რუსეთის საგამოძიებო კომიტეტი 23 მარტამდე მოითხოვს შინაპატიმრობას ნავალნის პრესმდივნისთვის

რუსეთის საგამოძიებო კომიტეტმა მოსკოვის სასამართლოს მიმართა თხოვნით 23 მარტამდე შინაპატიმრობა მიუსაჯოს კირა იარმიშს, ოპოზიციონერი პოლიტიკოსის, ალექსეი ნავალნის პრესმდივანს.  კომიტეტმა ბასმანის ოლქის სასამართლოს 1 თებერვალს მიმართა და განაცხადა, რომ იარმიშმა დაარღვია კორონავირუსის გავრცელების საწინააღმდეგოდ დაწესებული ჯანდაცვის და უსაფრთხოების წესები, ნავალნის მხარდასაჭერად მასობრივი საპროტესტო აქციების გამართვის მოწოდებით გამოსვლით.  იარმიში და ნავალნის კიდევ რამდენიმე მოკავშირე 21 იანვარს დააკავეს და ბრალად დასდეს არასანქცირებული გამოსვლების მოწყობა. 22 იანვარს სასამართლომ დაადგინა, რომ იარმიში ცხრა დღის განმავლობაში უნდა დარჩენილიყო ციხეში.  ალექსეის ძმას, ოლეგ ნავალნის, ნავალნის ანტიკორუფციული ფონდის ადვოკატს, ლიუბოვ სობოლს და ოპოზიციონერის მოსკოვის შტაბ-ბინის კოორდინატორს, ოლეგ სტეპანოვს უკვე მიუსაჯეს შინაპატიმრობა 23 მარტამდე, ანალოგიური ბრალდებებით.   თავად ნავალნი 17 იანვარს დააპატიმრეს, როცა გერმანიიდან დაბრუნდა - სადაც მას აგვისტოში მოწამვლის შემდეგ მკურნალობდნენ. ნავალნი კრემლს ადანაშაულებს მის მოწამვლაში. კრემლი უარყოფს ბრალდებას.  ნავალნის ბრალად წაუყენეს იმ პირობითი პატიმრობის წესების დარღვევა, რომელიც მას მიესაჯა გაფლანგვის საქმესთან დაკავშირებით. ნავალნი იმ საქმეს პოლიტიკურად მოტივირებულს უწოდებს.   2 თებერვალს გაიმართება სასამართლო სხდომა, რომელზეც იმსჯელებენ შეუცვალონ თუ არა ნავალნის სამნახევარი წლით მისჯილი პირობითი პატიმრობა - რომელსაც ვადა 31 დეკემბერს ამოეწურა - რეალურად ციხეში ყოფნით.  ნავალნის გუნდმა 23 იანვარს რუსეთის მასშტაბით მასობრივი აქციები მოიწვია, მისი დაკავების გასაპროტესტებლად.  ათი ათასობით მოქალაქემ მიიღო მონაწილეობა აქციებში, რომლებიც განმეორდა 31 იანვარს.  პოლიციამ ორივე აქციაზე ძლიერი ზეწოლა განახორციელა, ზოგ შემთხვევაში უხეში ძალის გამოყენებით დააკავა ათასობით დემონსტრანტი.  https://www.radiotavisupleba.ge/a/31080241.html #ახალი_ამბები #twitter