ვითხოვთ არსებული ფართის დაკანონებას ან ადგილმონაცვლეობას - აქცია აჭარის მთავრობასთან 

აჭარის მთავრობის სახლთან ამ წუთებში საპროტესტო აქცია მიმდინარეობს, სადაც ქობულეთში, თავისუფლების ქ.#19-, #96-ში, ასევე მ. აბაშიძის ქ.#116-ში და გილაურის დასახლებაში თვითნებურად შესახლებულები არიან შეკრებილები. ისინი ფართების დაკანონებას ან ადგილმონაცვლეობას ითხოვენ. შიშობენ, რომ არსებული შენობები აუქციონზე გაიყიდება და ისინი ღია ცის ქვეშ დარჩებიან. აქციის მონაწილეები დახმარებას აჭარის მთავრობის თავმჯდომარეს სთხოვენ. ''მოგვაქციონ ყურადღება. ​რვა წლის განმავლობაში ათასი გაჭირვება ავიტანეთ. ახლა არ გაგვაუბედურონ. ვინმემ შენობა აუქციონზე რომ იყიდოს, უსახლკაროდ ვრჩებით. ან პირობა მოგვცენ, თუ ვინმე იყიდის, ღია ცის ქვეშ არ დაგვტოვონ. ბატონმა თორნიკე რიჟვაძემ შუამავლობა გაგვიწიოს. აქვს უფლება, რომ სადაც ვცხოვრობთ, გაგვიფორმოს ან სხვაგან მოგვცეს. სადან ამ ეტაპზე ვცხოვრობთ, იქედან თუგამოგვყრიან, ეს უკვე მთავრობის სირცხვილია.'' - აცხადებს აქციის მონაწილე. საპროტესტო აქცია გუშინ ქობულეთში, მერიის შენობასთანაც გაიმართა. თავისუფლების ქ.#19-ში მდებარე, ყოფილი სტატისტიკის შენობაში მცხოვრები სოციალურად დაუცველი ოჯახები მუნიციპალიტეტის შენობის ფოიეში შეიჭრნენ. მათი განცხადებით, შენობა ეკონომიკის სამინისტროსგან აუქციონის წესით, ქობულეთის საკრებულოს დეპუტატმა მალხაზ რომანაძემ იყიდა. მათივე განმარტებით, დეპუტატი არჩევნების შემდეგ შენობიდან გამოსახლებით ემუქრება.