ჩემი შხამი წამალია მეთქი.
ასე რომ , თამამად - გადაყლაპე.
'ნუ გეშინია, არ მოგკლავსთქო' - არ გეტყვი, რადგანაც ტყუილი იქნება.
მოგკლავს, თანაც ნელნელა ტანჯვით, ტკივილებით.
მაგრამ თუკი , გად-აიტან - თუკი მისცემ შხამს უფლებას, შენში არსებული მატერია დაწვას და სულად გარდაქმნას - ის რაც გკლავდა - გშობს.
სიკვდილს წამიერად მოყვება დაბადება - სიყვარულად, და შენი სიცოცხლე სიცილით შეივსება .
ასე რომ
თამამად - ყლურწე, შხამი - წამლად შეგერგება.
ჩემს თვალებში ანთებულ ვარსკვლავებად მეცინება და ველი - შენს მეორედდაბადებას.
როგორ შეგიძლია უარი უთხრა ბავშვს , რომელსაც - ასე სწამს, რომ - ტკივილებს სიყვარულად ააცეკვებ , თუკი - შიშებს დაეჯღანები, დასცინებ და სიღრმეს ჩაიხუტებ?..
ჩემი სიტყვები შენს სულზე მოსრიალე გველებად იხლართებიან და შეგრძნებების სიმძაფრეს წვეთ-წვეთან - უსხავენ სისხლად - საწამლავს - რომელიც - წამლავს.
ის ვინც გკლავს - გადაგარჩენს - ის ვინც გიცავს - გარიდებს ტკივილებს - კლავს შენს - თავისუფალ არსებობას.
ჭიპლარგადაუჭრელ არსებობას - მკვდარშობილ სიცოცხლეს ამოარწყევ , თუკი - საწამლავს დანებდები.
ამოისუნთქე - იშვი, სიყვარულად.
მშვიდად , ღრმად - იძინე სიღრმეში.
თვალებზე ხელს დაგაფარებ, თუკი - შეგეშინდება, მაგრამ - შენით უნდა გაიკვალო გზა, დაწვისა - და შობის, ჩემი ჩურჩული - გაგაღვიძებს , თუკი სიჩუმეში - არარად გაგეღიმება .
იტირე, იტირე, რადგან შენ - ი ბ ა დ ე ბ ი .
მაგრამ - თუკი საწამლავს - არ დანებდები და ყალბი თვითილუზიით ეცდები გაექცე - ტკივილებს, ტანჯვა უფრო მეტად გაიზრდება და ჩემი თითების შეხებას ვეღარ იგრძნობ.
შხამის უარყოფით სიყვარულს უარყოფ და მე მკლავ - შენსავე არსში, ვქრები - შენს დაბორკილებულ სიცოცხლეში, რომელსაც ისღა დარჩენია დროის ისარი მოგლიჯოს და გაიყუჩოს - გაუყუჩებელი.
დანებდი - ან,
საუკუნოვანი ძებნით მეძებე - უდაბნოში, ქვესკნელში, ლაბირინთში, სადაც -
მხოლოდ შენივე დანებებული სიტყვების ექო მოგესმება და ინატრებ, ოდნავ მაინც გაიგონო ჩემი ჩურჩული.
მე-ძიებ და ვერ მიპოვნი, მაგრამ თუკი - თავით გადაეშვები ტკივილად აცეკვებულ სიღრმეში - ღიმილით მოვალ და გეტყვი ჩუმად , როგორც ყოველთვის, მე აქ ვარ. აქ.
ჩვენ - ილუზიური სიმშვიდისთვის არ ვიშვით, ჩვენ -
ვარსებობთ - შეგრძნებათა უკიდურეს დაძაბულობად - სიყვარულად,
რომელიც შენს ყველა - წერტილს ააკივლებს.
წერტილი.
(ნინო დიდებაშვილი)