ისრაელის ჯანდაცვის მინისტრი - ქვეყანა კორონავირუსის მეორე ტალღის დასაწყისშია

ისრაელის ჯანდაცვის მინისტრი საზოგადოებრივ შეკრებებსა და ღონისძიებებზე შეზღუდვების ხელახალი დაწესების რეკომენდაციით გამოდის. როგორც იული ედელშტეინმა განაცხადა, ქვეყანა კორონავირუსის მეორე ტალღის დასაწყისში იმყოფება. ამის შესახებ Timesofisrael-ი წერს. მინისტრის განმარტებით, აუცილებელია, რომ საჯარო სექტორის თანამშრომლების სულ მცირე 30% დისტანციურ რეჟიმში მუშაობდეს. მისივე თქმით, დამქირავებლებმა თანამშრომლებს სახლიდან მუშაობის უფლება უნდა მისცენ. „რეკომენდაციები არასასიამოვნოა, თუმცა აუცილებელია იმისთვის, რომ საყოველთაო კარანტინი ავიცილოთ,“- განაცხადა იული ედელშტეინმა. ბოლო მონაცემებით, ისრაელში კორონავირუსით 23 755 ადამიანი დაინფიცირდა, 318 კი გარდაიცვალა.