ავტოსარემონტო კომპანიების მუშაობა დღეიდან ნებადართულია

http://pirveliradio.ge/?newsid=142751 დღეიდან ნებადართულია ავტოსარემონტო კომპანიების მუშაობა. როგორც საქართველოს პრემიერ-მინისტრმა, გიორგი გახარიამ განაცხადა, აღნიშნული გადაწყვეტილება ლოგისტიკური ბიზნესისა და გადაზიდვებისთვის ძალიან მნიშვნელოვანია. „მინდა გითხრათ, რომ 5 მაისიდან ნებადართული იქნება ავტოსარემონტო კომპანიების მუშაობა. ეს კრიტიკულად მნიშვნელოვანია როგორც ლოგისტიკური ბიზნესისთვის, ასევე გადაზიდვებისთვის და ესეც ის ნაბიჯია, რომლის განხორციელების და გადადგმის შესაძლებლობა დღეს გვაქვს,“ - განაცხადა პრემიერმა გუშინ. ამასთან, მთავრობის ადმინისტრაციაში განმარტავენ, რომ ავტოსარემონტო კომპანიების მუშაობაზე შეზღუდვის მოხსნის მიუხედავად, ავტონაწილებით ვაჭრობა დასაშვებია მხოლოდ ონლაინ და ავტოტექმომსახურების გამწევ ადგილას, თუ ამ მასალის გაყიდვა ავტოტექმომსახურების გაწევის შემადგენელი ნაწილია. მათივე ცნობით, ავტოტექმომსახურების დაშვება გულისხმობს მოტოციკლეტების, მოპედებისა და ველოსიპედების ტექმომსახურებასაც. მთავრობის ადმინისტრაციაში ასევე აცხადებენ, რომ ავტოტექმომსახურების ცენტრებისა და ავტოსამრეცხაოების მიერ სავალდებულოა, დაცული იყოს შესაბამისი წესები (პირბადეები, სადეზინფექციო საშუალებები და ა.შ).