ზურაბიშვილი გვარამიას განაჩენზე: პოლიტიკურად არ მიმაჩნია, რომ იყო დროული

საქართველოს პრეზიდენტი, სალომე ზურაბიშვილი უარს ამბობს შეაფასოს ოპოზიციური არხის, "მთავარი არხის" მეწილისა და დირექტორის, ნიკა გვარამიასთვის პატიმრობის მისჯის საკითხი. მას "პალიტრანიუსისთვის" მიცემულ ინტერვიუში არ უსაუბრია, აპირებს თუ არა შეწიყალოს გვარამია. "მე არ მაქვს უფლება, რომ სასამართლოს გადაწყვეტილების მიმართ მქონდეს შეფასება... მე, როგორც პრეზიდენტმა, არ შეიძლება ეჭვები წარმოვთქვა სასამართლოს მიმართ. შემიძლია მხოლოდ ერთი რამ ვთქვა, ამ დროს ამ გადაწყვეტილების მიღება, რომელიც შეიძლებოდა გადადებულიყო, პოლიტიკურად არ მიმაჩნია, რომ იყო დროული... ვიცი, რომ იყო სხვა ვარიანტები სასჯელის, ვიდრე ის, რაც იქნა მიღებული", - თქვა სალომე ზურაბიშვილმა. თითქმის სამი კვირის წინ, 16 მაისს, მოსამართლე ლაშა ჩხიკვაძემ "მთავარი არხის" გენერალური დირექტორი ნიკა გვარამია დამნაშავედ ცნო ტელეკომპანია "რუსთავი 2"-ის ხელმძღვანელობის პერიოდში უფლებამოსილების ბოროტად გამოყენებაში და 3 წლით და 6 თვით პატიმრობა მიუსაჯა. გვარამიასთვის გამოტანილ გამამტყუნებელ განაჩენს და საპატიმრო სასჯელს უკანონოდ, პოლიტიკურად მოტივირებულად და დამოუკიდებელი მედიისთვის საფრთხის შემცველად აფასებენ უფლებადამცველი ორგანიზაციების, მედიასაშუალებების და ოპოზიციური პარტიების წარმომადგენლები. თავის მხრივ, მმართველი პარტიის, "ქართული ოცნების" წევრებმა თბილისის საქალაქო სასამართლოს განაჩენს უწოდეს სამართლებრივი და ნიკა გვარამიასა და კრიტიკული მედიის პოლიტიკური დევნა გამორიცხეს, რადგან, მათი განცხადებით, "მთავარი არხი" საქმიანობას უპრობლემოდ განაგრძობს. https://www.radiotavisupleba.ge/a/31880733.html