო ვერტიგო, გულის ტკივილი, გულმკერდის არეში ზეწოლა, თავის ტკივილი, დაბალი წნევა, დაბალი სიცხე და იშვიათად სუნთქვის გაძნელება. აქვე კიდევ ერთხელ დავწერ, რომ ვირუსი ძალიან ინდივიდუალურად უდგება ყველას და თუ თავბრუსხვევა იგრძენით, არ არის აუცილებელი კორონა გჭირდეთ მაინცდამაინც. პალატებს აქვს ძალიან თხელი კედლები და პაციენტების ხველება თავისუფლად გესმის, როგორ ელაპარაკებიან ახლობლებს ეგეც გესმის, როგორ ხდებიან უარესად, როგორ გადაყავთ რეანიმაციაში ან როგორ წერენ სახლში. ამიტომ მარტოობის შეგრძნება არ გაქვს, მარტო არ ხარ შარში. რთული ძირითადად ის არის, რომ კუბოებზე მიმების სქროლვა გიწევს ფეისბუქზე, ვიღაცეების დარიგების წაკითხვა რო ,,ნუ აი არ მესმის ეს ხალხი სად დადიოდა", ხშირად კითხულობ სიტყვას "დაუდევრობა" და ზუსტად იცი, რომ შენზე ფრთხილად არც არავინ ყოფილა და არც ახლაა არავინ. ალბათ, ამაზე უფრო დიდი სირთულეა ის, რომ დანამდვილებით არც შენ და არც არავინ იცის რა გჭირს, როგორ მორჩები ამისგან და მერე რა იქნება. მე ჩემმა ექიმმა პირდაპირ მიხრა, რომ ამ დაავადებას მე და შენ ახლა ერთად ვსწავლობთო, თავიდან დავიზაფრე, მაგრამ მალევე ეჩვევი. ეს იმასაც ნიშნავს, რომ როცა დაავადებას შენთან ერთად სწავლობენ, ყველა შესაძლო მხრიდან გაკონტროლებენ. იქ რომ ხარ, პანდემიას არ აბრალებ არავის, იმიტომ რომ სულერთია. მარტო იმ ჩაკეტილი პალატიდან ხედავ, რომ ეს საყოველთაო უბედურება უფრო დიდი რაღაცაა ვიდრე ქალი, რომელმაც კონტაქტები დამალა, იმიტომ რომ არ ჯეროდა, რომ თვითონ შეიძლება რაიმე დამართნოდა, უფრო დიდია ვიდრე რელიგიური დღესასწაული, მამაოების შეგონებებზე უფრო უტიფარია და სტატისტიკაზე უფრო მომაბეზრებელი. მიუხედავად იმისა, რომ ვინც მივლიდა თითქმის ვერავის ვცნობ სახეზე, დიდი, სულისშემხუთავი ეკიპირების გამო, უუუღრმესი მადლობა მინდა ვუთხრა ექთნებს, დამხმარეებს, სანიტრებს და მარინა ექიმს. მთელი ეს პანდემია ყველაზე მეტად მათ აწვება. ჩემხელა და ჩემზე პატარა სტუდენტები ყოველდღე მორიგეობენ და ეკიპირებაში იოფლებიან, არც ძინავთ წესიერად და ისინიც იზოლირებულები არიან ოჯახებისგან. ასევე, მადლობა ვინმე საბას, რომელიც ყველაზე კარგი კურიერია მსოფლიოში და ჩემს მეგობრებს, თბილი სიტყვებისთვის და გემრიელი ამანათებისთვის. თუ ვინმეს დაგიდასტურდათ ვირუსი, შეგიძლიათ მომწეროთ, დამირეკოთ და 24/7-ზე მომიყვეთ რა ხდება თქვენს თავს, რისი გეშინიათ, რა გაიმედებთ, რომელი ანალიზი რამხელა დისკომფოტს იწვევს და ა.შ. ძალიან გამეხარდება ვინმესთვის პატარ-პატარა სასარგებლო გამოცდილებების გაზიარებების საშუალება თუ მექნება. მე პირადად სულ ვეძებდი ეგეთ ადამიანს. P.S " ვაიმე, 37 მაქვს და კორონა ხო არ მჭირს" და მსგავსი ტექსტები შეგიძლიათ არ მომწეროთ, მაგას ადგენს მხოლოდ ტესტი."#კორონავირუსი #პაციენტი #გამოჯანმრთელებული #TbilisiDaily

თბილისის ინფექციური საავადმყოფოს სამედიცინო დირექტორის მარინა ეზუგბაიას განცხადებით, თერჯოლაში მცხოვრები, რომელსაც კოვიდ 19 დაუდასტურდა, მათთან არ მკურნალობდა. ერთ-ერთი ტელეკომპანიის კითხვაზე, რატომ არ ჩაუტარდა ამ პირს თავიდანვე ტესტი, მარინა ეზუგბაია აცხადებს, რომ ის შესაძლო შემთხვევებში არ შედიოდა, რადგან მოგზაურობის ისტორია ან დაავადებულ პირთან კონტაქტი არ ჰქონდა. „მოგვმართა ჩვენ ამ პაციენტმა. ეს პაციენტი თავისი კრიტერიუმებით არ შეესაბამებოდა შესაძლო შემთხვევას. მასთან მოხდა მდგომარეობის შეფასება, დიაგნოზის დასმა, შესაბამისი დანიშნულების მიცემა და ბინაზე გაშვება. თქვენ ანალიზის უნარი გაქვთ მგონი, შესაძლო შემთხვევაში არ შედიოდა. შესაძლო შემთხვევა ნიშნავს, რომ ყველა შემთხვევა არ განიხილება. შესაძლო კრიტერიუმებია, რომ მოხდეს გამორჩევა გამოსაკვლევი ადამიანების, იმიტომ რომ ყველა სიცხიანი და ყველა რესპირატორული დაავადებით არ შეიძლება განიხილებოდეს როგორც კოვიდ 19, მაშინ ამას ვერ გაუძლებს ვერასდროს ვერავინ. შესაძლო შემთხვევის განმარტებაა, როდესაც მას აქვს მოგზაურობის ისტორია ან კონტაქტი დაავადებულ ადამიანთან. თუ პირი ვერ გაიხსენებს, არ იტყვის, რომ მას რამე კონტაქტი ჰქონდა თუნდაც პირდაპირი ან ირიბი, ამ შემთხვევაში როგორც შესაძლო შემთხვევა არ ჩაითვლება. ქვეყანაში ძალიან მოწესრიგებულია, კრიტერიუმები კარგად ტარდება. შეხედეთ, მსოფლიოში რა ხდება. საქართველოში ხდება კონტროლირებადი, ზომიერი მატება დაავადების. 26 თებერვალს იყო პირველი შემთხვევა დაფიქსირებული და დღემდე გვყავს 115, ასეთი მაჩვენებელი საოცნებო იქნება მსოფლიოს ნებისმიერი ქვეყნისთვის, ეს იმას ნიშნავს, რომ არსებული კრიტერიუმების გამოყენება ხდება სწორად, ადეკვატურად და კარგად. თუ ვინმეს ეს არ მოსწონს, მისი პრობლემაა, რომ არ უხარია ქვეყნის წარმატება და ქვეყანაში არსებული კარგი შედეგები“ ,- განაცხადა ეზუგბაიამ.#stopcovid19 #covid19 #coronavirus #georgia

„საქართველოში არის 728 დადასტურებული შემთხვევა და დამთავრდა, ამას კომენტარები არ სჭირდება“ კორონავირუსით დაავადებულ პაციენტებთან დაკავშირებით ჩვენთან არსებული ყველა მონაცემი არის სწორი, დამალული არც ერთი შემთხვევა არ არის, – ასე გამოეხმაურა თბილისის ინფექციური საავადმყოფოს სამედიცინო დირექტორი მარინა ეზუგბაია სომხეთის ჯანდაცვის მინისტრის განცხადებას, რომლემაც საქართველოში კორონავირუსის გავრცელების მონაცემების სიზუსტეში ეჭვი შეიტანა. მარინა ეზუგბაიას განცხადებით, დღეს ქვეყანაში კორონავირუსი დადასტურებული აქვს 728 პაციენტს. „აქ ჩემს აზრებს დიდი მნიშვნელობა არ აქვს. ჭეშმარიტება ერთია, ქვეყნაში არის 728 დადასტურებული შემთხვევა. ფაქტების დამალვას აზრი არ აქვს. არავითარი მნიშვნელობა არ აქვს, ვის რა აზრი აქვს. არის 728 დადასტურებული შემთხვევა და დამთავრდა. ამას კომენტარები არ სჭირდება“, – განაცხადა მარინა ეზუგბაიამ. სომხეთის ჯანდაცვის მინისტრი არსენ ტოროსიანი აცხადებს, რომ სომხეთის ეპიდემიის საწინააღმდეგო სისტემა საქართველოზე უკეთესია. სომხეთის საზოგადოებრივი საბჭოს სხდომაზე მინისტრმა ასევე განაცხადა, რომ სომხეთში საქართველოდან ჩასულ არაერთ ადამიანს კორონავირუსი დაუდგინდა. ტოროსიანს საქართველოს ოფიციალურ სტატისტიკურ მონაცემებში ეჭვი შეაქვს. #news#კორონავირუსი#მარინა ეზუგბაია#სომხეთის ჯანდაცვის მინისტრი#Tbilisi Daily#newsdaily#

მარინა ეზუგბაიას წამოცდენამ ცხადი გახადა, რომ „ქართული ოცნება“ მალავს კორონავირუსით ინფიცირებულთა რაოდენობას, - ამის შესახებ ყოფილი პრემიერ-მინისტრი, ვანო მერაბიშვილი სოციალურ ქსელში წერს. მერაბიშვილის თქმით, „ოცნება“ წლების განმავლობაში ანალოგიურად აყალბებდა სხვა მაჩვენებლებს, მათ შორის დანაშაულის სტატისტიკასაც. „არ იქნება ტესტირება, არ გვეყოლება ინფიცირებული” - უფრო სწორად, არ გვექნება ინფორმაცია მათ შესახებ - ეს არის „ოცნების მთავრობის სტრატეგია“. წლების მანძილზე, ანალოგიურად აყალბებდა „ოცნება“ დანაშაულის რეალურ სტატისტიკას, ინფლაციის მაჩვენებლებს, უმუშევართა რაოდენობას და ა.შ. მოსახლეობამ უნდა იცოდეს, რომ ერთ სულ მოსახლეზე ჩატარებული ტესტების რაოდენობით, საქართველო მნიშვნელოვნად ჩამორჩება არა მხოლოდ ევროკავშირის წევრ სახელმწიფოებს, არამედ მეზობელ ქვეყნებსაც. მაშინ, როცა ეკონომიკა გაჩერებულია და ხელისუფლება დაბალი რიცხვებით იწონებს თავს, აღმოჩნდა, რომ ეს მონაცემები ივანიშვილის მთავრობის მორიგ აფიორას ეფუძნება. კატეგორიულად მოვითხოვთ მთავრობისგან, შეწყდეს სტატისტიკის გაყალბება, ჩატარდეს ფართომასშტაბიანი ტესტირება და მოსახლეობამ მიიღოს რეალური ინფორმაცია არსებული ვითარების შესახებ“, - წერს მერაბიშვილი. შეგახსენებთ, რომ ბოლო დღე-ღამეში კორონავირუსით ინფიცირებულთა რაოდენობა 25-ით გაიზარდა და 456 შეადგინა, რასაც თბილისის ინფექციური საავადმყოფოს სამედიცინო დირექტორი მარინა ეზუგბაია დიდი რაოდენობით ჩატარებულ აგრესიულ ტესტირებას უკავშირებს.#მერაბიშვილი #ქართულიოცნება #ტესტირება #ეზუგბაია #სტატისტიკა #tbilisidaily

პირველი საუნივერსიტეტო კლინიკის დირექტორის, ლევან რატიანის სახელით შექმნილი შექმნილი ყალბი ანგარიში Facebook-მა წაშალა. ლევან რატიანის სახელით შექმნილი ყალბი ანგარიში ერთ-ერთი იყო იმ ანგარიშებიდან, რომლებსაც ფეისბუქის ინფორმაციით, კოკა ყანდიაშვილი მართავდა და დეზინფორმაციის გასავრცელებლად იყენებდა. DFRLab განმარტავს, რომ ლევან რატიანის სახელით შექმნილი ანგარიშის მიზანი ფართო აუდიტორიის მიზიდვა იყო, რადგან საქართველოში კორონავირუსით შექმნილი მდგომარეობის გამო, მხოლოდ რამდენიმე ექიმის გავრცელებულ ინფორმაციას ენდობიან. ორგანიზაცია ვარაუდობს, რომ აუდიტორიის მიზიდვის შემთხვევაში, მოგვიანებით ამ ანგარიშს დეზინფორმაციის გასავრცელებლად გამოიყენებდნენ. გარდა ამისა, DFRLab-ის ინფორმაციით, კოკა ყანდიაშვილთან და მის მედია Espersona-სთან დაკავშირებულ ყალბ გვერდებს შორის მოხვდა ყოფილი პრემიერ-მინისტრის, ვანო მერაბიშვილის ყალბი გვერდიც. ფეისბუქმა კოორდინირებული არაავთენტური ქმედებების გამო Espersona-სთან დაკავშირებული 511 გვერდი, 101 პერსონალური ანგარიში, 122 ჯგუფი და 56 ინსტაგრამ–ანგარიში წაშალა. ამ გვერდებისა და კავშირების დასადგენად ფეისბუქი DFRLab-ის გამოძიების შედეგებს დაეყრდნო. როგორც DFRlab-ის კვლევაშია ნათქვამი, Espersona-სთან დაკავშირებული ანგარიშები, გვერდები და ჯგუფები აქტივისტებისა და ოპოზიციური პარტიების დისკრედიტაციას ემსახურებოდნენ. ზოგიერთი გვერდი ეკუთვნოდა წვრილ-წვრილ მედიასაშუალებებს, რომლებიც ერთმანეთთან იყვნენ დაკავშირებულები. „კოვიდ 19-თან დაკავშირებული პანდემიური მდგომარეობის გამო ქართული საზოგადოება განსაკუთრებულ ნდობას უცხადებს ჯანდაცვის სისტემაში მომუშავე პირებს, რომლებიც ყოველდღიურ რეჟიმში აწვდიან მოსახლეობას ინფორმაციას ვირუსოლოგიური მდგომარეობის მართვის შესახებ. ეპიდემიოლოგებისა და ექიმების სახელებით შექმნილი იყო ანგარიშები, რომლებიც, სავარაუდოდ, მოგვიანებით დეზინფორმაციის გასავრცელებლადაც იქნებოდა გამოყენებული. წაშლილ ანგარიშთაგან ერთ-ერთი იყო ექიმ ლევან რატიანის სახელით გაკეთებული ანგარიში, რომელიც ყოველდღიურად აწვდიდა აუდიტორიას სიახლეებს კორონავირუსთან დაკავშირებით“, - ვკითხულობთ კვლევაში. შეგახსენებთ, რომ ეს Facebook-ის მიერ ჩატარებული მეორე დიდი წმენდაა ქართულ სოციალურ სივრცეში - წაიშალა რვაასამდე ყალბი ანგარიში, რომლებსაც ფეისბუქის ინფორმაციით კოკა ყანდიაშვილი და მისი სააგენტო „ესპერსონა“ მართავდნენ. წაშლილია ყანდიაშვილისა და მისი ცოლის პირადი ანგარიშებიც.

ასეთი დიდი მოცულობით ჩატარებული ტესტირებისას რომ 25 შემთხვევა გამოვლინდება, ეს არის ძალიან ცოტა, ნიშნავს, რომ ქვეყანა გამარჯვებულია ამ ეტაპზე-განაცხადა ინფექციური საავადმყოფოს სამედიცინო დირექტორმა. მარინა ეზუგბაიას თქმით, მიზნობრივ ჯგუფებში ჩატარებული ტესტირება და აგრესიული ტესტირება სხვადასხვა რამეა. „სიტყვა აგრესიული არ მიყვარს არანაირ მიმართებაში, არც სამედიცინო ტერმინოლოგიაში, არც არსად, ჩემგან შორს არის ეს ტერმინი. მაგრამ მე გავაკეთე დაზუსტება, ვისაც მოსწონს ეს ტერმინი-აგრესიული ტესტირება, ასეთი დიდი მოცულობით ჩატარებული ტესტირებისას რომ 25 შემთხვევა გამოვლინდება, ეს არის ძალიან ცოტა და ეს არის ძალიან დიდი ბედნიერება. ასეთ დროს 25 რომ იქნება მხოლოდ დადასტურებული, ნიშნავს, რომ ქვეყანა გამარჯვებულია ამ ეტაპზე“, -განაცხადა ეზუგბაიამ. ამასთან ეზუგბაიამ, აგრესიულ ტესტირებასთან დაკავშირებით რამდენიმე დღის წინ მის მიერ გაკეთებული განცხადება განმარტა. „ეს იყო ჩემი სურვილი, რატომ იგებს ადამიანების ნაწილი ამას ისე, როგორც ფაქტს, მე არ ვიცი, მაგრამ მე გამოვხატე ჩემი სურვილი, რომ ქვეყანას თუ არ დასჭირდება განმეორებით და ხშირად აგრესიული ტესტირება, ეს იმას ნიშნავს, რომ ჩვენთან დაავადების გავრცელება იქნება ისევ ზომიერი და კონტროლირებადი, მე განმარტება გავაკეთე ამ მოცემულობასთან მიმართებაში. ვინ როგორ გაიგო არ ვიცი, მაგრამ განმარტებას გავაკეთებ, ჩინეთიდან ჩამოფრენილი პაციენტები ჩვენ ცენტრში პირველად მოვიდნენ 1-ელ თებერვალს, 1-ელი თებერვლიდან დაიწყო ბრძოლა ამ პრობლემის წინააღმდეგ და სახელმწიფო, ანუ მთავრობა და ჯანდაცვის სამსახური თავისი შესაბამისი სამსახურებით, დაავადებათა კონტროლის ეროვნული ცენტრი და თავდაპირველად მხოლოდ ჩვენი ცენტრი ეწეოდა ერთობლივად როგორც ერთი ორგანიზმი მუშაობას და პირველი ეტაპი, რასაც ჰქვია შეკავების პერიოდი, შესაშური შედეგებით დამთავრდა და სტატისტიკური მონაცემები იყო საკმაოდ დაბალი. რატომღაც ყოველთვის ეჭვები იქმნება, რომ სტატისტიკური მონაცემები გაყალბებულია და ეს ასე არ არის, იმიტომ რომ გაყალბება ვერასდროს შეაჩერებს იმ პროცესებს, რასაც ჰქვია covid დაავადებული პაციენტების მატება და მასთან დაკავშირებული ყველა ეს პრობლემა. შევხედოთ ევროპის ქვეყნებს და ვნახოთ რა მდგომარეობაში არიან. შეკავების პერიოდი ჩვენ და ამ სტრუქტურებმა ერთად დავამთავრეთ და როცა დაგვეწყო შიდა გავრცელება, რომელიც ძალიან რთული მოსაგვარებელი იყო, სახელმწიფომ ადეკვატური ნაბიჯები გადადგა ყველა ჯერზე და ის აღკვეთის ღონისძიებები, რაც განხორციელდა, აბსოლუტურად ადეკვატური იყო და მოქალაქეების მაღალი პასუხისმგებლობაც შესაბამისად მიყვებოდა ამ სიტუაციას. გავრცელების პერიოდიც საბედნიეროდ, გრძელდება კონტროლირებადი, ზომიერი მატებით და ეს სტატისტიკური მონაცემები არის აბსოლუტურად ჭეშმარიტი და სწორი. რატომ უჩნდება კითხვები ტელეჟურნალისტების ნაწილს, რომ ეს არ არის სწორი მონაცემები და მონაცემები არის დამალული, არ ვიცი, ასე მგონია, რომ სურვილი აქვთ, რომ მართლა მეტი იყოს. სინამდვილეში არსებული მონაცემები არის სწორი, ეს სტატისტიკა, არის ჩვენი ქვეყნის გამარჯვება, შესაშური სტატისტიკური მონაცემები, რომელიც დადო ქვეყანამ, ეს ერთად უნდა გვიხაროდეს ყველას და ეჭვები ძალიან გთხოვთ ნუ გაქვთ, ერთად უნდა გვიხაროდეს ყველას,“- განაცხადა მარინა ეზუგბაიამ.

თბილისის ინფექციური საავადმყოფოს სამედიცინო დირექტორის, მარინა ეზუგბაიას განცხადებით, საქართველოში კორონავირუსთან დაკავშირებული სტატისტიკური მონაცემები აბსოლუტურად სწორია და გაუგებარია, თუ რატომ უჩნდებათ ჟურნალისტების ნაწილს კითხვები ამ მიმართულებით. ,,რატომ უჩნდებათ კითხვები ტელეჟურნალისტების რაღაც ნაწილ სივრცეს, რომ ეს არ არის სწორი მონაცემები, ეს არის დამალული მონაცემები, არ ვიცი. ასე მგონია, თითქოს სურვილი აქვთ, მართლა მეტი იყოს. შთაბეჭდილება იქმნება ამის, თორემ სინამდვილეში, არსებული მონაცემები არის აბსოლუტურად ჭეშმარიტი და სწორი, ეს სტატისტიკა არის ჩვენი ქვეყნის გამარჯვება, შესაშური სტატისტიკური მონაცემები, რომელიც დადო ქვეყანამ, ეს ერთად უნდა გვიხაროდეს ყველას. ეჭვები, ძალიან გთხოვთ, ნუ გაქვთ ამ სტატისტიკურ მონაცემებში", - თქვა მარინა ეზუგბაიამ. #მარინაეზუგბაია #კორონავირუსი #სტატისტიკა #tbilisidaily