აფხაზეთიდან დევნილი წარმატებული სპორტსმენების დაჯილდოვება

ვალერი არქანიას სახელობის არტ-გალერეაში აფხაზეთიდან დევნილი ვეტერანი სპორტსმენების, სპორტის მუშაკების და წარმატებული სპორტსმენების დაჯილდოება გაიმართა. ინფორმაციას აფხაზეთის ავტონომიური რესპუბლიკის მთავრობის ვებ-გვერდი ავრცელებს. სპორტსმენებს საპატიო სიგელები და სიმბოლური საჩუქრები აფხაზეთის ავტონომიური რესპუბლიკის მთავრობის თავმჯდომარემ, რუსლან აბაშიძემ, განათლებისა და კულტურის მინისტრმა როლანდ ნიჟარაძემ, მინისტრის მოადგილეებმა მარინა შენგელიამ და ირმა კეკელიძემ, განათლებისა და კულტურის სამინისტროს სპორტისა და ახალგაზრდულ საქმეთა სამსახურის უფროსმა ვიტალი ბენდელიანმა გადასცეს. "სპეციალური კომისიის მიერ მიმდინარე წლის საუკეთესო სპორტსმენებად მურთაზ ვეკუა, ნუგზარ ბოჯგუა, გერასიმე ესებუა, დავით ზარქუა, ზურაბ შენგელია, დავით თაქთაქიშვილი, ბენო ადამია, ლუკა კაჭარავა, მარიამ შხვაცაბაია და სოხუმის „დინამოს“ ქალთა გუნდი დასახელდნენ. წახალისების მიზნით, წარმატებული სპორტსმენების დაჯილდოება აფხაზეთის ავტონომიური რესპუბლიკის განათლებისა და კულტურის სამინისტროს პროგრამის ფარგლებში ყოველწლიურად იმართება. ნომინანტების შერჩევა სპორტული ორგანიზაციების და ფედერაციების მიერ წარდგენილი კანდიდატების საფუძველზე, საგანგებოდ შექმნილი კომისიის მიერ ხორციელდება." - წერია გავრცელებულ განცხადებაში. ღონისძიების ფარგლებში სპორტისა და ახალგაზრდულ საქმეთა სამსახურის უფროსმა 2020 წლის საქმიანობის ანგარიში წარადგინა. ღონისძიებას ცნობილი სპორტსმენები და აფხაზეთის საზოგადოების წარმომადგენლები ესწრებოდნენ. ________________ თქვენ ამ სტატიას კითხულობთ პლატფორმა Feedc -ზე. Feedc არის ახალი მედია პლატფორმა, სადაც შეგიძლიათ გაეცნოთ ჩვენს სტატიებს. #SokhumiDaily #Sokhumi #სოხუმი #აფხაზეთი #ახალიამბები #აფხაზეთისაქართველოა