ვთვლი, რომ ხმების საკმარისი რაოდენობა იქნება - სააკაშვილი

საქართველოს ყოფილმა პრეზიდენტმა, მიხეილ სააკაშვილმა უკრაინულ არხ „უკრაინა 24“-თან საუბრისას განაცხადა, რომ დარწმუნებულია, ხმების საკმარის რაოდენობას მოაგროვებს და უკრაინის უმაღლესი რადა მას ვიცე-პრემიერად დაამტკიცებს. „ვთვლი, რომ ხმების საკმარისი რაოდენობა იქნება. ძალიან ოპტიმისტურად ვარ განწყობილი. უბრალოდ არ იყო ფრაქციის „ხალხის მსახურის“ მობილიზაცია“, - აღნიშნა სააკაშვილმა. მისივე თქმით, მან თავის დროზე არჩევნებში სწორედ ,,ხალხის მსახურის“ პარტიას დაუჭირა მხარი. „არჩევნებზე, როცა ვნახე, რომ ჩემი პარტია 2-3 პროცენტს აგროვებდა ამომრჩევლების ხმებს და ვერ შევდიოდით პარლამენტში, მე ჩემს მხარდამჭერებს მოვუწოდე, ბევრ ათას უკრაინელს, რომ ხმა „ხალხის მსახურისთვის“ მიეცათ“, - აღნიშნა სააკაშვილმა. ინფორმაციისთვის, რამდენიმე დღის წინ ცნობილი გახდა, რომ უკრაინის პრეზიდენტმა, ვოლოდირ ზელენსკიმ ოდესის ყოფილ გუბერნატორს, მიხეილ სააკაშვილს რეფორმების დარგში ვიცე-პრემიერის თანამდებობა შესთავაზა. #უკრაინა #სააკაშვილი #ზელენსკი #რადა #tbilisidaily