Ցուցարարները շրջափակել են Ազգային ժողովի բոլոր մուտքերը

«Հայրենիքի փրկության շարժման» վարչապետի միասնական թեկնածու Վազգեն Մանուկյանը Բաղրամյան պողոտայում հանրահավաքի ժամանակ կոչ արեց փակել Ազգային ժողովի շենքի բոլոր մուտքերը: Նա ասաց, որ չպետք է  թույլ տալ պատգամավորներին մուտք գործել Ազգային ժողովի շենք։ Դրանից հետո իրավիճակը կտրուկ լարվեց, քաշքշուկ սկսվեց ոստիկանների և նրանց միջև: Հանրահավաքի մասնակիցներն այս պահին շրջափակել են խորհրդարանի բոլոր մուտքերը, այստեղ պատրաստվում են վրաններ տեղադրել: Շարժման համակարգող Իշխան Սաղաթելյանը հայտարարեց, որ նպատակ չունեն անցնել Ազգային ժողովի շենքի տարածք, հորդորեց չտրվել սադրանքների: Վարչապետի հրաժարականը պահանջող շարժման անդամները արդեն 10 օրից ավելի է՝ փակ են պահում պողոտան։ Շարժումը, կողմ լինելով արտահերթ ընտրություններին, առաջարկել է իր սցենարը՝ վարչապետի հրաժարական, ժամանակավոր կառավարության ձևավորում, որից հետո ընտրություններ։   https://www.azatutyun.am/a/31141773.html #Լուրեր #Քաղաքական