აფხაზეთის დე ფაქტო მთავრობა ეუთოს უნდობლობას უცხადებს

რუსეთის მიერ ოკუპირებული აფხაზეთის დე ფაქტო საგარეო საქმეთა სამინისტრომ „შეუმდგარი და ანგაჟირებული“ უწოდა ეუთოში საქართველოს მეგობართა ჯგუფის განცხადებას, რომელშიც დაგმობილია რუსული ოკუპაციის შედეგები და დადასტურებულია მხარდაჭერა საქართველოს სუვერენიტეტისა და ტერიტორიულ მთლიანობის მიმართ. საქართველოს მეგობარი ქვეყნების მიერ 4 დეკემბერს გავრცელებულ განცხადებას 6 დეკემბერს მოჰყვა დე ფაქტო საგარეო საქმეთა სამინისტროს კომენტარი, რომლის თანახმად, ეუთო დადანაშაულებელია მიკერძოებულ და ცალმხრივ პოზიციასა და თბილისის ნებისმიერი ქმედების მხარდაჭერაში. აფხაზეთის დე ფაქტო საგარეო საქმეთა სამინისტროს განცხადებით, ეუთო ჟენევის საერთაშორისო დისკუსიის თანათავმჯდომარეა, თუმცა, აფხაზურ მხარეს ამ რეგიონული საერთაშორისო ორგანიზაციის მიმართ ნდობა არ აქვს და იტოვებს უფლებას მოითხოვოს თანათავმჯდომარეთა რიგებიდან ეუთოს გარიცხვა. ჟენევის საერთაშორისო დისკუსიის ფორმატი 2008 წლის აგვისტოს ომის შემდეგ შეიქმნა და მისი თანათავმჯდოამრეები არიან ევროკავშირის, ეუთოს და გაეროს სპეციალური წარმომადგენლები. ჟენევის ფორმატით, მოლაპარაკებაში მონაწილეობენ საქართველოს ხელისუფლების, ოკუპირებული ცხინვალის და აფხაზეთის დე ფაქტო მთავრობების, რუსეთის და აშშ-ის წარმომადგენლები. ამასთან, რუსეთს უკვე წლებია ეუთოში დაბლოკილი აქვს აფხაზეთის და ცხინვალის რეგიონებში ამ საერთაშორისო ორგანიზაციის მისიის მუშაობა.   https://www.radiotavisupleba.ge/a/30987544.html #ახალი_ამბები #twitter