გიორგი გახარია: "რემდესივირს" გამოვიყენებთ მხოლოდ კრიტიკული პაციენტების შემთხვევაში

საქართველოს პრემიერ-მინისტრი გიორგი გახარია ადასტურებს ინფექციური პათოლოგიისა და შიდსის ეროვნული ცენტრის ხელმძღვანელის, თენგიზ ცერცვაძის მიერ გავრცელებულ ინფორმაციას იმასთან დაკავშირებით, რომ საქართველო პრეპარატ "რემდესივირის" შეისყიდის, თუმცა ასევე განმარტავს მისი გამოყენების წესს კოვიდკლინიკებში. "რემდესევირი ჯერჯერობით ჯანდაცვის მსოფლიო ორგანიზაციის მიერ კოვიდის შემთხვევაში სამკურნალოდ დადასტურებული და ლიცენზირებული მედიკამენტი არ არის. ის არის მხოლოდ და მხოლოდ განსაკუთრებულ შემთხვევებში ექსპერიმენტის სახით გამოსაყენებელი წამალი. რომ მეკითხებით, როდის იქნება ხელმისაწვდომი საქართველოს მოქალაქეებისთვის, როგორ წარმოგიდგენიათ? რემდესივირი კოვიდის სამკურნალოდ სააფთიაქო ქსელში გაიყიდება? ასე არ ხდება. სახელმწიფო შეისყიდის, მაგრამ მისი გამოყენება შესაძლებელი იქნება მხოლოდ და მხოლოდ მძიმე და კრიტიკული პაციენტების შემთხვევაში ისიც იმ შემთხვევაში, როცა პაციენტების თანხმობა იქნება ამ პრეპარატის გამოყენებასთან დაკავშირებით. ხელმისაწვდომი რემდესივირი მოქალაქეებისთვის ვერ იქნება, ვინაიდან ის ლიცენზირებული არ არის." - ასე უპასუხა გიორგი გახარიამ მედიის კითხვას პრეპარატ რემდესივირის შესახებ.