საგანგებო მდგომარეობის დროს,46 პირმა გაიარა გამოკვლევა კორონავირუსზე, მაგრამ არცერთი შემთხვევა არ დადასტურებულა. ჯამში, აფხაზეთში სამედიცინო დაწესებულებები მზად არიან უზრუნველჰყონ 730-მდე საწოლი კორონავირუსული ინფექციით დაავადებული პაციენტების განლაგების მიზნით, განაცხადა ე.წ რესპუბლიკის "ჯანმრთელობის დაცვის მინისტრმა" თამაზ წახნაკიამ. "ჩვენ დავადგინეთ მინიმალური მოთხოვნილება, რომელიც შეიძლება წარმოიშვას თუ სიტუაცია გაუარესდება. ახლა გუდაუთის საავადმყოფოში 70 საწოლია ინფექციის განყოფილებაში. საჭიროების შემთხვევაში, იგი გაიზრდება 350-მდე." - აღნიშნა მან. წახნაკიამ ასევე აღნიშნა, რომ მოსკოვის ე.წ აფხაზური დიასპორის მიერ აფხაზეთში სამედიცინო დაწესებულებების სამედიცინო დახმარებისთვის დაფინანსებული თანხით შეიძინა 21 სავენტილაციო მოწყობილობა. ამჟამად ოკუპირებულ აფხაზეთში კორონავირუსის არც ერთი შემთხვევა არ დაფიქსირებულა.#კორონავირუსი #ჯანდაცვა #SokhumiDaily

ესპანეთში კორონავირუსით დაღუპულთა რიცხვი მეოთხე დღეა მცირდება. ქვეყნის მთავრობამ გააკეთა განცხადება, რომ ორშაბათს კორონავირუსით დაღუპულთა რაოდენობა 637 ადამიანს შეადგენს, რაც დაბალია წინა დღის მაჩვენებელზე - 674 შემთხვევა. აღსანიშნავია, რომ ეს ყველაზე დაბალი მაჩვენებელია 24 მარტის შემდეგ. სიკვდილიანობის პიკი კი გასული კვირის ხუთშაბათს დაფიქსირდა, 950 შემთხვევა. ოფიციალური პირები თვლიან, რომ შესაძლოა ქვეყანაში შემთხვევათა კლების ტენდენცია შენარჩუნდეს და ვირუსი საბოლოოდ დამარცხდეს. შეგახსენებთ, რომ ესპანეთი კორონავირუსით გარდაცვლილთა რაოდენობით მხოლოდ იტალიას ჩამორჩება და მეორეა მსოფლიოში 13,000-ზე მეტი შემთხვევით. სტატია ნათარგმნია “BBC”-ის ოფიციალური ვებ-გვერდიდან.#კორონავირუსი #covid-19 #ესპანეთი #headline

საავადმყოფოდან გამოწერის შემდეგ ჩემი იმეილი გაივსო წერილებით, კითხვებით. ყველამ იცოდა, რომ კორონავირუსი მქონდა და კითხულობდნენ როგორი მდგომარეობა მაქვს. როგორ ვგრძნობ თავს, არის თუ არა უკეთესობა და რა გრძნობაა ხდებოდე კარგად კორონავირუსით დაავადების შემდეგ. კორონავირუსზე ტესტირება 17 მარტს გავიკეთე. არ ვიცოდი რას ველოდი დადებით პასუხს თუ უარყოფითს არცერთზე არ მეფიქრებოდა. ვირუსის შესახებ ბევრი რამ უცნობია და მე ძალიან ბევრი სიმპტომი გამომივლინდა. კუჭ-ნაწლავის პრობლემები და ყნოსვის შეგრძნების დაკარგვა. მას შემდეგ, რაც კვირის განმავლობაში, მსოფლიოში შეიტყვეს უფრო მეტი, თუ რა სიმპტომები ჰქონდა ვირუსს, მათ ჯერ კიდევ ვერ გაიგეს რა გავლენას ახდენს ის მომავალში ადამიანის ჯანმრთელობაზე. იმუნურ სისტემაზე, რამდენ ხანს არის უკვე გამოჯანმრთელებული პაციენტი საშიში და გადამდები ან არის თუ არა. ჩვენ უნდა მივაქციოთ უფრო მეტი ყურადღება კოროვირუსულ იფექციის გადარჩენილ პაციენტთა ისტორიებზე. როდესაც მე პირველად საავადმყოფოდან სახლში დავბრუნდი, თავს მარტო ვგრძნობდი. მე მჭირდებოდა მეტი ინფორმაცია და დაუკავშირდა სხვებს, რომლებმაც გამიზიარეს საკუთარი გამოცდილება.ამიტომ შევქმენი ონლაინ დახმარების ჯგუფი, იმ ადამიანებისთვის, რომელთაც აქვთ Covid-19 სიმპტომებს ან ვირუსისგან გამოჯანმრთელდნენ. ბოლო ორი კვირაში, მთელი მსოფლიოდან ხალხი შეუერთდა. განხილვის ერთ – ერთი ყველაზე გავრცელებული თემა იყო, თუ რამდენად რთულია აღდგენის პროცესი - უფრო რთული, ვიდრე ფართოდ არის რეალიზებული. ხალხმა უნდა გაუზიაროს ერთმანეთს სიმპტომები. გამოჯანმრთელებულებმა უნდა გაუზიარონ ერთმანეთს აღდგენის პროცესის მიმდინარეობა , რომელიც საკმაოდ რთულია. ჩვენი ჯგუფში ადამიანები უზიარებენ გამოცდილებას, რომელიც ძალიან საყურადღებოა. მაგალითად ჯანმრთელ 31 წლის სემი ავეილს სიმპტომების 21-ე დღეს გამოუვლინდა. მას სუნთქვა საერთოდ არ გასჭირვებია, სამედიცინო დახმარება არც კი წარმოედგინა რომ სჭირდებოდა, სიმპტომები უფრო აშკარა გახდა. სემი ახველებდა სისხლს და სიცხე უწევდა. ჩვენი ჯგუფის კიდევ ერთმა წევრმა, 24 წლის ჩარლიმ, აღწერა თავისი სიმპტომები, როგორც ”შედარებით რბილი”, მაგრამ აღნიშნა, რომ ამ დაავადებას 23 დღეზე მეტ ხანს გრძელდება. მას კვლავ სიცხე აქვს, ხველა და ქოშინი. საბრინა ბლეიქი (26 წლის) მძიმე დაღლილობისა და „სუნთქვის მუდმივი პრობლემების“აქვს. ამის გამო მას სიარული გაუძნელდა. ეს ყველაფერი კი ერთი თვის შემდეგ, როდესაც მან პირველად იგრძნო სიმპტომები. ჯაგ სინგლი, 55, ჯერ კიდევ უმკლავდდბა "მუდმივ ხველას" მისი საწყისი სიმპტომებიდან ოთხი კვირის შემდეგ. სწორედ ამიტომ არ უნდა გავავრცელოთ დეზიმფორმაცია. დაზუსტებით არავინ იცის რამდენ ხანში და რა ფორმით ვლინდება კორონა ვირუსი ადამიანში. ამიტომ სჯობს გავუფრთხილდეთ თავს და გამოვიჩინოთ სიფრთხილე. წყარო - Mew York Times #კორონავირუსი #გამოჯანმრთელებულნი #სიმფტომები #დეზიმფორმაცია #მხარდაჭერა #headline

ჯონ ჰოფკინსის სახელობის ამერიკული უნივერსიტეტის მონაცემებით,, მსოფლიო მასშტაბით, კორონავირუსით ინფიცირებულთა საერთო რაოდენობა 2,5 მლნ. ადამიანს შეადგენს. უნივერისტეტმა 1 მლნ. ადამიანის ინფიცირების შესახებ ინფორმაცია 2 აპრილისთვის გამოაქვეყნა, ხოლო 2 მლნ-ის თაობაზე კი გასულ კვირას. დაავადებულთა ყველაზე მეტი რაოდენობა ჯერჯერობით აშშ-ს, ესპანეთსა და იტალიას ჰყავს. დიდი ბრიტანეთის ხელისუფლებაში კორონავირუსით ინფიცირების პიკის მეორე ეტაპს და აღნიშნულით გამოწვეულ ეკონომიკურ პრობლემებს უფრთხიან. აღნიშნულიდან გამომდინარე, აღმასრულებელი მთავრობა საკარანტინო ზომების ეტაპობრივ შესუსტებას გეგმავს. ორშაბათიდან, ადგილობრივმა მთავრობამ იმ დასაქმებულთა სპეციალური განაცხადების მიღება დაიწყო, რომლებიც პანდემიური მდგომარეობის გამო ვერ ასრულებენ დაკისრებულ მოვალეობებს და შესაბამისად ხელფასის 80%-ს ხელისუფლება აუნაზღაურებს მათ (თვეში არაუმეტეს 2500 ფუნტი). ამ ტიპის ადამიანების რაოდენობა შესაძლოა რამდენიმე მილიონს შეადგენდეს. გერმანიაში, მაღაზიების გარკვეული რაოდენობა ჩვეულ სამუშაო რეჟიმს დაუბრუნდა, ხოლო დანიასა და ავსტრიაში დაიწყეს მეორადი საჭიროების მარკეტების გახსნა. 20 აპრილიდან გერმანიის ტერიტორიაზე წიგნების, ყვავილებისა და ტანსაცმლის მაღაზიები, ავტოსალონები, ასევე 800 კვ.მ-ზე მცირე ზომის სავაჭრო ობიექტები გაიხსნა. გერმანიის ხელისუფლებაში ფიქრობენ, რომ ქვეყნის ტერიტორიაზე კორონავირუსით ინფიცირების შემთხვევები კლებისკენ მიდის, მაგრამ სოციალურ დისტანცირებასთან დაკავშირებული შეზღუდვების კვლავ მოქმედება აუცილებელია. შესაბამისად, რეკომენდაციები გაიცემა სამედიცინო ნიღბის ტარებაზე. ნორვეგიაში, 1 თვიანი შესვენების შემდეგ კვლავ გაისხსნა საბავშვო ბაღები, ხოლო სკოლის მოსწავლეებისთვის სასწავლო პროცესი, ისევე როგორც მეზობელ დანიაში, არც ამ ქვეყანაში განახლებულა ჯერჯერობით. ნორვეგიის ხელისუფლება კვირის ბოლოდან გახსნის ე.წ. სილამაზისა და ტატუს სალონებს. საკარანტინო რეჟიმი მცირდება პოლონეთშიც, სადაც ადგილობრივმა ხელისუფლებამ მოქალაქეებს პარკებსა და სარეკრეაციო ზონებში გასვლის ნება დართო. ჩეხეთში ჯერ კიდევ წინა კვირას გაიხსნა არასასურსათო მაღაზიები, ხოლო 20 აპრილიდან უკვე საფერმერო ბაზრებმა და ავტოსალონებმა დაიწყეს ფუნქციონირება. ორშაბათს ადგილობრივმა ხელისუფლებამ ახალი, წლიური ბიუჯეტი დაამტიცა, რომლის დეფიციტი დაახლოებით $12 მლრდ-ია. ლატვიის კლინიკებში კვლავ დაიწყეს გეგმიური სამედიცინო (მათ შორის სტომატოლოგიური) მომსახურების გაწევა. აქვე, სამედიცინო დაწესებულებებმა უნდა დაიცვან სიფრთხის განსაკუთრებული ზომები, მათ შორის პალატაში პაციენტთა გარკვეული დისტანცია. რაც შეეხება საგანგებო მდგომარეობას, ლატვიის ტერიტორიაზე ის 12 მაისამდე არის შემოღებული და ჯერჯერობით დახურულია საგანმანათლებლო დაწესებულებები. მოსახლეობის უმრავლესობა შინიდან მუშაობს და საზოგადოებისთვის მოქმედებს სოციალური დისტანცირების განსაზღვრული წესები. მომზადებულია რატი ერისთავის მიერ. წყარო: Coronavirus in the world: Europe weakens quarantine (20.04.2020),#coronavirus #Europe #economy #quarantine #headline #covid19

ბოლო რამდენიმე დღეა, საქართველოში კორონავირუსით ინფიცირების მცირე შემთხვევები ფიქსირდება, თუმცა ეს არ ნიშნავს, რომ აღნიშნული ტენდენცია შენარჩუნდება. შემთხვევების მატება კვლავ მოსალოდნელია. აპრილის ბოლოს და მაისის დასაწყისში შესაძლოა, შემთხვევების მაქსიმალური რაოდენობა დაფიქსირდეს. ამის შესახებ განცხადებას, დაავადებათა კონტროლისა და საზოგადოებრივი ჯანმრთელობის ეროვნული ცენტრის (NCDC), საზოგადოებრივი ჯანმრთელობის რისკებზე მზადყოფნისა და რეაგირების სამმართველოს უფროსი ანა კასრაძე აკეთებს. ,,კვლავ ველოდებით შემთხვევების მატებას. მოგეხსენებათ, რომ რამდენიმე დღესასწაული იყო, რამაც ადამიანებს შეკრების მიზეზი მისცათ. ვხედავთ, რომ თავშეყრას აგრძელებენ და დიდი მადლობა, ვინც ამას არ აკეთებს და თავს იკავებს, საკმაოდ რთულია ამ დროს არ შეიკრიბო და არ ნახო ოჯახის წევრები, თუმცა მადლობა მათ ამისთვის. ამის შედეგს ჩვენ ორი კვირის განმავლობაში ვნახავთ. ვფიქრობთ, რომ შემთხვევების მატება იქნება. შეიძლება იყოს 30 და მეტი შემთხვევაც. ჩვენ უკვე გრაფიკზე ვხედავთ, რომ გვაქვს შემთხვევების მატება. გუშინდელ და გუშინწინდელ დღეს არ ვგულისმხობ, და მოლოდინია, რომ აპრილის ბოლოს და მაისის დასაწყისში ჩვენ შესაძლოა, შემთხვევების მაქსიმალური რაოდენობა გვქონდეს, რამაც შესაძლოა, პიკზე მიუთითოს და ამ დღეებში მცირე რიცხვი დამშვიდების საშუალებას არ გვაძლევს“ , – განაცხადა ანა კასრაძემ.#კორონავირუსი #პანდემია #ინფიცირებულები #tbilisidaily

ქვეყნის ტერიტორიაზე, კორონავირუსით ინფიცირების შემთხვევები რაოდენობით თურქეთმა ჩინეთსა და ირანს გადაასწრო. აღნიშნულის მიუხედავად, ეკონომიკური კოლაფსის საფრთხის გამო, თურქეთის ხელისუფლება საყოველთაო კარანტინს ჯერჯერობით არ აცხადებს. COVID-19-ის გავრცელების პარალელურად მნიშვნელოვანი მოვლენები ვითარდება შიდა პოლიტიკურ ასპარეზზე - კრიტიკული პუბლიკაციების გამოქვეყნების გამო ჟურნალისტებს აკავებენ, ხოლო პარლამენტის დეპუტატები სოციალურ ქსელებზე მეტი შეზღუდვების დაწესებას ითხოვენ. პანდემიური მდგომარეობის შესახებ პირველადი საფრთხე თურქეთში ჯერ კიდევ თებერვლის ბოლოს, მეზობელ ირანში კორონავირუსის სწრაფი გავრცელების დროს იგრძნეს და ისლამურ რესპუბლიკასთან მალევე ჩაიკეტა საზღვრები. თურქეთში 11 მარტს დაფიქსირდა COVID-19-ით ინფიცირების პირველი შემთხვევა, მაგრამ ადგილობრივმა ჯანდაცვის მინისტრმა ფაჰრეთინ ქოჯამ არასათანადოდ შეაფასა არსებული საფრთხე. „კორონავირუსი არ არის იმ შესაძლებლობების და მასშტაბების, რომ თურქული სახელმწიფოს მიერ მიღებული ზომების გადალახვა შეძლოს“, - განაცხადა ქოჯამ თავდაპირველად, მაგრამ მალევე, 23 მარტს აღიარა, რომ ეპიდემიამ მთელი ქვეყნის ტერიტორია მოიცვა. 10 აპრილს დაწესდა საკარანტინო რეჟიმი თურქეთის 31 ქალაქში, მათ შორის სტამბოლსა და ანკარაში. ამ მოულოდნელმა გადაწყვეტილებამ სრული ქაოსი და „პოლიტიკური დრამის“ განვითარება გამოიწვია ქვეყანაში - ხელისუფლების მიერ კარანტინი 9 აპრილს გამოცხადდა, 2 საათით ადრე, მის კანონიერ ძალაში შესვლამდე, სტამბოლისა და ანკარის მერები კი მის შესახებ გაფრთხილებულები არ იყვნენ, რასაც პანიკა და დაბნეულობა მოჰყვა. ქაოტურ სიტუაციას ქუჩებში არეულობა და დაპირისპირებები მოჰყვა, რის შემდეგაც ადგილობრივი შს მინისტრი სულეიმან სოილუ გადადგა, მაგრამ ერდოღანმა იგი დაკავებულ პოსტზე დააბრუნა. კარანტინის გამოცხადების პირველ დღეს სტამბოლის მაღაზიებსა და მარკეტებს, სურსათის და სხვა პროდუქციის მოსამარაგებლად, მხოლოდ ოფიციალური მონაცემებით 270 000 ადამიანი ეწვია. თურქეთის ეკონომიკური რეცესია ჯერ კიდევ 2019 წლის გაზაფხულზე დაიწყო, როგორც ლირისა და საფონდო ბირჟის ღირებულების დაცემის, ასევე საპროცენტო განაკვეთებისა და ინფლაციის ზრდის გამო. ადგილობრივი ოპოზიცია თვლის, რომ აღნიშნულის მიზეზი ნეპოტიზმია - ქვეყნის ფინანსურ პოლიტიკას გასაზღვრავს ფინანსთა მინისტრი, პრეზიდენტის სიძე (ერდოღანის უფროსი ქალიშვილის ქმარი) ბერათ ალბაირაქი. უთანასწორობას და ეკონომიკურ კრიზისს თან ახლავს კონკურენცია ცენტრალურ და ადგილობრივ ხელისუფლებებს შორის. ანკარისა და სტამბოლის მერები ოპოზიციური პარტიების წარმომადგენლები არიან. თურქეთის ძალოვანი ორგანოები მკაცრ პოლიტიკას ატარებენ სოციალურ ქსელების მომხმარებელთა მიმართ. უკანასკნელი თვის მანძილზე, პოლიციამ 3 500 „პროვოკაციული“ პუბლიკაცია გამოაქვეყნა კორონავირუსის თემასთან დაკავშირებით და 616 ერთეული სისხლის სამართლის საქმე აღძრა კონკრეტული პირების მიმართ. განხორციელებული ღონისძიებების შედეგად დააკავეს 229 ადამიანი, რომელთა შორის ჟურნალისტებიც არიან. წყარო: Coronavirus in Turkey: lines, arrests and political drama (20.04.2020), სტატია მომზადებულია რატი ერისთავის მიერ. #Coronavirus #Turkey #Economy #headline Turkey

ვისღა შეუძლია წარმოთქვას ფრაზა „ვირუსულად გავრცელდა“ ისე, რომ შიშმა არ აიტანოს? ვისღა შეუძლია შეხედოს საგნებს – კარის სახელურს, მუყაოს ყუთს, ბოსტნეულის ტომარას – ისე, რომ არ წარმოიდგინოს მათზე შემოჯარული უხილავი, უკვდავი, უსიცოცხლო, ჯამისებრი საწოვარებით დაწინწკლული ბურთულები, რომლებიც ჩვენს ფილტვებზე მიმაგრებას ელიან? ნამდვილი შიშის გარეშე ვისღა შეუძლია იფიქროს უცხო ადამიანის კოცნაზე, ავტობუსში ასვლაზე ან ბავშვის სკოლაში გაშვებაზე? ვისღა შეუძლია რისკების გამოთვლის გარეშე იფიქროს ყოველდღიურ სიამოვნებაზე? რომელი ჩვენგანი არ არის ცრუ ეპიდემიოლოგი, ვიროლოგი, სტატისტიკოსი და წინასწარმეტყველი? რომელი მეცნიერი ან ექიმი არ ლოცულობს ფარულად სასწაულისთვის? რომელი მღვდელი არ ემორჩილება – ფარულად მაინც – მეცნიერებას? და თუნდაც ვირუსის გავრცელების ფონზე, ვინ არ ააღელვა დიდ ქალაქებში ჩიტების ჭიკჭიკის გაძლიერებულმა ხმამ, გადასასვლელებზე ფარშევანგების ცეკვამ და დადუმებულმა ზეცამ? მსოფლიოში ინფიცირებულთა რაოდენობამ მილიონს გადააჭარბა. დაღუპულია 50 ათასზე მეტი ადამიანი. შესაძლოა ასობით ათასი ან უფრო მეტი კიდევ დაინფიცირდეს. ვირუსი თავისუფლად გადაადგილდა სავაჭრო გზებთან და საერთაშორისო კაპიტალთან ერთად, და მისმა თანმხლებმა საშინელმა ავადმყოფობამ ადამიანები თავიანთ ქვეყნებში, ქალაქებსა და სახლებში გამოკეტა. თუმცა კაპიტალის მოძრაობისგან განსხვავებით, ეს ვირუსი გავრცელებისკენ ისწრაფვის და არა მოგებისკენ. მან გაუაზრებლად, გარკვეული დოზით დინებას მიმართულება შეუცვალა. მასხრად აიგდო საიმიგრაციო კონტროლი, ბიომეტრია, ციფრული კონტროლი და სხვა ნებისმიერი სახის მონაცემთა ანალიზი. ჯერჯერობით ყველაზე მეტად გავრცელდა მსოფლიოს ყველაზე მდიდარ, ძლიერ ქვეყნებში, მწყობრიდან გამოიყვანა კაპიტალიზმის ძრავა. შესაძლოა, დროებით, მაგრამ საკმაო დროით იმისთვის, რომ მისი ნაწილები შევისწავლოთ, რათა შევაფასოთ და გადავწყვიტოთ, მისი შეკეთება გვირჩევნია, თუ უკეთესი ძრავის ძიება. სამთავრობო პირები, რომლებიც პანდემიის მართვას ხელმძღვანელობენ, გატაცებით საუბრობენ ომზე. ისინი „ომს“ როგორც მეტაფორას კი არა, პირდაპირი გაგებით იყენებენ. და ეს მართლაც რომ ომი იყოს, ვინ მოემზადებოდა აშშ-ზე უკეთ? წინა ხაზის მებრძოლებს ნიღბებისა და ხელთათმანების ნაცვლად – იარაღები, „ჭკვიანი ბომბები“, ბუნკერის ასაფეთქებლები, წყალქვეშა ნავები, რეაქტიული გამანადგურებლები და ატომური ბომბები რომ სჭირდებოდეთ, იქნებოდა კი მათი დეფიციტი? ღამღამობით ნახევარი მსოფლიოს დაშორებით, ზოგიერთი ჩვენგანი ნიუ-იორკის გუბერნატორს გაუგებარი აღტაცებით უყურებს. თვალს ვადევნებთ სტატისტიკას და ვისმენთ ამბებს ამერიკის გადატვირთულ საავადმყოფოებზე, დაბალანაზღაურებად, მუშაობით გადამწვარ ექთნებზე, რომლებსაც ნიღბების ნაგვის ჩანთებისგან და ძველი საწვიმრებისგან დამზადება უწევთ, რომლებიც ყველაფერს რისკავენ ავადმყოფის დასახმარებლად. ვისმენთ ამბებს, როგორ ეცილებიან შტატები ერთმანეთს ვაჭრობაში სასუნთქი აპარატების მისაღებად; ვისმენთ ექიმების დილემის შესახებ, რომლებსაც უწევთ არჩევანი გააკეთონ, ვინ მიიღებს სასუნთქ აპარატს და ვის გაწირავენ სასიკვდილოდ. ჩვენ კი ჩვენთვის ვფიქრობთ, „ღმერთო ჩემო! ეს ამერიკაა!“ ტრაგედია არის უეცარი, ნამდვილი, მასშტაბური და ის ჩვენს თვალწინ იშლება. თუმცა ეს არ არის ახალი. ეს იმ მატარებლის მარცხია, წლების განმავლობაში რომ გზიდან ვარდებოდა. ვის აღარ ახსოვს ვიდეოები „გადაგდებულ პაციენტებზე“ – იმ ავადმყოფებზე, რომლებსაც ჯერ კიდევ საავადმყოფოს პერანგი ეცვათ, საჯდომი მოშიშვლებოდათ და რომლებსაც მალულად იშორებდნენ ქუჩის კუთხეში? საავადმყოფოების კარი ძალიან ხშირად დახურულა ამერიკის უიღბლო მოქალაქეებისთვის, მიუხედავად იმისა, რამდენად სერიოზული იყო მათი ავადმყოფობა ან როგორ იტანჯებოდნენ. ახლა მაინც აღარ ხდება ასე – რადგან ახლა, ვირუსის ხანაში ღარიბი ადამიანის ავადმყოფობამ შეიძლება მდიდრის ჯანმრთელობას ავნოს. და ახლა, ამ პერიოდშიც კი ბერნი სანდერსს, სენატორს, რომელიც საყოველთაო ჯანდაცვის ხისტ კამპანიას ეწეოდა, თავისსავე პარტიაშიც კი თეთრი სახლისთვის შეუფერებლად მიიჩნევენ. ჩემს ქვეყანაზე რაღა ვთქვა, ჩემს მდიდარ-ღარიბ ქვეყანაზე, ინდოეთზე – სადღაც ფეოდალიზმსა და რელიგიურ ფუნდამენტალიზმს, კასტურობასა და კაპიტალიზმს შორის გაჭედილზე, რომელსაც რადიკალი მემარჯვენე ინდუსი ნაციონალისტები მართავენ. დეკემბერში, სანამ ჩინეთი ვირუსს უჰანში ებრძოდა, ინდოეთის მთავრობას ასობით ათასი მოქალაქის საპროტესტო გამოსვლასთან უწევდა გამკლავება. მოქალაქეები მუსლიმთა წინააღმდეგ მიღებულ დისკრიმინაციულ კანონს აპროტესტებდნენ. COVID-19-ის პირველი შემთხვევა ინდოეთში 30 იანვარს დადასტურდა, დელი მხოლოდ რამდენიმე დღის შემდეგ დატოვა რესპუბლიკის დღის აღსანიშნავი აღლუმის საპატიო სტუმარმა, ამაზონის ტყის მშთანთქმელმა და COVID-ის უარმყოფელმა ჯაირ ბოლსონარომ [ბრაზილიის პრეზიდენტი]. თუმცა თებერვალში უამრავი საქმე იყო საიმისოდ, რომ მმართველი პარტიის დღის წესრიგში ვირუსის საკითხი დაეყენებინათ. თვის ბოლოს პრეზიდენტ დონალდ ტრამპის ვიზიტი იყო დაგეგმილი. ის მიიტყუეს იმ დაპირებით, რომ გუჯარათის შტატის სპორტულ მოედანზე მილიონიან აუდიტორიას დაახვედრებდნენ. ამ ყველაფერმა ბევრი დრო და ფული წაიღო. შემდეგ იყო დელის საკანონმდებლო ასამბლეის არჩევნები, რომელშიც პარტია ბჰარატია ჯანატა („ხალხის პარტია“) დამარცხებისთვის იყო განწირული, ძალისხმევის გაორმაგების მიუხედავად – მავნე, ყველაფრის მკადრებელი ინდუსნაციონალისტური კამპანიით. ეს კამპანია ფიზიკური ძალადობისა და „მოღალატეების“ ამოხოცვის მუქარით იყო გაჯერებული. ისინი მაინც დამარცხდნენ [ბჰარატია ჯანატა მეორე ადგილზე გავიდა]. ამიტომ ამ დამცირებაში ბრალდებული მუსლიმები უნდა დაესაჯათ. შეიარაღებული ინდუსი ვიჯილანტების ბრბომ დელიში, მუშათა კლასის დასახლებაში მცხოვრებ მუსლიმებს შეუტია. მათ პოლიციაც უმაგრებდა ზურგს. გადაწვეს სახლები, მაღაზიები, მეჩეთები და სკოლები. საპასუხოდ იმ მუსლიმებმაც შეუტიეს, რომლებიც ამბის ასეთ განვითარებას ელოდნენ. დაიღუპა 50-ზე მეტი ადამიანი. ათასობით ადამიანი ადგილობრივ სასაფლაოებზე მდებარე დევნილთა ბანაკებში გადასახლდა. ჯერ კიდევ დასახიჩრებული გვამებისგან ბინძურ, მყრალ საკანალიზაციო ქსელს ასუფთავებდნენ, როდესაც მთავრობის წევრებმა პირველი შეხვედრა გამართეს COVID-ის შესახებ და ინდოელთა უმეტესობამ პირველად გაიგო „ხელის სანიტაიზერის“ შესახებ. მარტის თვეც დატვირთული იყო. პირველი ორი კვირა დაეთმო ცენტრალურ შტატში, მადჰია-პრადეშში მთავრობის კონგრესს და „ხალხის პარტიის“ მთავრობის დანიშვნას. 11 მარტს ჯანდაცვის მსოფლიო ორგანიზაციამ COVID-19 პანდემიად გამოაცხადა. ორი დღის შემდეგ, 13 მარტს ჯანდაცვის მინისტრმა კი განაცხადა, რომ კორონა „ჯანმრთელობისთვის არ არის საგანგაშო“. საბოლოოდ, 19 მარტს ინდოეთის პრემიერ-მინისტრმა ერს მიმართა. ბევრი არ უვარჯიშია. მან უბრალოდ საფრანგეთისა და იტალიის სტრატეგიები მიითვისა. გაგვაფრთხილა „სოციალური დისტანცირების“ საჭიროებაზე (ეს მარტივი გასაგებია საზოგადოებისთვის, რომელიც ასე ღრმად არის ჩაფლული კასტურ წყობაში) და 22 მარტიდან კომენდანტის საათი გამოაცხადა. არაფერი უთქვამს იმაზე, თუ რის გაკეთებას აპირებდა მთავრობა კრიზისის დროს, თუმცა ხალხს სთხოვა, გამოსულიყვნენ აივნებზე და ჯანდაცვის მუშაკებთან მისასალმებლად ქვაბებსა და ტაფებზე დაეკრათ. პრემიერ-მინისტრს იმ დრომდე არც კი ეხსენებინა, ინდოეთი რომ კვლავ ეწეოდა დამცავი და სასუნთქი აღჭუღვილობების ექსპორტს. ნაცვლად იმისა, რომ ეს აღჭურვილობა საავადმყოფოებისა და სამედიცინო პერსონალისთვის შემოენახათ. გასაკვირი არც იყო, ნარენდა მოდის [პრემიერ-მინისტრის] წინადადებას დიდი ენთუზიაზმით რომ შეხვდნენ. ურტყამდნენ ქვაბებს, ცეკვავდნენ და აწყობდნენ პროცესიებს. მთლად სოციალური დისტანცირებაც არ გამოვიდა. მომდევნო დღეებში კი კაცი წმინდა ძროხის ნაკელის გროვაში ჩახტა, ხოლო „ხალხის პარტიის“ მხარდამჭერებმა ძროხის შარდის სმის წვეულებები გამართეს. ობიექტურობისთვის ისიც უნდა ითქვას, რომ ბევრმა მუსლიმურმა ორგანიზაციამ გამოაცხადა, რომ ყოვლისშემძლე [ღმერთი] იყო პასუხი ვირუსისთვის და მორწმუნეებს მეჩეთებში შეკრებისკენ მოუწოდა. 24 მარტს, საღამოს 8 საათზე მოდი ტელეკრანზე ისევ გამოჩნდა და გამოაცხადა, რომ შუაღამის შემდეგ მთელი ინდოეთი მკაცრი თვითიზოლაციის რეჟიმზე გადაერთვებოდა. მისივე თქმით, იზღუდებოდა კერძო და საზოგადოებრივი ტრანსპორტის გადაადგილება. ისიც დასძინა, რომ ამ გადაწყვეტილებას იღებდა არა როგორც პრემიერ-მინისტრი, არამედ როგორც ჩვენი ოჯახის უხუცესი. ვის შეუძლია გადაწყვიტოს, რომ 1.38-მილიარდიანი სრულიად მოუმზადებელი მოსახლეობა თვითიზოლაზიაში გადავიდეს? თან ისე, რომ ამის შესახებ 4 საათით ადრე ატყობინებ. მან ეს მთავრობასთან შეუთანხმებლად გადაწყვიტა, მთავრობას კი ამ გადაწყვეტილების საზიანო შედეგებთან გამკლავება მოუწევს. ინდოეთის პრემიერ-მინისტრი მოქალაქეებს მოიაზრებს მტრულ ძალად, რომელსაც თავს მოულოდნელად უნდა დაესხა და არასდროს ენდო – მისი მეთოდები სწორედ ასეთ შთაბეჭდილებას ტოვებს. და ვიყავით თვითიზოლაციაში. ჯანდაცვის ბევრი სპეციალისტი და ეპიდემიოლოგი ამ ნაბიჯს მიესალმა. შეიძლება, ისინი თეორიულად მართლები არიან. თუმცა, ცხადია, არცერთ მათგანს არ შეუძლია მხარი დაუჭიროს დამღუპველ რამეს – გეგმის არქონას. ან მზაობას, ანუ მსოფლიოს ყველაზე დიდ, სადამსჯელო იზოლაციას, რომელიც ბოლოს დასახული მიზნების სრულიად საპირისპირო მოვლენად იქცა. კაცმა, რომელსაც სეირის ყურება უყვარს, თვითონვე შექმნა ყველა სეირის სეირი. სანამ შეშფოთებული მსოფლიო აკვირდებოდა, ინდოეთმა ყველა თავისი სირცხვილი გამოააშკარავა – სისასტიკე, სტრუქტურულობა, სოციალური და ეკონომიკური უთანასწორობა, გაუხეშებული ინდიფერენტულობა ტანჯვის მიმართ. იზოლაციამ იმ ქიმიური ექსპერიმენტივით იმუშავა, დამალულ ნივთიერებებს რომ ამჟღავნებს. მაღაზიების, რესტორნებისა და სამშენებლო ინდუსტრიის დახურვასთან ერთად, მდიდარი და საშუალო კლასი გალავანშემორტყმულ დასახლებებში გამოიკეტა. ჩვენმა ქალაქებმა და მეგაქალაქებმა კი მუშათა კლასის თავიდან მოცილება დაიწყო. მიგრანტ მუშებს წანაზარდებივით იშორებდნენ. ბევრი მათგანი დამსაქმებელმა ან მიწათმფლობელმა გაიყვანა ქალაქიდან. ხოლო რადგანაც საზოგადოებრივი ტრანსპორტი არსად ჩანდა, საკუთარ სოფლებამდე ფეხით მსვლელობა დაიწყო მილიონობით ღატაკმა, მშიერმა, მწყურვალმა, ახალგაზრდამ და მოხუცმა, კაცმა, ქალმა, ბავშვმა, სნეულმა, შეზღუდული შესაძლებლობის მქონემ, მათ, ვისაც წასასვლელი აღარსად ჰქონდა. ისინი დღეების განმავლობაში მიაბიჯებდნენ ასობით კილომეტრით დაშორებულ ბადაუნისკენ, აგრასკენ, აზამგარჰისკენ, ალიგარჰისკენ, ლუქნავისკენ, გორაკჰპურისკენ. ზოგიერთი მათგანი გზაში დაიღუპა. მათ იცოდნენ, რომ შინ ბრუნდებოდნენ, რათა შიმშილი დაეოკებინათ. ალბათ ისიც იცოდნენ, რომ შეიძლებოდა ვირუსის გადამტანი ყოფილიყვნენ და ოჯახის წევრებისთვის, მშობლებისა და ბებია-ბაბუებისთვის გადაედოთ. თუმცა მათ საშინლად სჭირდებოდათ სიახლოვის ნამცეცი, საკვებივით სჭირდებოდათ – თუ სიყვარულივით არა – თავშესაფარი და ღირსების გრძნობა. სანამ მიდიოდნენ, ზოგიერთს კომენდანტის საათის წესების დარღვევის გამო სასტიკად უსწორდებოდა და ამცირებდა პოლიცია. ბიჭებს ქუჩაში ხტუნვასა და ბუქნების გაკეთებას აიძულებდნენ. ქალაქ ბარელისთან კი ადამიანები შეაჯგუფეს და ქიმიური სპრეი გადაასხეს. რამდენიმე დღის შემდეგ მთავრობამ ვირუსის გავრცელების შიშით შტატების შესასვლელები ქვეითებისთვისაც ჩაკეტა. ადამიანები, რომლებიც დღეების განმავლობაში სახლებისკენ მიიწევდნენ, შეაჩერეს და აიძულეს ქალაქების იმ ბანაკებში დაბრუნებულიყვნენ, საიდანაც ასევე იძულებით წამოვიდნენ. ხანდაზმულებს 1947 წლის გადასახლების მოგონებები გაუცოცხლდათ, როდესაც ინდოეთი გაიხლიჩა და პაკისტანი დაიბადა. ოღონდ იმ განსხვავებით, რომ ახლანდელი გამოსვლა [ბიბლ.] არა რელიგიამ, არამედ კლასობრივმა დაყოფამ განაპირობა. თუმცა ისინი ინდოეთის უღარიბეს ადამიანებს არ წარმოადგენდნენ. მათ სამსახური მაინც ჰქონდათ (აქამდე მაინც) ქალაქში და სახლი, სადაც დაბრუნდებოდნენ. უსამსახურონი, უსახლკარონი და უიმედონი ისევ იქ რჩებოდნენ, სადაც აქამდე იყვნენ – ქალაქებსა თუ სოფლებში, სადაც დიდ გაჭირვებას ამ ტრაგედიამდე კარგა ხნით ადრე ჰქონდა ფესვი გადგმული. ამ კოშმარული დღეების მიუხედავად, შინაგან საქმეთა მინისტრი ამიტ შაჰი საჯაროდ მაინც არ გამოჩენილა. როცა დელიში მსვლელობა დაიწყო, ღაზიპურამდე მისასვლელად იმ ჟურნალის პრესბარათი გამოვიყენე, რომლისთვისაც რეგულარულად ვწერ. ბიბლიური სცენა იყო. ან შეიძლება არც იყო. ბიბლია ვერ წარმოიდგენდა ადამიანების ასეთ სიმრავლეს. ფიზიკური დისტანცირების მიზნით გამოცხადებულმა თვითიზოლაციამ საპირისპირო შედეგი გამოიღო – წარმოუდგენელი მასშტაბის ფიზიკური სიმჭიდროვე. ინდოეთის ქალაქებშიც კი ეს არის სინამდვილე. მთავარი ქუჩები შეიძლება ცარიელი იყოს, მაგრამ ღარიბები გამოკეტილნი არიან ბარაკებში, ჯურღმულებსა და ქოხმახებში. მსვლელობაში მონაწილეთაგან ვისაც ვესაუბრე, ყველა ღელავდა ვირუსის გამო. თუმცა ის ამ ადამიანების ცხოვრებაში ნაკლებად რეალური, ნაკლებად ხელშესახები იყო, განსხვავებით მოსალოდნელი უმუშევრობისგან, შიმშილისა და პოლიციის ძალადობისგან. ყველა იმ ადამიანს შორის, ვისაც გავესაუბრე (მათ შორის ერთი კვირით ადრე ანტიისლამურ თავდასხმებს გადარჩენილ მუსლიმი მკერავების ჯგუფს), ერთი კაცის სიტყვებმა განსაკუთრებით ამაღელვა. ის დურგალი იყო, მარჯიტი ერქვა და გორახპურამდე, ნეპალის საზღვრის მახლობლად განეზრახა მისვლა. „იქნებ, როცა ბატონი მოდი ამ გადაწყვეტილებას იღებდა, ჩვენ შესახებ არვინ არაფერი უთხრა. იქნებ მან ჩვენზე არ იცის?“, – თქვა მან. ეს „ჩვენ“ დაახლოებით 460 მილიონი ადამიანია. შტატების ადგილობრივმა მთავრობებმა (აშშ-ის მსგავსად) მეტი გულისხმიერება გამოიჩინეს კრიზისის დროს. სავაჭრო გაერთიანებები, კერძო პირები და სხვადასხვა კოლექტივი საკვებსა და განსაკუთრებით საჭირო პროდუქტებს არიგებდნენ. ცენტრალური მთავრობა კი აუჩქარებლად პასუხობდა ადგილობრივ ხელისუფლებათა სასოწარკვეთილ თხოვნებს ფულად სახსრებზე. ირკვევა, რომ პრემიერ-მინისტრის დახმარების ეროვნულ ფონდს არ გააჩნია ხელმისაწვდომი მზა თანხა. ამის ნაცვლად, კეთილისმსურველთა ფული როგორღაც ახალ ამოუცნობ ფონდში PM-CARES-ში გადაუტანიათ. წინასწარ შეფუთულმა საკვებმაც დაიწყო გამოჩენა, შეფუთვებზე პრემიერ-მინისტრის სახე იყო გამოსახული. ამ ყველაფერთან ერთად, პრემიერ-მინისტრმა იოგა ნიდრას ვიდეო გამოაქვეყნა. ვიდეოში კომპიუტერული ანიმაციით შექმნილი, საოცნებო სხეულის მქონე თავისივე პროტოტიპი იოგას მოძრაობებს ასრულებს, რათა ხალხს თვითიზოლაციის სტრესთან გამკლავებაში დაეხმაროს. ნარცისიზმი ძალზედ შემაწუხებელია. შეიძლება, ერთ-ერთი ასანა [იოგას პოზა] სათხოვარი ასანა იყოს, რომლის მეშვეობითაც პრემიერი მოდი საფრანგეთის პრემიერ-მინისტრს სთხოვს: დაგვრთოს ნება, რომ დავარღვიოთ ის პრობლემური შეთანხმება Rafale-ის რეაქტიულ გამანადგურებლებზე [ინდოეთის მთავრობამ საფრანგეთისგან 7,8 მილიარდ ევროდ 36 ახალი საბრძოლო ხომალდი შეისყიდა] და ის 7,8 მილიარდი ევრო სასიცოცხლოდ მნიშვნელოვან საგანგებო ღონისძიებებს მოვახმაროთ მილიონობით მშიერი ადამიანის დასახმარებლად. ფრანგებიც უეჭველად გაგვიგებენ. თვითიზოლაციის მეორე კვირას მომარაგების ჯაჭვი წყდება, წამლები და განსაკუთრებული მნიშვნელობის მარაგები თავდება. ათასობით სატვირთოს მძღოლი ცოტაოდენი საკვებითა და წყლით შუა გზაშია მიტოვებული. მოსამკელად გამზადებული თავთავები ნელ-ნელა ლპება. დგას ეკონომიკური კრიზისი. მიმდინარეობს პოლიტიკური კრიზისი. კორონავირუსის ამბავი მეინსტრიმულმა მედიამ ერთხმად გადააქცია 24-საათიან, ტოქსიკურ ანტიმუსლიმურ კამპანიად. „სუპერგამავრცელებელი“ აღმოჩნდა ორგანიზაცია Tablighi Jamaat. ისინი ინფორმაციას მუსლიმთა სტიგმატიზებისა და დემონიზების მიზნით ავრცელებდნენ. ზოგადი რიტორიკა კი ისეთი იყო, თითქოს მუსლიმებმა შექმნეს ვირუსი და გაავრცელეს, როგორც ჯიჰადის ფორმა. Covid-ის კრიზისი ჯერ კიდევ წინ არის. ან არ არის. არ ვიცით. თუ/როდესაც ეს კრიზისი დადგება, შეგვიძლია დარწმუნებულნი ვიყოთ, რომ არსებული ცუდი წინასწარგანწყობები რელიგიის, კასტისა და კლასის მიმართ კიდევ უფრო გამძაფრდება. დღეს (2 აპრილს) ინდოეთში კორონავირუსის თითქმის 2 000 დადასტურებული შემთხვევა და 58 გარდაცვლილია. ცხადია, ეს მონაცემები სანდო არც არის, რადგან ის, სამწუხაროდ, ტესტების უმნიშვნელო რაოდენობას ემყარება. ექსპერტთა მოსაზრებები ერთმანეთს არ ემთხვევა. ზოგიერთი მილიონობით ინფიცირებულს წინასწარმეტყველებს. სხვები ფიქრობენ, რომ დანაკარგი გაცილებით ნაკლები იქნება. ჩვენ შეიძლება ვერასდროს დავინახოთ კრიზისის კონტურები, მაშინაც კი, როცა ჩვენ შემოგვიტევს. რაც ვიცით, ის არის, რომ ჯერ საავადმყოფოებზე მოთხოვნა არ გაზრდილა. ინდოეთის სახელმწიფო ჰოსპიტლები და კლინიკები ვერ უმკლავდებიან მილიონამდე ბავშვს, რომლებიც ყოველწლიურად იღუპებიან დიარეის, საკვების უკმარისობისა და ჯანმრთელობის სხვა პრობლემების გამო. ვერ უმკლავდებიან ტუბერკულიოზით დაავადებულ ასობით ათას პაციენტს (მსოფლიოში დაავადებულთა მეოთხედი), ანემიურ და კვების უკმარისობით დასუსტებულ პოპულაციას, რომლისთვისაც ნებისმიერი ავადმყოფობა შეიძლება ფატალური აღმოჩნდეს – აქ ისეთ კრიზისს ვერ გაუმკლავდებიან, როგორიც ამერიკასა და ევროპაშია. მთელი ჯანდაცვა მეტ-ნაკლებად შეჩერებულია, რადგან საავადმყოფოები ვირუსთან ბრძოლაზე გადაერთნენ. ინდოეთის სამედიცინო დისციპლინების ლეგენდარული ინსტიტუტის ტრავმის ცენტრი დახურულია. კიბოთი დაავადებული ასობით პაციენტი კი, რომლებიც საავადმყოფოს გზებზე ცხოვრობენ, ნახირივით გაფანტულა. მათ „კიბოს დევნილების“ სახელით იცნობენ. ადამიანები დაავადდებიან და სახლებში დაიხოცებიან. ჩვენ მათი ამბავი შეიძლება ვერასოდეს გავიგოთ. ისინი შეიძლება სტატისტიკადაც კი ვერ იქცნენ. ჩვენ მხოლოდ იმედიღა გვრჩება, რომ ის მკვლევრები, რომელთა აზრითაც, ვირუსს ცივი ამინდი მოსწონს, არ ცდებიან (თუმცა სხვა მკვლევრებს ამაში ეჭვი ეპარებათ). ასე ძლიერად, ასე ირაციონალურად ხალხს არასოდეს უნატრია მწველი, სასტიკი ინდური ზაფხული. რა არის ეს, რაც ჩვენ დაგვემართა? კი, ვირუსია. მას არ გააჩნია მორალური ღირებულება. თუმცა ის ნამდვილად ვირუსზე მეტია. ზოგიერთს სწამს, რომ ეს უფლის გზაა ჩვენს აზრზე მოსაყვანად. ზოგიერთის აზრით, ეს ჩინური კონსპირაციაა, რათა მსოფლიოზე ბატონობა შეძლონ. #პოლიტიკა #პანდემია #კრიზისი

აშშ-ის პრეზიდენტმა დონალდ ტრამპმა ჯანდაცვის მსოფლიო ორგანიზაციის (WHO) ბიუჯეტში ამერიკული შენატანის გადახდა შეაჩერა. იგი თვლის, რომ კორონავირუსული პანდემიისას, ზემოხსენებულმა ორგანიზაციამ, სათანადოდ ვერ შეასრულა მასზე დაკისრებული მოვალეობები და აღნიშნულისთვის „პასუხი უნდა აგოს“. ოპონენტები დარწმუნებულები არიან, რომ ტრამპს, რომელსაც თავად აკრიტიკებენ დაგვიანებული რეაქციების გამო, უბრალოდ ცდილობს „განტევების ვაცის“ პოვნას და პასუხისმგებლობის სხვისთვის დაკისრებას. საინტერესოა ვინ არის მართალი? შეერთებული შტატების პრეზიდენტმა რამდენჯერმე დაადანაშაულა WHO კორონავირუსთან დაკავშირებით დაგვიანებულ რეაქციაზე და დაკისრებული მოვალეობების არასათანადო შესრულებაში. მისი თქმით, ამ ორგანიზაციამ COVID-19-თან დაკავშირებით რეალური ფაქტები დამალა. 2019 წლის 31 დეკემბერს ჩინეთის ხელისუფლებამ ჯანდაცვის მსოფლიო ორგანიზაციის ადგილობრივ წარმომადგენლობას შეატყობინა უჰანის პროვინციაში, გაურკვეველი წარმოშობის პნევმონიური დაავადების ზრდის შესახებ. აღნიშნული ინფორმაცია იმავე დღეს ჟენევაში (შვეიცარია) გადაიგზავნა, WHO-ს შტაბ-ბინაში. მომდევნო დღესვე, WHO-მ ექსპერტთა სპეციალური ოპერატიული ჯგუფი ჩამოაყალიბა, რომლებმაც სიტუაციის მონიტორინგი დაიწყეს. სულ რაღაც 3 დღეში ორგანიზაციამ პირველადი ინფორმაცია გამოაქვეყნა უცნობი ვირუსის შესახებ, მის სოციალურ ქსელსა და საექსპერტო ჟურნალებში, ხოლო 10 იანვარს პირველი რეკომენდაცია გასცა სხვადასხვა ქვეყნებისთვის. აღნიშნული დროისთვის WHO-ს არ ჰქონდა არანაირი მტკიცებულება, რომ უცნობი დაავადება ადამიანიდან ადამიანს გადაეცემოდა. ფაქტი მხოლოდ რამდენიმე დღის შემდეგ გაირკვა, როდესაც პნევმონიით დაავადებულ პაციენტებთან კონტაქტში მყოფი ექიმები გახდნენ შეუძლოდ. გარდა ამისა, ინფიცირების პირველი შემთხვევა დაფიქსირდა ტაილანდში. ამის თაობაზე, გამართულ პრესკონფერენციაზე, საზოგადოებას ინფორმაცია მიაწოდა WHO-ს ეპიდემიოლოგმა მარია ვან კერქჰოვემ. აუცილებელია ითქვას, რომ აღნიშნული მომენტისთვის ჯანდაცვის მსოფლიო ორგანიზაციის ექსპერტებს არანაირი წვდომა ჰქონდათ ჩინეთში, უჰანის პროვინციაში მყოფ დაავადებულებთან. 28 იანვარს, თავად ორგანიზაციის ხელმძღვანელი თედროს ღებრეისუსი შეხვდა ჩინეთის ლიდერს სი ცზიპინს და სთხოვა ნებართვა, ამ პროვინციაჩი ექსპერტთა ჯგუფის გაგზავნის თაობაზე, მაგრამ ნებართვა მხოლოდ 16 თებერვალს მიიღეს მათ. კრიტიკოსებისთვის მსჯელობის მთავარ საგანს ის წარმოადგენს, რომ ღებრეისუსი პოზიტიურად აფასებდა ჩინეთის ხელისუფლების მიერ, უცნობი ვირუსის პრევენციისთვის განხორციელებულ ღონისძიებებს. პოლიტიკოსები და დასავლელი ექსპერტები კი კითხვის ნიშნის ქვეშ აყენებდნენ ოფიციალური პეკინის მიერ, მსოფლიოსთვის მიწოდებული სტატისტიკისა და მონაცემების სისწორეს, რადგან დოკუმენტებში მნიშვნელოვანი ხარვეზები არსებობდა. სპეციალისტები ვარაუდობენ, რომ ჩინეთის ხელისუფლება დიდხანს მალავდა რეალურ სურათს ვირუსთან დაკავშირებით. დონალდ ტრამპმა არაერთხელ განაცხადა, რომ ოფიციალიალური სტატისტიკა ინფიცირებულთა და დაღუპულთა რაოდენობასთნ შედარებით ეჭვს ბადებს, რადგან რიცხვები საკმაოდ დაბალი იყო. აშშ-ის პრეზიდენტის თქმით, ოფიციალურ ვაშინგტონს ჯანდაცვის მსოფლიო ორგანიზაციის ბიუჯეტში ყოველწლიურად $400-დან $500 მლნ-მდე შეაქვს, მაშინ როდესაც ჩინეთი მხოლოდ $40 მლნ-ით აფინანსებს. WHO-ს ერთ-ერთი დეპარტამენტის ყოფილი ხელმძღვანელის ენტონი კოსტელოს განცხადებით, ამერიკული დაფინანსების გარეშე, ორგანიზაციას მნიშვნელოვანი პრობლემები შეექმნება, რადგან ვერ შეძლებს სხვადასხვა სახელწმიფოებისთვის დროულ დახმარებას, ექიმთა გადამზადებას და ა.შ. „უამრავი ღარიბი სახელმწიფო ჯერ მხოლოდ ეპიდემიის საწყის ეტაპზეა. იმ შემთხვევაში, თუ ჯანდაცვის მსოფლიო ორგანიზაციას არ ექნება საკმარისი ფინანსები, შესაძლოა კატასტროფა მოხდეს“, - განაცხადა კასტელომ. WHO-ს მიერ, თებერვლის დასაწყისში გაკეთებული განცხადებით, საერთაშორისო ექსპერტთა საზოგადოებამ შეიმუშავა სპეციალური გეგმა კორონავირუსის წინააღმდეგ საბრძოლველად და პანდემიის შედეგად დაზარალებული ქვეყნების დასახმარებლად. აღნიშნულის განსახორციელებლად კი $675 მლნ. იყო საჭირო. ტრამპის თქმით, ორგანიზაციისთვის დაფინანსება შეჩერდება მანამ, სანამ „კორონავირუსის გავრცელების“ საკითხზე WHO-ს რეალური როლი არ გახდება ცნობილი. ექსპერტთა ვარაუდით, აშშ-ის პრეზიდენტს სურს, რომ ჯანდაცვის მსოფლიო ორგანიზაციამ უარი თქვას საზღვრების დახურვის რეკომენდაციაზე და ადამიანთა გადაადგილების შეზღუდვაზე. კოსტელოს მოსაზრებით გადაადგილების აკრძალვა არაეფექტურია და ძირითად, გადამწყვეტ როლს ადრეული ტესტირების გამოყენება ასრულებს, როგორც ეს სამხრეთ კორეაში განხორციელდა, როდესაც კვირაში 66 000 ტესტირება ხორციელდებოდა. ტრამპის განცხადების საპასუხოდ, გაეროს გენერალურმა მდივანმა ანტონიო გუტერიშმა განაცხადა, რომ ახლა არ არის სწორი დრო ჯანდაცვის მსოფლიო ორგანიზაციისთვის ფინანსების შესამცირებლად. წყარო: Coronavirus: Trump accused WHO of concealing facts and supporting China. He's right? (15.04.2020),#coronavirus #trump #USA #WHO #headline #stopcovid19

თბილისის ინფექციური საავადმყოფოს სამედიცინო დირექტორის, მარინა ეზუგბაიას განცხადებით, გუშინ მათ ცენტრში ტესტირება ჯამში 21 პაციენტს ჩაუტარდა. ეზუგბაიას განმარტებით, კონტროლის მიზნით შესულ ახალ პაციენტებს კოვიდ - 19 არ დაუდასტურდათ. მისივე თქმით, კორონავირუსით ინფიცირებულ იმ პაციენტებს, რომლებთან დაკავშირებითაც გამოჯანმრთელების მოლოდინი არის, ზოგიერთის შემთხვევაში პირველად ტესტზე უარყოფითი პასუხი მიიღეს, ზოგთან კი კვლევამ ვირუსის კონცენტრაციის შემცირება აჩვენა. „სულ 21 პაციენტზე გაკეთდა ტესტირება, ვინც იყო ახალი პაციენტები შემოსული კონტროლზე, ყველასთან ნეგატიური იყო. ჩვენი პაციენტების ტესტირება გამოჯანმრთელების თვალსაზრისით გრძელდება. გუშინ რამდენიმესთან ჩატარდა, მიღებული იყო უარყოფითი პასუხი, დღეს ვნახოთ, დღის მეორე ნახევარში როგორი ვითარება გვექნება. რამდენიმესთან კონცენტრაციის შემცირებაა და მთლად სრულად ნეგატიური ვერ მივიღეთ, მაგრამ ალბათ გაგრძელდება მათი კვლევა და ისინიც შეემატებიან გაწერილთა რიცხვს“ , – აღნიშნა ეზუგბაიამ. ინფორმაციისთვის, ამ დროისთვის თბილისის ინფექციურ საავადმყოფოში კორონავირუსისგან სულ განკურნებულია 29 ადამიანი, ქვეყნის მასშტაბით კი – 39.#კორონავვირუსი #ნიფიცირებული #პაციენტევი #მარინაეზუგბაია #tbilisidaily

მოსალოდნელია, რომ ჯანდაცვის მსოფლიო ორგანიზაცია რეკომენდაციის სახით გასცემს „6 შემდგომ ნაბიჯს“, რომლებიც უნდა გაითვალისწინონ სახელმწიფოებმა, მათ ტერიტორიებზე არსებული შეზღუდვების ეტაპობრივად შესამსუბუქებლად. პირველი რიგში, ქვეყნებმა უნდა დაადასტურონ, რომ ვირუსის შემდგომი გადაცემა კონტროლს ექვემდებარება. მეორე, მათ უნდა უზრუნველყონ, რომ ჯანდაცვის შიდა სისტემას აქვს უნარი გამოავლინოს COVID-19-ით ინფიცირების ყველა შემთხვევა, მისი ტესტირება, იზოლირება, მკურნალობა და დამატებით, ყველა კონტაქტის დადგენა. მესამე, ისინი უნდა დარწმუნდნენ, რომ გავრცელების საფრთხე მინიმუმზეა დაყვანილი, განსაკუთრებით ისეთ დაწესებულებებში, როგორებიც კლინიკები და სამშობიარო სახლებია. მეოთხე, ქვეყნებმა უნდა მიიღონ პრევენციული ზომები სამუშაო ადგილებზე, სკოლებსა და სხვა მნიშვნელოვან ადგილებში. მეხუთე, მათ უნდა შეძლონ ვირუსის გადატანის რისკების მართვა და მეექვსე, უნდა მოხდეს ცნობიერების ამაღლება და ამ კუთხით შესაბამისი ორგანიზაციების ჩართვა, საზოგადოების მეტი ინფორმირებისთვის და „ახალ ნორმასთან“ ადაპტირებისთვის. „სახელმწიფოებმა უნდა შეძლონ ბალანსის დაცვა იმ ზომებს შორის, რომელიც ეხება COVID-19-ით გამოწვეული სიკვდილიანობის შემცირებასა და ჯანმრთელობის სხვა დაავადებებს, რათა არ მოხდეს ჯანდაცვის სისტემის გადატვირთვა და არ ჰქონდეს მას მძიმე სოციალურ-ეკონომიკური ზემოქმედება“, - განაცხადა ღებრეისუსმა. წყარო: "Testing, tracing, and when to lift restrictions: WHO’s latest advice" (April 14, 2020) moderndiplomacy #coronavirus #WHO #International #UN #headline #stopcovid19